តាមការបញ្ជាក់របស់ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប.) នៅលើទំព័រហ្វេសប៊ុក នៅថ្ងៃទី១៦ វិច្ឆិកា កម្លាំងជំនាញនៃអគ្គនាយកដ្ឋាន ក.ប.ប. បានសហការជាមួយសមាគមអ្នកចិញ្ចឹមសត្វកម្ពុជា និងអាជ្ញាធរដែនដី ចុះឆែកឆេឃ្លាំងស្ដុកសាច់បង្កកជាច្រើនកន្លែង ស្ថិតក្នុងខណ្ឌមានជ័យ ក្នុងនោះចាប់បានសាច់បង្កកគ្មានប្រភព និងឯកសារបញ្ជាក់ត្រឹមត្រូវចំនួន ៤,៧១០គីឡូក្រាម។
 

ក្នុងថ្ងៃដដែល មន្រ្តីជំនាញ ស្ទាក់ចាប់បានរថយន្តមួយគ្រឿងទៀត ដឹកបង្គាស្រស់១២៤កេស ស្មើនឹង ២,១៣០គីឡូក្រាម។ ជាលទ្ធផលរកឃើញថា បង្គាទាំងនោះមានផ្ទុកសាធារតុគីមី Formolin និងមានចាក់ចាហួយ (CMC) ដែលសារធាតុទាំង២ខាងលើនេះធ្វើឱ្យប៉ះពាល់សុខភាពអ្នកប្រើប្រាស់ធ្ងន់ធ្ងរ និងខុសច្បាប់ដែលមានចែងជាធរមាន។
 

ដោយឡែក នៅថ្ងៃទី១៥ វិច្ឆិកា ឯណោះវិញ ក.ប.ប. បានរកឃើញសាច់បង្កក និងប្រហិតហួសកាលបរិច្ឆេទប្រើប្រាស់ចំនួន ៣០គីឡូក្រាម ដែលពុំបានអនុវត្តតាមលក្ខខណ្ឌតម្រូវស្ដីពីសុវត្ថិភាពម្ហូបអាហារ។
 

ផលិតផលសាច់បង្កកទាំងអស់នោះត្រូវបានមន្រ្តីជំនាញឃាត់ទុកនៅនឹងកន្លែង ដោយតម្រូវឱ្យម្ចាស់ចូលខ្លួនមកបំភ្លឺនៅអគ្គនាយកដ្ឋាន ក.ប.ប.​ ជាមួយនឹងឯកសារបញ្ជាក់ឱ្យបានត្រឹមត្រូវផងដែរ។ ចំពោះ បង្គាវិញ ត្រូវបានមន្រ្តីជំនាញដកហូតយកកម្ទេចចោលភ្លាមៗ និងពិន័យទៅតាមនីតិវិធីយ៉ាងធ្ងន់ធ្ងរ។ 
 

សូមបញ្ជាក់ថា ពីថ្ងៃចុងក្រោយនេះ មន្រ្តីបង្រ្កាបបានបទល្មើសសាច់សត្វ និងផលិតធ្វើពីសាច់សត្វជិត២០តោន។ ការបង្រ្កាបយ៉ាងគគ្រឹកគគ្រេងនៅពេលនេះ ធ្វើឡើងបន្ទាប់ពី សម្ដេច ហ៊ុន ម៉ាណែត នាយករដ្ឋមន្រ្តី បញ្ជាឱ្យពង្រឹងច្បាប់ហាមឃាត់សាច់បង្កក និងចំណីអាហារគ្មានគុណភាពចូលមកកម្ពុជា៕ 
 

,