ភ្នំពេញ៖ សៀវភៅធ្វើម្ហូបក្នុងព្រះបរមរាជវាំងឈ្មោះ”សោយ” របស់អ្នកនាង រស់ រតនៈ ដែលគេស្គាល់ជាទូទៅថា Chef Nak បានឈ្នះពាន “សៀវភៅធ្វើម្ហូបល្អបំផុត នៅលើពិភពលោក” ពីពានរង្វាន់ Gourmand Award ពីទីក្រុងរីយ៉ាដ នៃប្រទេស អារ៉ាប៊ីសាអូឌីត។ “សោយ” បានយកឈ្នះប្រទេសជាង១០០ ដែលបានយកសៀវភៅមុខម្ហូបរបស់ខ្លួន ទៅដាក់ប្រកួត។
នេះគឺជាមោទកភាពមួយ ។ អ្នកនាង រស់ រតនៈ បានប្រឹងប្រែងអស់៤ឆ្នាំហើយ ដើម្បីបង្ហាញឱ្យពិភពលោក បានស្គាល់ពីវប្បធម៌ខ្មែរ តាមរយៈម្ហូបអាហារ និងចង់ឱ្យពិភពលោកទទួលស្គាល់ ពីគុណភាពម្ហូបខ្មែរផងដែរ។
រូបពីហ្វេសប៊ុក Chef Nak
សៀវភៅដែលចំណាយពេលចងក្រងរយៈពេល៤ឆ្នាំនេះ បានយកឈ្នះសៀវភៅមុខម្ហូបមកពី ប្រទេសជាង១០០ទៅទូទាំងពិភពលោក ក្រោយចម្រាញ់ចេញពី២០៥ប្រទេស។ ពានរង្វាន់នេះ អ្នកនាង រស់ រតនៈ បានទទួលនៅថ្ងៃទី២៨ ខែវិច្ឆិកា ឆ្នាំ២០២៣ នៅទីក្រុង រីយ៉ាដ ប្រទេស អារ៉ាប៊ីសាអូឌីត។ “សោយ” ដែលបានបោះពុម្ភក្នុងខែឧសភា ឆ្នាំ២០២៣នេះ មានមុខម្ហូបចំនួន៦០មុខ ដែលសុទ្ធសឹងជាមុខម្ហូប ត្រូវបានចម្អិនក្នុងព្រះបរមរាជវាំង ចន្លោះឆ្នាំ១៩៥០ហើយនិងឆ្នាំ១៩៧០។
សៀវភៅនេះ បានបង្ហាញអំពីគ្រឿងផ្សំនិងគ្រឿងទេស ដ៏សម្បូរបែប និងប្លែកៗ ពិសេសគ្រឿងផ្សំមួយចំនួន គឺជាឱសថព្យាបាលជំងឺ ដែលប្រជាជនខ្មែរ ប្រើប្រាស់ដល់សព្វថ្ងៃ។ សៀវភៅនេះ ក៏រួមបញ្ចូលសាច់រឿងជាច្រើន អំពីក្រុមគ្រួសារព្រះរាជវង្សផងដែរ។ ចំណែកឯការជ្រើសរើសមុខម្ហូប ដាក់ក្នុងសៀវភៅនេះវិញ បានសម្រិតសម្រាំងយ៉ាងខ្លាំង។ មុខម្ហូបក្នុងសៀវភៅ មានម្ហូបទឹក ចៀន បំពង ញាំ នំបញ្ចុក ស៊ុប និងបង្អែមជាដើម។
Chef Nak ពន្យល់បន្ថែម៖«ការប្រើប្រាស់គ្រឿងផ្សំក្នុងសៀវភៅនេះ គឺអស្ចារ្យណាស់។ មានការប្រើប្រាស់ផ្កា ជាគ្រឿងផ្សំក្នុងការធ្វើម្ហូប ដ៏ដូចជាការបន្ថែមរសជាតិ ហើយនឹងក្លិន។ ឧទាហរណ៍ថា នៅក្នុងបង្អែម ព្រះអង្គមិនប្រើប្រាស់ទឹកធម្មតា ដើម្បីលាយម្សៅទេ ប៉ុន្តែលោកយកផ្កាទៅចម្រាញ់ឱ្យទៅជាទឹក ដើម្បីយកទៅលាយជាមួយម្សៅ»។
រូបពីហ្វេសប៊ុក Chef Nak
អ្នកនាង រតនៈ ថាខ្លួនធ្វើសៀវភៅនេះឡើង ដើម្បីឧទ្ធិសទៅដល់ ព្រះរាជកន្និដ្ឋា នរោត្តមរស្មីសោភ័ណ ដែលព្រះអង្គបានបូជាកម្លាំងព្រះកាយ ព្រះទ័យ ក្នុងការលើកតម្កើងនិងលើកកម្ពស់ ការសិក្សានិងការអប់រំរបស់ស្ត្រី ក៏ដូចជាការលើកស្ទួយម្ហូបខ្មែរ។ បន្ថែមពីនោះ ចុងភៅដែលមានវ័យ៣៩ឆ្នាំរូបនេះ រៀបរៀងសៀវភៅមុខម្ហូបនេះឡើង ក៏ដើម្បីរក្សាវប្បធម៌ខ្មែរ រសជាតិម្ហូបខ្មែរ ហើយនឹងសាច់រឿងដែលពាក់ព័ន្ធនឹងម្ហូបខ្មែរផងដែរ។
តាមរយៈសៀវភៅមុខម្ហូប”សោយ” អ្នកនាង រតនៈ ចង់ឱ្យពិភពលោកទទួលស្គាល់ និងមើលឃើញអំពីគុណភាពម្ហូបខ្មែរ។ នារីសម្បុរស ដែលមុខមានប្រជាប្រិយរូបនេះ ចង់ប្រើប្រាស់ម្ហូបខ្មែរ ជាអំណាចដ៏ទន់ភ្លន់មួយ ដើម្បីប្រាប់រឿងរ៉ាវរបស់ប្រជាជនកម្ពុជា ទៅកាន់ពិភពលោក។ ហើយតាមរយៈសៀវភៅនេះ អ្នកនាងសង្ឃឹមថាពិភពលោក ចាប់ផ្ដើមឃើញប្រទេសកម្ពុជា ជាប្រទេសអស្ចារ្យ និងមានវប្បធម៌សម្បូរបែប ដោយអ្នកនាងមិនចង់ឱ្យ បរទេសស្គាល់កម្ពុជាតែពីសង្គ្រាម ឬតែពីអង្គរវត្តឡើយ។
«ពួកយើងបានប្រឹងអស់លទ្ធភាព ដើម្បីឱ្យសៀវភៅនេះមានគុណភាពខ្ពស់បំផុត ដោយសារយើងចង់ប្រើប្រាស់វា ក្នុងការផ្សព្វផ្សាយពីកម្ពុជា»។ នេះជាការបញ្ជាក់បន្ថែមពី Chef Nak។
រូបពីហ្វេសប៊ុក Chef Nak
ទោះជាយ៉ាងណា អ្នកនាង រស់ រតនៈ ថាដោយសារតែសង្គ្រាមប្រល័យពូជសាស្ត្រ បណ្ដាលឱ្យប្រជាជនខ្មែរ ឈប់ ឬមិនសូវប្រើគ្រឿងផ្សំមួយចំនួន ក្នុងម្ហូបអាហាររបស់ខ្លួន។ អ្នកនាងថា ពីដើមប្រជាជនខ្មែរ និយមប្រើប្រាស់ខ្ញីខ្មៅ និងដើមក្រវាញដើម្បីធ្វើជាម្ហូប។ ប៉ុន្តែបច្ចុប្បន្ន គ្រឿងផ្សំទាំងនេះ ប្រជាជនខ្មែរ មិនសូវយកទៅធ្វើម្ហូបឡើយ តែនៅប្រើសម្រាប់ធ្វើជាឱសថ។
ដើម្បីផ្សារភ្ជាប់ឱ្យមានការប្រើប្រាស់គ្រឿងផ្សំទាំងនោះក្នុងម្ហូបឡើងវិញ សៀវភៅធ្វើម្ហូប “សោយ” បានរំលេចគ្រឿងផ្សំទាំងនោះ។
«បច្ចុប្បន្នប្រជាជនខ្មែរ ប្រើគ្រឿងផ្សំទាំងនោះ ដើម្បីព្យាបាលជំងឺផ្សេងៗ ប៉ុន្តែពុំបានដឹងថាគ្រឿងផ្សំទាំងនោះ អាចយកធ្វើជាគ្រឿងផ្សំសម្រាប់ម្ហូបអាហារឡើយ។ ពេលនេះ យើងស្រាវជ្រាវសម្រាប់ធ្វើមុខម្ហូបផង និងសម្រាប់ថ្នាំព្យាបាលរោគផង»។ នេះជាការអះអាងរបស់អ្នកនាង រតនៈ។
ទម្រាំបានសៀវភៅមួយក្បាលនេះ ចុងភៅ នៈ ថាមានការលំបាកច្រើន។ ព្រោះឯកសារជាច្រើនបានបាត់បង់ក្នុងអំឡុងពេលសង្គ្រាម ដូច្នេះនៅសល់ឯកសារតិចតួចប៉ុណ្ណោះ ដែលអាចស្រាវជ្រាវបាន។ បន្ថែមលើឯកសារជាក្រដាស អ្នកនាងបានទៅជួបសួរមនុស្សមួយចំនួន ដែលធ្លាប់បានចូលរួមធ្វើម្អូប និងធ្លាប់បានទទួលទាន ម្ហូបអាហារក្នុងព្រះបរមរាជវាំង។
រូបពីហ្វេសប៊ុក Chef Nak
ទីមួយលោក ឯកអគ្គរាជទូត ជូលីអូ ដែលលោកបានសរសេរសៀវភៅជាច្រើន ទាក់ទងជាមួយនឹងព្រះករុណាព្រះបាទសម្ដេចព្រះ នរោត្តម សីហនុ (ព្រះបរមរតនកោដ្ឋ) និងសម្ដេចព្រះរាម បុប្ផាទេវី។ បន្ថែមពីនោះ Chef Nak បានសិក្សាស្វែងយល់ពីព្រះអង្គម្ចាស់ក្សត្រី នរោត្តម ម៉ារី ដែលព្រះអង្គមានបទពិសោធក្នុងការចម្អិនម្ហូប នៅក្នុងព្រះបរមរាជវាំង ដើម្បីថ្វាយព្រះរាជបិតាក្មេក គឺព្រះបរមរតនកោដ្ឋ។ និងបានសួរព្រះអង្គម្ចាស់ ស៊ីសុវត្ថិតេសូ ផងដែរ។ លើសពីនោះ អ្នកនាង នៈ បានចុះទៅទីតាំងផ្សេងៗគ្នាជាច្រើន ដើម្បីសិក្សាស្វែងយល់ឱ្យបានស៊ីជម្រៅ អំពីម្ហូបអាហារនីមួយៗ ដែលត្រូវជ្រើសដាក់ក្នុងសៀវភៅ “សោយ”។
Chef Nak ថាម្ហូបខ្មែរគឺធំទូលំទូលាយ និងមានភាពចម្រុះច្រើន ដូច្នេះនៅមានអ្វីៗជាច្រើនទៀត ដែលអ្នកនាងត្រូវធ្វើ ដើម្បីផ្សព្វផ្សាយពីម្ហូបខ្មែរ និងពីកម្ពុជា។ អ្នកនាងថា សៀវភៅមុខម្ហូបគ្រាន់តែជាផ្នែកមួយ ក្នុងចំណោមអ្វីដែលអ្នកនាងបានធ្វើជាច្រើនទៀត ដើម្បីចងក្រងទុកជាឯកសារផង ដើម្បីបង្កើតជាប្រវត្តិសាស្ត្រផង និងដើម្បីផ្សព្វផ្សាយពីម្ហូបខ្មែរផង។
អ្វីដែលនារីរាងតូចស្ដើង រតនៈ បានធ្វើកន្លងមក គឺអ្នកនាងបានធ្វើដំណើរ ទៅកាន់ប្រទេសមួយចំនួន ដូចជាប្រទេសថៃ អាម៉េរិក ម៉ាឡេស៊ី សិង្ហបុរី ឥណ្ឌូណេស៊ី និងអារ៉ាប៊ីសាអូឌីតជាដើម ដើម្បីផ្សព្វផ្សាយអំពីម្ហូបខ្មែរ។ ក្នុងឱកាសផ្សេងៗ អ្នកនាងបានធ្វើម្ហូប និងជជែកអំពីម្ហូប ដើម្បីឱ្យជាតិដទៃមានឱកាសភ្លក់ និងស្ដាប់សាច់រឿងពីកម្ពុជ។ ការណ៍នេះធ្វើឡើង ដើម្បីទាក់ទាញជនបរទេស ឱ្យយល់ដឹងអំពីប្រទេសខ្មែរ និងដើម្បីឱ្យពួកគេចង់មកលេងកម្ពុជា។ ក្រៅពីនោះ Chef Nak បានធ្វើសកម្មភាពជាច្រើនទៀត ក្នុងការផ្សព្វផ្សាយពីម្ហូបខ្មែរ និងពីកម្ពុជា។
រូបពីហ្វេសប៊ុក Chef Nak
សូមបញ្ជាក់ថា កម្មវិធីប្រកួតពានរង្វាន់ Gourmand Award ធ្វើជាប្រចាំឆ្នាំ ដោយធ្វើដំណើរទៅតាមប្រទេសផ្សេងៗ ហើយឆ្នាំនេះជាឆ្នាំទី២៩ហើយ។ ឆ្នាំដំបូងពានរង្វាន់នេះ ធ្វើនៅប្រទេសបារាំង។ ហើយឆ្នាំនេះធ្វើនៅក្នុងប្រទេស Saudi Arabia នៃទីក្រុង Riyadh។ ឆ្នាំនេះមានប្រទេស២០៥ ដាក់សៀវភៅធ្វើម្ហូបរបស់ខ្លួនចូលរួមប្រកួត ហើយមានតែជាង១០០ប្រទេសប៉ុណ្ណោះ ដែលត្រូវបានគណៈកម្មការ ជ្រើសរើស ដើម្បីដាក់ពិន្ទុលើផ្នែកផ្សេងៗគ្នា៕