សមត្ថកិច្ចអះអាងថា កាលពីថ្ងៃទី២ វិច្ឆិកា ជនសង្ស័យជាជនជាតិចិនមានគ្នា៣នាក់ បានជិះរថយន្ត ដោយមានកាំភ្លើងខ្លីក្នុងដៃ២ដើម ចុះចាប់ជនរងគ្រោះចូលក្នុងឡាន ខណៈពេលជនរងគ្រោះ ចេញពីកន្លែងបរិភោគអាហារមួយកន្លែង នៅចំណុចបុរីញូវថោន នៅភូមិព្រៃទា១ សង្កាត់ចោមចៅ៣ ខណ្ឌពោធិសែនជ័យ។ ជនសង្ស័យទាំងនោះ ឃុំឃាំងជនរងគ្រោះ ហើយទារប្រាក់៦៤០០ដុល្លារ។ 

 

ក្រោយកើតហេតុ កម្លាំងសមត្ថកិច្ចរាជធានីភ្នំពេញបានស្រាវជ្រាវកំណត់មុខសញ្ញាជនសង្ស័យ ក៏ចុះទៅបង្ក្រាប នៅចំណុចកែងផ្សាររតនាផ្លាហ្សា សង្កាត់ទឹកថ្លា ខណ្ឌសែនសុខ នៅថ្ងៃទី១៤ វិច្ឆិកា។ 

 

ប្រតិបត្តិការនេះ កងកម្លាំងសមត្ថកិច្ច បានឃាត់ខ្លួនជនសង្ស័យ២នាក់ ហើយរឹបអូស បានរថយន្តពីរគ្រឿង ទូរសព្ទ័ដៃ៥គ្រឿង ឧបករណ៍ផ្តាច់ប្រព័ន្ធកាមេរ៉ា របាំងមុខជ័រកែច្នៃ ច្រវ៉ាក់ដែក និងស្លាកលេខរថយន្តមួយចំនួន។

 

បច្ចុប្បន្នជនសង្ស័យ និងវត្ថុតាងចាប់បាន ត្រូវកម្លាំងជំនាញការៀបចំកសាងសំណុំរឿង ដើម្បីបញ្ជូនទៅសាលាដំបូងរាជធានីភ្នំពេញ បន្តចាត់ការតាមនីតិវិធី៕