ខាងក្រោមនេះគឺជាផលប៉ះពាល់ទៅដល់ក្មេងតូចនៅពេលដែលគេលេងទូរស័ព្ទច្រើនពេក៖
 

១. ពួកគេងាយនឹងប្រឈមនឹងការអភិវឌ្ឍយឺត៖ នៅពេលពួកគេផ្ដោតអារម្មណ៍ទៅលើអេក្រង់ទូរស័ព្ទ ពួកគេអាចនឹងខ្សោយនូវការប្រាស្រ័យទាក់ទងជាមួយមនុស្សជុំវិញ ដែលអាចបណ្ដាលឱ្យការចេះចាប់ផ្ដើមនិយាយមានភាពយឺតយ៉ាវ។ ម្យ៉ាងវិញទៀតពួកគេអាចនឹងបដិសេធមិនញ៉ាំអាហារ ហើយគេងមិនគ្រប់គ្រាន់ដែលអាចឱ្យពួកគេអភិវឌ្ឍន៍ផ្នែករាងកាយយឺត។
 

២. ពួកគេអាចនឹងញៀនជាមួយការលេងទូរស័ព្ទ និងគ្រឿងអេឡិចត្រូនិច៖​ ដោយមិនអាចដកឃ្លាពីទូរស័ព្ទបាន វាអាចប៉ះពាល់ដល់ការធ្វើសកម្មភាពផ្សេងៗ ការទំនាក់ទំនងជាមួយឪពុកម្ដាយ និងអ្នកជុំវិញ​។ ពួកគេបាត់បង់នូវចំណង់ ឬធុញនឹងការអានសៀវភៅ លេងកីឡា ធ្វើចលនា លេងតុក្កតា ឬប្រដាប់លេងជាដើម។ លើសពីនេះ ពួកគេនឹងរឭក ឬនឹកឃើញតែហ្គេម ការកំសាន្ត ឬមាតិកាដែលពួកគេបានមើល ដែលអាចធ្វើឱ្យខួរក្បាលរបស់ពួកគេមិនអាចសម្រាកបានទេ។ 
 

៣. ពួកគេងាយនឹងមានបញ្ហាសុខភាពផ្សេងៗ៖ ការសម្លឹងមើលទូរស័ព្ទ និងគ្រឿងប្រើប្រាស់អេឡិចត្រូនិចដែលជះពន្លឺមកមុខរយៈពេលយូរអាចធ្វើឱ្យស្រវាំងភ្នែក រោយភ្នែក ម្ញ៉ូប ឈឺក្បាល។ លើសពីនេះ ពួកគេមិនអាចចំណាយពេលបញ្ចេញសកម្មភាព លេងកីឡា ដែលអាចធ្វើឱ្យមានការវិវត្តទៅរកការរួយខ្នង ក និងបញ្ហាសាច់ដុំ និងឆ្អឹង។ ពួកគេក៏អាចប្រឈមនឹងបញ្ហាអារម្មណ៍តានតឹង ស្ត្រេស មិនសប្បាយចិត្ត នៅពេលដែលមិនបានលេងទូរស័ព្ទ។ 
 

ដើម្បីដោះស្រាយនូវបញ្ហានេះ ម៉ាក់ប៉ាគួរតែជំនួសការឱ្យកូនលេងទូរស័ព្ទដោយការចំណាយពេលលេងជាមួយពួកគេ និយាយជាមួយពួកគេឱ្យបានច្រើនជាងមុន ដោយត្រូវកាត់បន្ថយរយៈពេលកូនលេងទូរស័ព្ទម្ដងបន្ដិចៗ ហើយត្រូវកំណត់កាលវិភាគពេលដែលត្រូវលេង និងពេលដែលត្រូវធ្វើសកម្មភាពផ្សេងៗ។ មួយវិញទៀត ត្រូវព្យាយាមផ្លាស់ប្ដូរមាតិកាដែលកូនៗមើល ឱ្យចាកផុតពីហ្គេម ឬមាតិកាដែលមិនល្អ មកជាមាតិកាដែលមានប្រយោជន៍សម្រាប់កូនវិញ។