ប្រមុខរដ្ឋាភិបាល បានសង្កត់ធ្ងន់ថា កម្មវិធីនេះ នឹងជួយឱ្យយុវជនមកពីគ្រួសារក្រីក្រ និងគ្រួសារងាយរងហានិភ័យ មានជំនាញច្បាស់លាស់ និងជួយឱ្យជីវភាពប្រសើរឡើង ប្រកបដោយចីរភាព ។ ជាពិសេសចាកផុតពីភាពក្រីក្រ តាមរយៈការបង្កើតមុខរបរ នៃជំនាញវីជ្ជាជីវៈនីមួយៗ។ ក្រៅពីកាត់បន្ថយភាពក្រីក្រ វាក៏ជួយដល់ចង្វាក់ផលិតកម្ម និងកំណើនសេដ្ឋកិច្ច ដោយសារធនធាន និងសក្ដានុពលកម្មករជំនាញទៀតផង។
 

ថ្លែងក្នុងពិធីប្រកាសដាក់ឱ្យអនុវត្តជាផ្លូវការរបបសន្តិសុខសង្គម ផ្នែកថែទាំសុខភាព តាមរបបភាគទានដោយស្ម័គ្រចិត្ត និងប្រកាសដាក់ឱ្យអនុវត្តជាផ្លូវការ នូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ថ្ងៃទី១៤ ខែវិច្ឆិកា សម្ដេច ហ៊ុន ម៉ាណែត បានសង្កត់ធ្ងន់ថា ៖ «ប៉ុន្តែអ្វីដែលនាំឱ្យមានការចូលរួមដោយស្ម័គ្រចិត្តបានច្រើន ទី១ ត្រូវការផ្សាព្វផ្សាយឱ្យដឹងច្បាស់ ឱ្យបានល្អ បង្ហាញឱ្យគាត់ឃើញ ឱ្យគាត់មក, ទី២ ត្រូវអនុវត្តឱ្យបានគត់មត់ ឱ្យចំគោលដៅ…»។ 

 

ដោយឡែកក្រសួងការងារ និងប​ណ្ដុះបណ្ដាលវិជ្ជាជីវៈ, ក្រសួងវប្បធម៌ និងវិចិត្រសិល្បៈ, ក្រសួងផែនការ, ក្រសួងសង្គមកិច្ច អតីតយុទ្ធជន និងយុវសម្បទា ត្រូវមានតួនាទី ផ្សព្វផ្សាយឱ្យពលរដ្ឋយល់ដឹងពីកម្មវិធីនេះ រួមទាំងបង្កើតភាពងាយស្រួយក្នុងការចុះឈ្មោះចូលរៀន និងទទួលបានអត្ថប្រយោជន៍ពី ប.ស.ស។ លើសពីនេះ ក្រសួងការងារ ត្រូវរៀបចំឱ្យការសិក្សាជំនាញបណ្ដុះបណ្ដាលវិជ្ជាជីវៈ និងបច្ចេកទេស ដំណើរការដោយតម្លាភាព គុណភាព និងប្រសិទ្ធភាព។ នេះបើតាមនាយករដ្ឋមន្ត្រី។
 

កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសនេះ នឹងបញ្ជ្រាបដល់ក្រុមគោលដៅយុវជន​មកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស ចំនួន ១,៥លាននាក់ ដោយមិនបង់ថ្លៃសិក្សា និងទទួលបាននូវប្រាក់ឧបត្ថម្ភប្រចាំខែទៀតផង។ សម្ដេច ហ៊ុន ម៉ាណែត បានប្រៀបធៀបកម្មវិធីនេះ ទៅជាយុទ្ធសាស្រ្តឱ្យយុវជនក្រុមគោលដៅទាំងនោះ ចេះស្ទូចត្រីដោយខ្លួនឯង ។