ពីទីក្រុងរីយ៉ាដ អារ៉ាប៊ីសាអូឌីត មេដឹកនាំបណ្តាប្រទេសអារ៉ាប់ និងមូស្លីមជាច្រើននាក់ បានមកជួបជុំគ្នា នៅក្នុងកិច្ចប្រជុំកំពូលវិសាមញ្ញអារ៉ាប់-មូស្លីម នៅក្នុងថ្ងៃទី១១ ខែវិច្ឆិកា ដោយបានជំរុញឱ្យអ៊ីស្រាអែលបញ្ឈប់ប្រតិបត្តិការយោធាភ្លាមៗ នៅក្នុងតំបន់កាហ្សា រួមទាំងច្រានចោលសកម្មភាពរបស់យោធាអ៊ីស្រាអែល ជាការការពារខ្លួន។ 

 

ដោយមើលឃើញពីករណីស្លាប់ដ៏ច្រើនសន្ធឹកនៃប្រជាជនស៊ីវិល រួមទាំងកុមារនៅក្នុងតំបន់កាហ្សា មេដឹកនាំបណ្តាប្រទេសអារ៉ាប់ និងមូស្លីម បានទទូចឱ្យតុលាការព្រហ្មទណ្ឌអន្តរជាតិ បើកការស៊ើបអង្កេតឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ ដែលអ៊ីស្រាអែល បានប្រព្រឹត្តនៅក្នុងទឹកដីកាហ្សា។ នេះបើតាមសេចក្តីថ្លែងការណ៍រួមចុងក្រោយនៃកិច្ចប្រជុំកំពូលវិសាមញ្ញអារ៉ាប់-មូស្លីម។ 

 

ក្នុងរយៈពេលជម្លោះជាងរយៈពេល ១ខែមកនេះ អ្នកស្លាប់នៅក្នុងតំបន់កាហ្សាបានកើនលើសពី ១១០០០ននាក់ ដោយក្នុងនោះមានកុមារជាច្រើននាក់ផង។ អ៊ីស្រាអែល បានការពារសកម្មភាពរបស់ខ្លួនថា ក្រុមហាម៉ាស បានយកប្រជាជនស៊ីវិលធ្វើជាខែលសម្រាប់ការពារខ្លួន។ 

 

កិច្ចប្រជុំកំពូលមួយនេះ ត្រូវបានចូលរួមដោយប្រធានាធិបតីអ៊ីរ៉ង់ លោក Ebrahim Raisi, ប្រធានាធិបតីតួកគី លោកតៃយីប អ៊ែរដូហ្កាន់, ប្រធានាធិបតីស៊ីរី លោក Bashar al-Assad, មេដឹកនាំកាតា Tamim bin Hamad Al Thani និងព្រះអង្គម្ចាស់ Mohammed bin Salman ជាដើម។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

«យើងកំពុងប្រឈមនឹងវិបត្តិមនុស្សធម៌ធ្ងន់ធ្ងរ ដែលបង្ហាញពីភាពបរាជ័យរបស់ក្រុមប្រឹក្សាសន្តិសុខអង្គការសហប្រជាជាតិ និងសហគមន៍អន្តរជាតិ ក្នុងការបញ្ចប់ការបំពានច្បាប់អន្តរជាតិពីសំណាក់អ៊ីស្រាអែល»។ រជ្ជទាយាទអារ៉ាប៊ីសាអូឌីត Mohammed បានសង្កត់ធ្ងន់បែបនេះ នៅក្នុងកិច្ចប្រជុំក្នុងថ្ងៃទី១១ ខែវិច្ឆិកា ដោយបន្តជំរុញឱ្យអ៊ីស្រាអែលបញ្ឈប់ប្រតិបត្តិការយោធារបស់ខ្លួន។ 

 

ចំណែក ប្រធានាធិបតីនៃអាជ្ញាធរប៉ាឡេស្ទីនប្រចាំនៅតំបន់ត្រើយខាងលិច (West Bank) លោក Mahmoud Abbas បានយល់ឃើញថា ប្រជាជនប៉ាឡេស្ទីន កំពុងប្រឈមនឹងឧក្រិដ្ឋកម្មសង្រ្គាម និងជំរុញឱ្យអាម៉េរិកបញ្ឈប់ការឈ្លានពានរបស់អ៊ីស្រាអែលលើតំបន់កាហ្សា។ 

 

ស្របគ្នានេះ មេដឹកនាំកាតា ដែលជាមូលដ្ឋានសម្រាប់មេដឹកនាំក្រុមហាម៉ាសមួយចំនួន បានស្វះស្វែងរកការសម្របសម្រួល ដើម្បីរំដោះចំណាប់ខ្មាំងអ៊ីស្រាអែល និងបង្ហាញក្តីសង្ឃឹមថា កិច្ចព្រមព្រៀងបទឈប់បាញ់អាចនឹងមានក្នុងពេលឆាប់ៗ។ 

 

សូមបញ្ជាក់ថា ចាប់តាំងពីមានការវាយប្រហារនៅថ្ងៃទី៧ ខែតុលា មេដឹកនាំអ៊ីស្រាអែល បានប្តេជ្ញាបោសសម្អាតក្រុមហាម៉ាសឱ្យអស់ពីដែនដីកាហ្សា ដើម្បីបង្ការការវាយប្រហារជាថ្មីម្តងទៀត។ មិនតែប៉ុណ្ណោះ មេដឹកនាំអ៊ីស្រាអែល តែងបដិសេដកិច្ចព្រមព្រៀងបទឈប់បាញ់ ក្រោមហេតុផលមិនចង់ឱ្យក្រុមហាម៉ាស ពង្រឹងកម្លាំងរបស់ខ្លួនឡើងវិញ៕