លោក កន សុខកាយ បានបន្ថែមថា ការរៀបចំពិធីប្រណាំងទូកនេះ ដើម្បីដកស្រងបច្ចេកទេស តាមទំនៀមទំលាប់របស់អ្នកស្រុកល្វាឯម ដែលរស់នៅតាមដងទន្លេមេគង្គក្រោម។  អភិបាលស្រុកល្វាឯមរូបនេះ ប្រាប់កាន់សារព័ត៌មានថ្មីៗ ដូច្នេះថា៖«សម្រាប់ឆ្នាំនេះស្រុកល្វាឯមរបស់ខ្ញុំបានរៀបចំពិធីបុណ្យអុំទូក ប្រចាំឆ្នាំដែលអ្នកស្រុកធ្លាប់លេង។ បុណ្យអុំទូកនៅទីនេះគឺជាប្រពៃណីរបស់អ្នកទន្លេ និងដើម្បីជាការដកស្រងបច្ចេកទេសល្បឿនទូក ក្នុងការត្រៀមខ្លួនទៅប្រលងប្រណាំងនៅព្រះរាជពិធីបុណ្យអុំទូកថ្នាក់ជាតិ»។ 
 

មែនទែនទៅ អ្នកស្រុកល្វាឯម តែងតែរៀបចំពិធីប្រណាំងទូកនេះ តាំងពីសម័យសង្គមរាស្ត្រនិយមមកម្ល៉េះ។ ប៉ុន្តែក្រោយមកសកម្មភាពប្រណាំងទូក ក៏បានស្ងប់ស្ងាត់ទៅវិញ។ លោក កន សុខកាយ ដែលទើបឡើងកាន់តំណែងជាអភិបាលស្រុកល្វាឯម បាន៤ឆ្នាំមកនេះ ក៏ចាប់ផ្ដើមរៀបចំពិធីប្រណាំងទូកឡើងវិញ តាំងពីឆ្នាំ២០២០ គ្រាដែលផ្ទុះជំងឺកូវីដ-១៩ មក ដើម្បីរក្សាប្រពៃណីអ្នកស្រុកទន្លេ។
  

សម្រាប់ការប្រណាំងទូកនៅស្រុកល្វាឯមឆ្នាំនេះ នឹងប្រារព្ធធ្វើឡើងនៅថ្ងៃទី២២-២៣ វិច្ឆិកា ។ បើតាមអភិបាលស្រុកល្វាឯម ពិធីប្រណាំងទូកឆ្នាំនេះ នៅក្នុងភូមិទឹកឃ្លាំង ឃុំថ្មគរ ដែលជាទីតាំងភូមិសាស្ត្រថ្មីដ៏ល្អមួយ ស្ថិតចំកណ្តាលស្រុកល្វាឯមតែម្តង។ ដោយឡែកកាលពីឆ្នាំ ២០២០ ដល់ ២០២២ លោក កន សុខកាយ បានរៀបចំកម្មវិធីប្រណាំងទូក នៅក្នុងឃុំពាមឧកញ៉ាអុង ដែលបច្ចុប្បន្នបានកាត់ចូលក្រោមរដ្ឋបាលក្រុងអរិយក្សត្រ។

 

បើតាមការអះអាងរបស់លោក កន សុខកាយ ទូកខ្នាតអន្តរជាតិចំនួន ៣០ទូក និងទូក ង ប្រពៃណីខ្នាតវែង ២០ទូក នឹងត្រៀមខ្លួនប្រណាំងនៅក្នុងស្រុកល្វាឯម។ ដោយឡែកសម្រាប់ព្រះរាជពិធីបុណ្យអុំទូក នៅមុខព្រះបរមរាជវាំង ទូកពីស្រុកល្វាឯម នឹងចូលរួមច្រើនជាងគេ ក្នុងចំណោមស្រុកទាំងអស់ នៅក្នុងខេត្តកណ្តាល៕