បើតាមការផ្សាយរបស់កាសែត Marca របស់អេស្ប៉ាញ Ronaldo ចង់បានអាជ្ញាកណ្តាលសញ្ជាតិកូឡុំប៊ីលោក Wilmar Roldan ដើម្បីកាន់កាប់ការប្រកួតជំនួបដ៏ធំរបស់ក្រុមទាំង ២ ស្ថិតក្នុងក្របខណ្ឌ Saudi Pro League។ Al Nassr ប៉ះ Al Hilal ដោយការប្រកួតត្រូវធ្វើឡើងនៅវេលាម៉ោង ១យប់ ថ្ងៃទី២ ខែធ្នូ។
 

ចាប់តាំងពីមកដល់អារ៉ាប៊ីសាអូឌីត​ កីឡាករវ័យ ៣៨ឆ្នាំ បានបង្ហាញការគ្រប់គ្រងបាល់ទាត់លីគកំពូលរបស់ប្រទេសស្ថិតក្នុងតំបន់មជ្ឈិមបូពា៍មួយនេះ ដោយចាប់ផ្តើមធ្វើទំនើបកម្មរបស់ខ្លួន សមស្របទៅតាមការប្រកួតលីគកំពូលៗលើពិភពលោក។ Saudi Pro League បាននាំមកនៅបរិក្ខារល្អៗក្នុងការកាត់សេចក្តីការប្រកួត ប្រព័ន្ធត្រួតពិនិត្យរបស់អាជ្ញាកណ្តាលផ្សេងៗ ។
មិនត្រឹមតែប៉ុណ្ណោះក៏មានអាជ្ញាកណ្តាលល្បីៗជាច្រើនបានបំពេញការងារក្នុងលីគ។
 

ជំនួបរវាង Al Nassr ទល់នឹងក្រុមម្ចាស់ផ្ទះ Al Hilal ជាជំនួបដែលត្រូវប្រឈមមុខគ្នាក្នុងការដណ្តើមតំណែង ជាក្រុមកំពូលតារាង។ ចំពោះការប្រកួតដ៏សំខាន់ Ronaldo ចង់បានអាជ្ញាកណ្តាលមានគុណភាពបំផុត សម្រាប់ទទួលបន្ទុកកាត់សេចក្តីការប្រកួតដ៏សំខាន់។ 
 

លោក Wilmar Roldan អាជ្ញាកណ្តាលសញ្ជាតិកូឡុំប៊ី ធ្លាប់បានកាត់សេចក្តីការប្រកួតរវាងក្រុម Al Nassr ទល់នឹងក្រុម Al Raed កាលពីខែកញ្ញាកន្លងទៅ ដោយកាលនោះក្រុម Al Nassr យកឈ្នះការប្រកួតលទ្ធផល ៣-១។ ប្រកួតឈ្នះលើ Al Raed ខ្សែប្រយុទ្ធវ័យ ៣៨ឆ្នាំរូបនេះ ក៏រកបានគ្រាប់បាល់ក្នុងការប្រកួតនោះ។
 

លោក Roldan ជាអាជ្ញាកណ្តាលមួយរូបដែលជាប់ចំណាត់ថ្នាក់លេខ ៧ ជាអាជ្ញាកណ្តាលកម្រិតពិភពលោកក្នុងឆ្នាំ ២០១៥ ដោយលោកមានបទពិសោធន៍កាត់សេចក្តីក្នុងការប្រកួតកម្រិតខ្ពស់ជាច្រើនដូចជា World Cup ឆ្នាំ ២០១៤ និង ២០១៨។ មិនត្រឹមតែប៉ុណ្ណោះអាជ្ញាកណ្តាលដដែលរូបនេះក៏បានកាត់សេចក្តីព្រឹត្តិការណ៍អូឡាំពិកឆ្នាំ ២០១២ និង FIFA Club World Cup ក្នុងឆ្នាំ ២០១៥។
 

បច្ចុប្បន្នក្របខណ្ឌ Saudi Pro League មានអាជ្ញាកណ្តាលកម្រិតខ្ពស់ជាច្រើន សម្រាប់កាត់សេចក្តីការប្រកួត ចាប់តាំងពីមានវត្តមានរបស់ Ronaldo មកកាន់តាំងពីខែមករា។ អាជ្ញាកណ្តាលល្បីឈ្មោះទាំងនោះមាន Michael Oliver, Daniele Orsato និង Mateu Lahoz ដែលជាអាជ្ញាកណ្តាលមានបទពិសោធន៍នៅការប្រកួតក្របខណ្ឌ UEFA Champions League៕