អន្តរជាតិ
លោក កៅ គឹមហួន៖ ការដាក់ចេញរូបិយប័ណ្ណអាស៊ាន មិនអាចសម្រេចបានឡើយ លោក កៅ គឹមហួន អគ្គលេខាធិការអាស៊ាន (ឆ្វេង) ជាមួយលោក ពុយ គា ប្រធានក្លិបអ្នកកាសែតកម្ពុជា នៅថ្ងៃទី២៥ ខែវិច្ឆិកា។ រូបភាពក្លិបអ្នកកាសែតកម្ពុជា
× ប្រមុខអាស៊ាន លោក កៅ គឹមហួន នៅថ្ងៃទី២៥ ខែវិច្ឆិកា បានយល់ឃើញថា រូបិយប័ណ្ណរួមរបស់អាស៊ានទំនងជាមិនអាចដាក់ចេញរួចឡើយ ដោយសារតែពេលបច្ចុប្បន្ន ប្រទេសទាំងអស់ បានវិវដ្តទៅរកការទូទាត់តាមប្រព័ន្ធឌីជីថល។
រូបិយប័ណ្ណអាស៊ាន ត្រូវបានអ្នកជំនាញ ឬអ្នកសេដ្ឋកិច្ចមួយចំនួនជជែកជាច្រើនឆ្នាំមកហើយ ខណៈមនុស្សមួយចំនួនចង់ឱ្យអាស៊ានមានរូបិយប័ណ្ណរួមថែមទៀត ដើម្បីងាយស្រួលក្នុងការទូទាត់ទំនិញឆ្លងព្រំដែន។ យ៉ាងណាមិញ លោក កៅ គឹមហួន អគ្គលេខាធិការអាស៊ាន បានកត់សម្គាល់ថា រូបិយប័ណ្ណ នឹងមិនអាចដាក់ចេញបានទេ។
«នៅក្នុងក្របខណ្ឌអាស៊ាននេះ តាមការប្រមើលរបស់ខ្ញុំ គឺថាពេលនេះ មិនអាចចេញរួចទេ»។ ប្រមុខអាស៊ាន បានផ្តល់ចម្លើយបែបនេះទៅអ្នកសារព័ត៌មាន ដែលបានសួរពាក់ព័ន្ធនឹងលទ្ធភាពលើការដាក់ចេញរូបិយប័ណ្ណរួមរបស់អាស៊ាន។
បើតាមលោក កៅ គឹមហួន ពេលនេះអាស៊ាន បានឈានចូលដល់សម័យថ្មីមួយទៀតហើយ ដោយសមាជិកទាំងអស់ទូទាត់ទំនិញមិនប្រើប្រាស់សាច់ប្រាក់។ ទន្ទឹមនេះ ប្រមុខអាស៊ាន បានបញ្ជាក់ថា ប្រធានបទរូបិយប័ណ្ណអាស៊ាននេះ មិនត្រូវបានជជែកជាផ្លូវការនៅក្នុងអាស៊ាននោះទេ។
ទន្ទឹមនេះ អគ្គលេខាធិការអាស៊ាន បានប៉ាន់ប្រមាណថា នៅថ្ងៃខាងមុខ ប្រជាជន ជាពិសេសភ្ញៀវទេសចរអាស៊ានអាចនឹងប្រើប្រាស់កាបូបលុយអេឡិចត្រូនិច (E-wallet) ដើម្បីទូទាត់ទំនិញនៅក្នុងបណ្តាប្រទេសសមាជិកអាស៊ានទាំងអស់៕
© រក្សាសិទ្ធិដោយ thmeythmey.com