ដើម្បីជំរុញកិច្ចសហប្រតិបត្តិការនេះឱ្យកាន់តែមានប្រសិទ្ធភាព លោក នេត្រ ភក្រ្តា ចង់ឱ្យអគ្គស្ថានីយវិទ្យុមជ្ឈិមចិន ដែលជាស្ថាប័នដឹកនាំផ្សព្វផ្សាយអន្តរជាតិ គួរតែពង្រឹងកិច្ចសហប្រតិបត្តិការជាមួយអង្គភាពព័ត៌មានស្របច្បាប់នៅកម្ពុជា លើវិស័យផ្សេងៗទៀត ដូចជា នវានុវត្តន៍បច្ចេកទេស ការបណ្តុះបណ្តាលធនធានមនុស្ស កិច្ចសហការផលិត និងចាក់ផ្សាយ និងការផ្លាស់ប្តូរវប្បធម៌ជាដើម។
 

លោក Wang Wentian ឯកអគ្គរដ្ឋទូតចិនប្រចាំនៅកម្ពុជា មានប្រសាសន៍ថា កិច្ចសហប្រតិបត្តិការកម្ពុជាចិនបន្តទទួលបានលទ្ធផលល្អជាបន្តបន្ទាប់ ដែលបរិមាណពាណិជ្ជកម្មកម្ពុជា-ចិនមានលើសពី១ម៉ឺនលានដុល្លារអាមេរិក កើនឡើង៤,៦ភាគរយនារយៈពេល១០ខែនេះ។ សហគ្រាសចិន បោះទុនវិនិយោគនៅកម្ពុជាជិត៣ពាន់លានដុល្លារសហរដ្ឋអាមេរិក ស្មើ៨០ភាគរយនៃទុនវិនិយោគបរទេស និងគម្រោងសាងសង់ហេដ្ឋារចនាសម្ព័ន្ធផ្សេងៗទៀត។ សមិទ្ធផលទាំងអស់នេះបង្ហាញពីភាពវិជ្ជមាននៃកិច្ចសហប្រតិបត្តិរវាងប្រទេសទាំងលើវិស័យនានា។
  

ឯកអគ្គរដ្ឋទូតចិនបានរម្លឹកថា កន្លងមកថ្នាក់ដឹកនាំនៃប្រទេសទាំងពីរ បានប្រកាសរួមគ្នាថា កំណត់យកឆ្នាំ២០២៤ ជាឆ្នាំនៃការផ្លាស់ប្តូរប្រជាជននិងប្រជាជនរវាងកម្ពុជានិងចិន ដើម្បីការកសាង សហគមន៍ជោគវាសនារួមកម្ពុជា-ចិនក្នុងយុគសម័យថ្មី។ ​យុគសម័យថ្មី ចំណុចចាប់ផ្តើមថ្មី អនាគតកិច្ចសហប្រតិបត្តិការប្រព័ន្ធផ្សព្វផ្សាយ ប្រទេសទាំងពីរទូលំទូលាយ និងមានក្តីសង្ឃឹម។ នេះជាការបញ្ជាក់របស់លោក Wang Wentian។
 

លោក Hu Jinjun អគ្គនាយករង​នៃ​អគ្គស្ថានីយ​វិទ្យុនិង​ទូរទស្សន៍មជ្ឈិម​ចិន​ បានលើកឡើងថា កន្លងមកភាគីទាំងអស់ ប្ដេជ្ញាបន្ត​រក្សា​ទំនាក់ទំនង​កិច្ចសហប្រតិបត្តិការ​យ៉ាង​ល្អប្រសើរ​ ដោយ​​រួមគ្នា​រៀបចំព្រឹត្តិការណ៍​ប្រព័ន្ធ​ផ្សព្វផ្សាយ​ជាច្រើន ​ដូចជា​​សិក្ខាសាលាយុវជន​ស្ដីពីទំនាក់ទំនង​កម្ពុជា-ចិន​ កម្មវិធី​សម្ពោធ​ចាក់ផ្សាយ​ភាពយន្ត​ឯកសារ​ស្នាមញញឹមកម្ពុជា​ព្រឹត្តិការណ៍​ និងដំណើរ​ភាពយន្ត​ចល័ត​ចិន​-កម្ពុជា​ដ៏ឆ្នើម​ជាដើម។ 
 

លោកបញ្ជាក់ទៀតថា ​អគ្គស្ថានីយវិទ្យុនិង​ទូរទស្សន៍មជ្ឈិមចិនបាន​អនុវត្តការទូត​​ប្រព័ន្ធផ្សព្វផ្សាយ​ បន្ត ​កិច្ចសហប្រតិបត្តិការ​យ៉ាង​ទូលំទូលាយ​ជាមួយ​ស្ថាប័នប្រព័ន្ធផ្សព្វផ្សាយ​ជិត​៣០០​​ក្នុង​ប្រទេស ដោយ​រួមគ្នា​កសាងខ្សែក្រវាត់និងផ្លូវ​សរុប​មាន​គម្រោង​ចំនួន១៤ ត្រូវ​បាន​ដាក់បញ្ចូល​ទៅក្នុង​បញ្ជី​សមិទ្ធផល​កិច្ចសហប្រតិបត្តិការពហុភាគី និងបញ្ជី​គម្រោង​កិច្ចសហប្រតិបត្តិការអន្តរជាតិ​លើក​ទី​៣៕