RFI
អន្តរជាតិ
នៅកូរ៉េខាងត្បូង មានការងារជិត ៤លានការងារកំពុងប្រឈមនឹងការជំនួសដោយបញ្ញាសិប្បនិម្មិត។ © AP
×![]()
ដោយ៖ គួច គន្ធារ៉ា/RFI
នៅកូរ៉េខាងត្បូង ការសិក្សាថ្មីមួយធ្វើឡើងដោយធនាគារកណ្តាលចុះផ្សាយក្នុងថ្ងៃព្រហស្បតិ៍ ទី១៦ វិច្ឆិកាបានឲ្យដឹងថា មានការងារជិត ៤លានការងារកំពុងប្រឈមនឹងហានិភ័យនៃការជំនួសដោយបញ្ញាសិប្បនិម្មិតក្នុងរយៈពេល ២ទសវត្សរ៍ខាងមុខ។ តែទន្ទឹមនឹងជំនួសការងារដែលមានស្រាប់ បច្ចេកវិទ្យាសិប្បនិម្មិតក៏ចូលរួមបង្កើតការងារថ្មីដែរ។
ការអភិវឌ្ឍន៍យ៉ាងលឿនយ៉ាងឆាប់រហ័សរបស់បច្ចេកវិទ្យាបញ្ញាសិប្បនិមិត្មបានបង្កឲ្យមានក្តីបារម្ភនៅទូទាំងពិភពលោក។ បារម្ភព្រោះបច្ចេកវិទ្យាថ្មីមួយនេះអាចបំផ្លាញការងារ ឬនិយាយបែបម្យ៉ាងទៀត គឺចូលទៅជំនួសការងារដែលមនុស្សកំពុងធ្វើសព្វថ្ងៃ អាចធ្វើឲ្យមនុស្សបាត់បង់ការគ្រប់គ្រងលើប្រព័ន្ធដែលមនុស្សបានបង្កើតឡើង ឬក៏អាចចូលវាយប្រហារតាមអ៊ីនធឺនែត។ កូរ៉េខាងត្បូងជាប្រទេសមួយក្នុងចំណោមប្រទេសផ្សេងទៀតដែលកំពុងប្រឈមនឹងការវាយលុកដោយបច្ចេកវិទ្យាបញ្ញាសិប្បនិម្មិត។
ការសិក្សាថ្មីមួយរបស់ធនាគារកណ្តាលកូរ៉េខាងត្បូងបានប្រមើលមើលថា ប្រឈមនឹងភាពជឿនលឿននៃបច្ចេកវិទ្យាបញ្ញាសិប្បនិម្មិត មានការងារប្រមាណជា ៣លាន ៩សែនការងារនៅកូរ៉េខាងត្បូងនឹងទទួលការគំរាមកំហែង ក្នុងនោះ ការងារជាមេធាវី ការងារជាគណនេយ្យករ និងការងារជាគីមីវិទូស្ថិតក្នុងចំណោមការងារដែលទទួលការគំរាមកំហែងខ្លាំងជាងគេ។ បន្ទាប់មក អ្នកជំនាញដែលមានប្រាក់ខែខ្ពស់ និងមានការរៀនសូត្រខ្ពស់ជាអ្នកប្រឈមនឹងការបាត់បង់ការងារខ្លាំងជាងគេដោយត្រូវជំនួសដោយបញ្ញាសិប្បនិម្មិត។
ដោយឡែក ក្រុមមនុស្សដែលមិនសូវរងផលប៉ះពាល់ខ្លាំងដោយភាពរីកចម្រើននៃបច្ចេកវិទ្យាបញ្ញាសិប្បនិម្មិតគឺក្រុមមនុស្សដែលធ្វើការងារក្នុងវិស័យសាសនា វិស័យអប់រំ និងនៅតាមភោជនីយដ្ឋាន។ តាមការសិក្សារបស់ធនាគារកណ្តាលកូរ៉េខាងត្បូងដដែល ទន្ទឹមនឹងគំរាមកំហែងលើការងារដែលមានស្រាប់ បញ្ញាសិប្បនិម្មិតក៏បានចូលរួមបង្កើតឱកាសការងារថ្មីដែរ ពិសេសការងារសម្រាប់ក្រុមវិស្វករដែលអភិវឌ្ឍ និងថែទាំប្រព័ន្ធបញ្ញាសិប្បនិម្មិត រួមទាំងការងារនៅក្នុងវិស័យ Start-ups ដែលជាប់ពាក់ព័ន្ធនឹងបញ្ញាសិប្បនិម្មិត៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
