នៅក្នុងសន្និសីទសារព័ត៌មានស្តីពី ការរៀបចំព្រឹត្តិការណ៍ប្រគុំតន្ត្រី និងតាំងពិព័រណ៍គំនូរ នៅល្ងាចថ្ងៃទី១៦ វិច្ឆិកា លោកស្រី ស៊ូវណ្ណា ហ្គោនឡែត បានឱ្យដឹងថា រដ្ឋាភិបាលកម្ពុជា កំពុងធ្វើការងារយ៉ាងជិតស្និតជាមួយឥណ្ឌា ក្នុងការនាំយកពូជសត្វខ្លាធំចំនួន៤ក្បាលពីប្រទេសនេះ មកលែងនៅក្នុងតំបន់ជួរភ្នំក្រវាញ។ ក្នុងចំណោម៤ក្បាលនោះ មានញី៣ និងឈ្មោល១។ 
 

តាមការគ្រោងទុក រដ្ឋាភិបាលឥណ្ឌា នឹងប្រគល់សត្វខ្លាធំដល់កម្ពុជា​នៅឆ្នាំក្រោយ ព្រោះថា កម្ពុជាបានបញ្ចប់កិច្ចការងាររដ្ឋបាល និងឯកសារសំខាន់ទាំងអស់ដោយជោគជ័យ។ 
 

លោកស្រី ស៊ូវណ្ណា ហ្គោនឡែត ថ្លែងដូច្នេះថា៖«ឥឡូវនេះ រដ្ឋាភិបាលកម្ពុជា​និងសាធារណរដ្ឋឥណ្ឌា កំពុងតែធ្វើការរួមគ្នា លើកិច្ចការងារនាំយកសត្វខ្លាធំនេះ។ ដូច្នេះ យើងកំពុងតែរៀបចំ ដើម្បីឱ្យមានវត្តមានសត្វខ្លាធំនៅក្នុងតំបន់ជួរភ្នំក្រវាញជាថ្មីនៅឆ្នាំក្រោយ»។ 
 

ការស្ដារសត្វខ្លាធំឡើងវិញ មិនងាយស្រួលនោះទេ ប៉ុន្តែ កម្ពុជាបានតាំងចិត្តនាំយកប្រភេទសត្វកម្រនេះឱ្យលេចវត្តមានឡើងវិញ ដើម្បីជាប្រយោជន៍ជួយដល់ប្រព័ន្ធអេកូឡូស៊ីរបស់ភពផែនដី។
 

កាលពីជាង២០ឆ្នាំមុន ព្រៃឈើនៅក្នុងតំបន់ជួរភ្នំក្រវាញនេះ បានរងការកាប់បំផ្លាញយ៉ាងសន្ធឹក ហើយសត្វព្រៃជាច្រើនត្រូវបានគេបរបាញ់ដោយគ្មានការអើពើ។ ដោយឃើញពីការកាប់បំផ្លិចបំផ្លាញយ៉ាងគគ្រឹកគគ្រេងនេះ រដ្ឋាភិបាលកម្ពុជា ​បានស្នើឱ្យអង្គការសម្ព័ន្ធមិត្តសត្វព្រៃ ជួយចូលរួមក្នុងការអភិរក្សនៅតំបន់ជួភ្នំក្រវាញ។
 

អង្គការសម្ព័ន្ធមិត្តសត្វព្រៃ បានចាប់ដៃជាមួយរដ្ឋាភិបាលកម្ពុជារយៈពេល២០ឆ្នាំមកហើយ ទៅលើកិច្ចការពារ និងអភិរក្សធនធានធម្មជាតិ នៅតំបន់ជួរភ្នំក្រវាញ។ តាមរយៈសកម្មភាពនៃកិច្ចខិតខំជាច្រើនឆ្នាំមកនេះ លោកស្រី ស៊ូវណ្ណា ហ្គោនឡែត មើលឃើញថា បច្ចុប្បន្ន​ តំបន់ជួរភ្នំក្រវាញ បានក្លាយជាកន្លែងមានសុវត្ថិភាពជាងគេ និងមានសក្ដានុពលគ្រាប់គ្រាន់ សម្រាប់ស្ដារប្រភេទសត្វខ្លាធំនេះឡើងវិញ។ 
 

លោកស្រី បន្ថែមដូច្នេះថា៖«២០ឆ្នាំនៃកិច្ចការងារការពាររបស់ពួកយើង ខ្ញុំមើលឃើញថា តំបន់ជួរភ្នំក្រវាញ បានក្លាយជាកន្លែងដែលមានសុវត្ថិភាព និងសក្ដានុពលគ្រាប់គ្រាន់ សម្រាប់ការស្ដារឡើងវិញនូវប្រភេទសត្វខ្លាធំនេះ»។ 
 

តំបន់ជួរភ្នំក្រវ៉ាញមានទំហំជាង១,៥លានហិកតា ស្ថិតនៅប៉ែកនិរតីនៃប្រទេសកម្ពុជា ដែលគ្របដណ្តប់ដោយធនធានធម្មជាតិ​ និងថនិកសត្វដែលរងការគំរាមកំហែងជាច្រើនប្រភេទដូចជា ដំរីអាស៊ី និងខ្លា។  
 

បើតាម លោកស្រី ស៊ូវណ្ណា ហ្គោនឡែត នាពេលកន្លងមក ការលែងសត្វខ្លាធំ ក្នុងតំបន់ស្នូលនៃជួរភ្នំក្រវាញ នឹងផ្តល់ការគាំទ្រការល្បាតដល់ឧទ្យានុរក្សការផ្តល់ជំនួយបច្ចេកទេស ដូចជាការបំពាក់វិទ្យុទាក់ទងទៅលើ ករបស់សត្វខ្លា។ ការតាមដានដំណើរសត្វខ្លាពីផ្កាយ រណប ហើយទិន្នន័យដែលប្រមូលបានគឺគ្រប់គ្រងដោយក្រសួងបរិស្ថាន។
 

តំបន់ស្នូលនៃគម្រោងស្តារសត្វខ្លាធំនេះត្រូវបានកំណត់នៅឆ្ងាយពីភូមិអ្នកស្រុកប្រហែល២៥គីឡូម៉ែត្រ ប៉ុន្តែក្នុងករណីសត្វខ្លាធំដើរទៅប៉ះ និងចាប់សត្វចិញ្ចឹមរបស់ប្រជាពលរដ្ឋជាចំណីនឹងត្រូវទទួលសំណង។
 

សូមជម្រាបថា សត្វខ្លាធំ បានបាត់វត្តមានពីព្រៃធម្មជាតិក្នុងប្រទេសកម្ពុជា តាំងពីឆ្នាំ២០០៧ ដោយសារតែការបរបាញ់ និងដាក់អន្ទាក់ យ៉ាងអាណាធិបតេយ្យ។ នៅឆ្នាំ២០១០ សត្វប្រភេទនេះ ត្រូវបានគេប៉ាន់ប្រមាណថា មានប្រហែល៣២០០ក្បាលប៉ុណ្ណោះ នៅលើពិភពលោក។ 
 

ខ្លាធំ​ស្ថិតក្នុង​ក្រុម​ប្រភេទ​ជិត​ផុត​ពូជ និង​មាន​ចុះ​ក្នុង​បញ្ជី​ឧបសម្ព័ន្ធ​ទី ១ នៃ​អនុសញ្ញា​សាយ​តេស។ ខ្លា​ប្រភេទ​នេះ​កំពុង​រងគ្រោះថ្នាក់​ដោយសា​រការ​បរបាញ់ យក​ឆ្អឹង ស្បែក ដើម្បី​ធ្វើ​ពាណិជ្ជកម្ម និង​ការយកទៅ​ប្រើប្រាស់​ធ្វើជា​ឱសថ​បុរាណ។ ខ្លាធំ​ត្រូវបាន​ចុះ​ក្នុង​បញ្ជី​ក្រហម IUCN ថា​ជា​ប្រភេទ​កំពុង​រងគ្រោះថ្នាក់​ជិត​ផុត​ពូជ (EN)៕