ជាតិ
អ្នកចម្រៀងភ្លេងការដ៏ពីរោះ ពេជ្រ រដ្ឋា ទទួលមរណភាពដោយគ្រោះថ្នាក់ចរាចរណ៍
× ភ្នំពេញ៖ លោក ពេជ្រ រដ្ឋា ដែលត្រូវបានមហាជនស្គាល់សុះសាយ ក្រោយសម្ដេចនាយករដ្ឋមន្ត្រី ហ៊ុន សែន សរសើរពីទឹកដមសំឡេង បានទទួលមរណភាព ដោយសារគ្រោះថ្នាក់ចរាចរណ៍ កាលពីយប់ម៉ោងជាង១២រំលងអធ្រាត្រ ឈានចូលថ្ងៃទី២៩នេះ។ រហូតមកដល់ពេលនេះ សពកំពុងធ្វើកោសល្យវិច្ច័យ ដើម្បីរកមូលហេតុនៃគ្រោះថ្នាក់។
លោក លី សុខរិន ត្រូវជាបងថ្លៃរបស់សព បានប្រាប់សារព័ត៌មានថ្មីៗថា លោក ពេជ្រ រដ្ឋា គ្រោះថ្នាក់ចរាចរណ៍ ក្រោយពេលលោកចេញពីពិធីមង្គលគេ។ លោកធ្វើដំណើរកណ្ដាលអធ្រាត្រតែម្នាក់ឯងប៉ុណ្ណោះ។
«ឥឡូវនេះប៉ុលិស កំពុងធ្វើកោសល្យវិច្ច័យ។ ប៉ូលិសបានដឹងពីគ្រោះថ្នាក់នោះ ហើយគាត់មកប្រាប់គ្រួសារ។ គាត់មកពីច្រៀងការគេ។ គ្រោះថ្នាក់ហ្នឹងនៅជិតផ្ទះទេ នៅតែប្រហែល៤០០ម៉ែត្រពីផ្ទះទេ។ គាត់ជិះម៉ូតូមកតែម្នាក់ឯងទេ។
នេះជាការបញ្ជាក់បន្ថែមរបស់លោក លី សុខរិន។ សពនឹងធ្វើពិធីបូជា នៅថ្ងៃទី៣០វិច្ឆិកា នាម៉ោង៧ល្ងាច នៅគេហដ្ឋានសព ក្នុងភូមិអូហេង ឃុំសំរោង ស្រុកភ្នំក្រវាញ ខេត្តពោធិ៍សាត់។
មុនជួបគ្រោះថ្នាក់នេះ លោក ពេជ្យ រដ្ឋា ធ្លាប់បានប្រាប់អ្នកសារព័ត៌មាន កន្លងមកថា ព្រោះតែជីវភាពគ្រួសារក្រីក្រ លោកបានឈប់រៀនត្រឹមថ្នាក់ទី១០ ហើយទៅធ្វើការនៅប្រទេសថៃជាកម្មកររោងចក្រ អស់រយៈពេល៥ឆ្នាំ ទើបលោកត្រឡប់មកវិញ នៅឆ្នាំ២០១៦។
ក្រោយមកដល់ប្រទេសកំណើតវិញ លោកបានច្រៀងចម្រៀងបង្ហោះនៅតាមហ្វេសប៊ុក ហើយក្រោយមកក៏មានថៅកែតន្ត្រីជាច្រើនរូប បានហៅលោកឱ្យទៅច្រៀងនៅតាមឆាក និងតាមអកកាដង់។ ជាមួយគ្នានោះលោកក៏បានច្រៀងចម្រៀងបង្ហោះតាមយូធូបផងដែរ។ បទចម្រៀងដែលលោកបានផុសក្នុងយូធូប បានជាង១០០បទ ភាគច្រើន គឺជាបទភ្លេងការ។
ច្រៀងបទភ្លេងការនេះហើយ ដែលធ្វើឱ្យសម្ដេច ហ៊ុន សែន ពេញចិត្តទឹកដមសំឡេងរបស់លោកខ្លាំង។
លោក ពេជ្រ រដ្ឋា ត្រូវបានសម្ដេចនាយករដ្ឋមន្ត្រី ហ៊ុន សែន ប្រកាសឱ្យច្រៀងក្នុងកម្មវិធីធំៗ កាលពីចុងខែកុម្ភៈកន្លងទៅថ្មីៗនេះ។ ចាប់តាំងពីពេលនោះមក កេរ្ដិ៍ឈ្មោះរបស់លោក ត្រូវបានគេស្គាល់ច្រើន ហើយទីផ្សារការងារក៏មមាញឹកច្រើន ទាំងក្នុងនិងក្រៅប្រទេស៕
Tag:
សិល្បៈ
មរណភាព
អ្នកចម្រៀង
© រក្សាសិទ្ធិដោយ thmeythmey.com