ស្ថាបនិកទូក ង រូបនេះ ក៏បានលើកឡើងអំពីបញ្ហានៃការហ្វឹកហាត់នេះ ថា ការហាត់អុំទូក ក៏ត្រូវមានលក្ខខណ្ឌ និងសមស្របតាមកម្រិតកម្លាំងដែរ ពោលគឺមិនអាចហ្វឹកហាត់លើកម្រិតសមត្ថភាព ដែលអាចធ្វើឱ្យកីឡាករថមថយកម្លាំងពេលប្រណាំង និងជួនកាលកីឡាករអាចនឹងភ្លេចក្បាច់អុំទូក អំឡុងពេលប្រកួតជាដើម។

 

ក្រៅពីការហ្វឹកហាត់ហើយ វាក៏ទាមទារឱ្យមេដឹកនាំ ដែលជាអ្នកបញ្ជាក្បាលទូក និងកន្សៃទូក មានគុណធម៌ និងព្រហ្មវិហារធម៌ផងដែរ។ អ្នកបញ្ជាក្បាលទូក និងកន្សៃ ត្រូវតែជាមនុស្សមានអានុភាព ក្នុងការប្រើប្រាស់ពាក្យសម្តី ដែលធ្វើឱ្យក្រុមកីឡាករគោរព ទើបអាចបញ្ជាទៅកាន់កីឡាករចំណុះ ឱ្យអុំទូកបានល្អ។ នេះបើតាមលោក សុខហៀង។

 

អ្នកដឹកនាំក្រុមទូក ង សារាយតេជោសែនជ័យ ស្ថិតក្នុងវត្តពិជ័យរង្សី ខេត្តកណ្ដាលរូបនេះ បានបន្ថែមថា អ្នកកាន់ក្បាលទូក កីឡាករអុំទូក អ្នកកាន់ផ្នែកកន្សៃទូក ទាមទារឱ្យមានភាពសាមគ្គីគ្នា ជួយគ្នាទៅវិញទៅមក ទើបអាចសម្រេចគោលដៅរួម និងអាចយកឈ្នះលើការប្រណាំងបាន។ ទូក ង សារាយតេជោសែនជ័យ មានប្រវែងជាង ៣៣ម៉ែត្រ និងមានចំណុះអុំទូកប្រមាណ ៧៥នាក់ ៕