លោក ឌិត ទីណា រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទ និងលោក អ៊ូច ភា អភិបាលខេត្តតាកែវ កាលពីថ្ងៃអាទិត្យ ទី១២ វិច្ឆិកា បានដឹកនាំមន្រ្តីរបស់ខ្លួន កងកម្លាំងយោធា និងនគរបាល ចុះជួយច្រូតដោយដៃ និងបោកស្រូវដោយម៉ាស៊ីន ជូនកសិករដែលកំពុងរងគ្រោះជន់លិច ដោយសារជំនន់ទឹកភ្លៀង ស្ថិតនៅឃុំគោកព្រេច និងឃុំអង្គប្រាសាទ ស្រុកគិរីវង់ ជិត៤០០ហិកតា។ 
 

បើតាម លោក ឌិត ទីណា នៅភូមិសាស្រ្តនេះ មានដីស្រែជាង២ពាន់ហិកតា កំពុងត្រូវប្រមូលផល ខណៈកម្លាំងអាជ្ញាធរ នឹងនៅបន្តជួយច្រូតកាត់ពលរដ្ឋរហូតទាល់តែអស់ ដែលប្រើពេលយ៉ាងយូរ ១០ថ្ងៃ។ 
  

ដ្បិតមានការឈឺឆ្អាលពីអាជ្ញាធរ ប៉ុន្តែ រដ្ឋមន្រ្តីរូបនេះ ណែនាំឱ្យមន្រ្តីកសិកម្ម សហការជាមួយក្រសួងធនធានទឹក និងឧតុនិយម ដើម្បីអន្តរាគមន៍បូមទឹកចេញឱ្យអស់ ដើម្បីអាចឱ្យម៉ាស៊ីនចូលច្រូតបានទាន់ពេលវេលា។
 

គិតមកទល់ពេលនេះ ស្រូវនៅក្នុងឃុំ គោកព្រេច រងផលប៉ះពាល់ជាង១ពាន់ហិកតា ក្នុងនោះ កសិករ ក៏ដូចជា អាជ្ញាធរមូលដ្ឋាន និងកម្លាំងប្រដាប់អាវុធ កំពុងចុះជួយប្រមូលផល៣៩៥ហិកតា និងផ្ទៃដីដែលពុំទាន់បានចុះច្រូតកាត់ចំនួន៤៣៧ហិកតា។ នេះបើតាម លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ៕