អគ្គលេខាធិការរូបនេះ បន្ថែមក៏បានប្រាប់ទៀតថា មានមធ្យោបាយ ២យ៉ាង ដែលអាចដាក់ក្បាច់គុននេះ ចូលជាក្នុងអូឡាំពិក។ លោក វ៉ាត់ ចំរើន ពន្យល់ថា ច្រកទី១ គឺអូស្ដ្រាលី ដែលជាម្ចាស់ផ្ទះ កីឡាអូឡាំពិកហ្គេម ឆ្នាំ២០៣២ គឺជាសមាជិក នៃសហព័ន្ធប្រដាល់គុនខ្មែរអន្ដរជាតិ។ ដូច្នេះ កម្ពុជា នឹងបញ្ចុះបញ្ចូលធ្វើយ៉ាងណា ឱ្យអូស្ដ្រាលី ដាក់ គុនខ្មែរ ក្នុងព្រឹត្តិការណ៍នោះ។
 

«យើង មាន ២ផ្លូវ គឺគណៈកម្មាធិការអូឡាំពិកអន្ដរជាតិ បានដាក់គោលការណ៍ ១ថា ប្រទេសជាសមាជិក ជាម្ចាស់ផ្ទះរៀបចំអូឡាំពិក មានសិទ្ធក្នុងការជ្រើសរើស ប្រភេទកីឡាប្រពៃណីផ្សេងទៀត ដាក់ចូលប្រកួត បាទ។ អ៊ីចឹង អូឡាំពិក នៅទីក្រុងបារីស គឺគេបានកំណត់កីឡាហើយ ហើយអូឡាំពិក កាលីហ្វូញ៉ា ឆ្នាំ២០២៨ ក៏គេរៀបចំកំណត់ហើយដែរ។ អ៊ីចឹង ឆ្នាំ២០៣២ នៅ អូស្ដ្រាលី គឺយើង នឹងដាក់ចូល។ ឥឡូវយើង មានសមាជិក នៅអូស្ដ្រាលី ហើយគេក៏មកប្រកួតដែរ។ យើង កំពុងធ្វើការជាមួយគាត់ថា គោលដៅ ឆ្នាំ២០៣២ យើង នឹងដាក់គុនខ្មែរ ឲ្យចូល អូឡាំពិកនៅអូស្ដ្រាលី។»។ អគ្គលេខាធិការគណៈកម្មាធិការជាតិអូឡាំពិកកម្ពុជា បាននិយាយដូច្នេះ។
 

ចំណែកមធ្យោបាយទី២ លោក វ៉ាត់ ចំរើន បានពន្យល់ថា គឺជាសហការ ឬការទទួលបានការគាំទ្រ យ៉ាងហោចណាស់ ៥១ភាគរយ ពីសមាជិកគណៈកម្មាធិការអូឡាំពិកអន្ដរជាតិ នៃចំនួនសរុប ១០៥នាក់។ «យើង ត្រូវធ្វើការជាមួយសមាជិករបស់អូឡាំពិកអន្ដរជាតិ ដែលយើងហៅថា IOC Members ដែលមាន ១០៥នាក់ ក្នុង១០៥នាក់ ទទួលបានការគាំទ្រតែ ៥១% គឺ៥៥នាក់ យើង នឹងបានចូលដោយស្វ័យប្រវត្តិ។»។ លោក វ៉ាត់ ចំរើន បានប្រាប់បែបនេះ។
 

បន្ថែមជាងនេះ អគ្គលេខាធិការរូបនេះ បន្ដថា កម្ពុជា ក៏ត្រូវមានសមាជិកគុនខ្មែរ យ៉ាងហោចណាស់ ៧៥ប្រទេស ផងដែរ ចំពោះការឈានទៅដល់កម្រិតអូឡាំពិក។
 

«ទៅដល់អូឡាំពិកហ្គេម បាន គឺត្រូវ មាន៧៥ប្រទេសឡើង។ អ៊ីចឹងយើង គៀកទៅដល់ ៧៥ប្រទេសហើយ។ ឲ្យតែបាន ៧៥ប្រទេសក្នុងពិភពលោក គាំទ្រគុនខ្មែរ ជាសមាជិកគុនខ្មែរ គឺយើង អាចដាក់ស្នើទៅអូឡាំពិកហ្គេម ដើម្បីឲ្យគេទទួលស្គាល់។ អ៊ីចឹងចាប់ពីឆ្នាំ ២០៣០ ទៅ យើង មានមហិច្ឆិតា ធ្វើឲ្យសមាជិករបស់យើង ឡើង ពី៧៥ ទៅ១០០ ប្រទេស។»។ មន្ដ្រីជាន់ខ្ពស់ NOCC រូបនេះ បានប្រាប់ដូច្នេះ។

លោក វ៉ាត់ ចំរើន ក៏បានអំពាវនាវ ផងដែរ ដើម្បីការជោគជ័យ ក្នុងការដាក់គុនខ្មែរ ជាកីឡាអូឡាំពិក លុះត្រា តែប្រជាពលរដ្ឋកម្ពុជាទាំងអស់ រាជរដ្ឋាភិបាល និងស្ថាប័ន ពាក់ព័ន្ធទាំងអស់ជួយជ្រោមជ្រែង ដើម្បីឧត្តមភាព នៃវិស័យកីឡាគុនខ្មែរ លើពិភពលោក៕