«យើងត្រូវរៀបផ្ទះយើងឱ្យស្អាតសិន ឱ្យមានលំដាប់លំដោយ ទើបធ្វើអ្វីចេញ(សម្រេច)»។ នេះជាការលើកឡើងរបស់ប្រមុខរដ្ឋាភិបាល ដែលជំរុញឱ្យមន្ត្រីទាំងអស់ យកចិត្តទុកដាក់បំពេញការងារតាមគោលនយោបាយ និងផែនការសកម្មភាព។
 

ផែនការ និងគោលនយោបាយទាំងនេះ គឺមានភាពប្រទាក់ក្រឡាគ្នា ជាអន្តរក្រសួង និងភាគីពាក់ព័ន្ធ។ ដូច្នេះសម្ដេច ហ៊ុន ម៉ាណែត ណែនាំឱ្យមន្ត្រីចេះសហការគ្នា អនុវត្តផែនការ ដោយមិនត្រូវមើលស្រាលការងារ និងប្រចាំគ្នា ដូចពាក្យចាស់ពោលថា «គ្នាច្រើន អន្សមខ្លោចនោះទេ»។
 

ដើម្បីសម្រេចគោលដៅរួមនេះ នាយករដ្ឋមន្រ្តី បានពន្យល់ដោយលើកជាឧទាហរណ៍ថា បើការងារនោះ ពាក់ព័ន្ធនឹងវិស័យកសិកម្ម គឺរដ្ឋមន្រ្តីកសិកម្ម ត្រូវដឹកនាំក្បាលម៉ាស៊ីនរៀបចំកិច្ចប្រជុំ ជាមួយភាគីពាក់ព័ន្ធដូចជា ក្រសួងធនធានទឹកនិងឧតុនិយម, ក្រសួងអភិវឌ្ឍន៍ជនបទជាដើម ក្នុងការពិភាក្សាគ្នារកចំណុចរួមមួយ ដាក់ចេញសកម្មភាព និងដំណោះស្រាយឱ្យចំគោលដៅ ទើបផែនការការងារមានប្រសិទ្ធភាព។
 

«គន្លឹះសំខាន់ យើងឱ្យកសិករគាត់បង្កើតសហគមន៍កសិកម្មទំនើប ដើម្បីឱ្យគាត់ចូលគ្នាជាធ្លុងមួយធ្វើការ ប៉ុន្តែស្ថាប័នរដ្ឋរបស់យើង អត់សហការគ្នា អត់និយាយជាមួយគ្នា អត់ធ្វើការជាមួយគ្នា ។ នេះជាបញ្ហា»។ សម្ដេច ហ៊ុន ម៉ាណែត បានបន្ថែម។
 

បើតាមប្រមុខរដ្ឋាភិបាល ការបំពេញការងារទៀតសោត ក៏មិនអាស្រ័យលើការចំណាយច្រើន ទើបមានប្រសិទ្ធភាពដែរ។ ត្រង់ចំណុចនេះ សម្ដេច បានរំឭកជាថ្មី ឱ្យមន្ត្រី ចេះប្រើប្រាស់ថវិកាតិច តែចំគោលដៅវិញ ។ លោកនាយករដ្ឋមន្រ្តី ក្រើនរំលឹកឱ្យមន្ត្រីឱ្យធ្វើការដោយចេញពីបេះដូង ។ ចំណែកមន្ត្រីដែលប្រឡងចូលក្របខណ្ឌកសិកម្ម ត្រូវមានឆន្ទៈពិតប្រាកដ ដោយមិនត្រូវយកតែក្របខណ្ឌ និងតួនាទីឡើយ ៕