ជាតិ
ការប្រកួតទាញព្រ័ត្រ ដណ្ដើមជ័យលាភី ដែលរៀបចំដោយសហព័ន្ធកីឡាទាញព្រ័ត្រ កន្លងមក។
×![]()
ដោយ: សារព័ត៌មានថ្មីៗ
ថ្ងៃនេះ ជាខួប៨ឆ្នាំហើយ ដែល «ទាញព្រ័ត្រ» ចូលក្នុងបញ្ជីយូណេស្កូ។ «ទាញព្រ័ត្រ» (Tug-of-War) ដែលជាប្រភេទកីឡា និងល្បែងចម្រុះជាតិសាសន៍ត្រូវបានចុះទៅក្នុងបញ្ជីបេតិកភណ្ឌវប្បធម៌អរូបីក្រោមឈ្មោះ «Tugging Rituals and Games» នាកិច្ចប្រជុំលើកទី១០នៃគណៈកម្មាធិការអន្តររដ្ឋាភិបាលសម្រាប់ថែរក្សាបេតិកភណ្ឌវប្បធម៌អរូបីនៅទីក្រុង Windhoek ប្រទេសណាមីប៊ី កាលពីថ្ងៃទី២ ខែធ្នូ ឆ្នាំ២០១៥ ។
ការចុះបញ្ជីល្បែង «ទាញព្រ័ត្រ» ចូលទៅក្នុងបញ្ជីបេតិកភណ្ឌពិភពលោកនេះ កើតចេញពីការប្រឹងប្រែងរួមគ្នា របស់កម្ពុជា ហ្វីលីពីន កូរ៉េខាងត្បូង និងវៀតណាម។ សម្រាប់កម្ពុជា ទាញព្រ័ត្រ គឺជាល្បែងដ៏ពេញនិយម ដែលមាននៅក្នុងរឿងព្រេង និងនៅតាមជញ្ជាំងប្រាសាទ រួមទាំងយក្សទាញព្រ័ត្រនៅច្រកចូលអង្គរធំ។
ល្បែងទាញព្រ័ត្រ ជាប្រភេទល្បែងមួយបែប ដែលយុវជនខ្មែទាំងបុរស ទាំងស្ដ្រី តែងលេងកំសាន្ដសប្បាយ ។ល្បែងទាញព្រ័ត្រ គេលេងដោយប្រើកម្លាំងកាយ ហើយគេលេងតែ ក្នុងរដូវចូលឆ្នាំខ្មែរ ប៉ុណ្ណោះ។ ល្បែងនេះ បង្ហាញការរួបរួមគ្នាជាធ្លុងមួយ ដើម្បីយកឈ្នះគូបដិបក្ខ។
សមាសភាពនៃអ្នកចូលរួមលេងល្បែងទាញព្រ័ត្រ ចែកចេញជា២ក្រុម។ មុនដំបូងគេជ្រើសរើសបុរសម្នាក់ និងស្រី្តម្នាក់ ដែលមានមាឌធំមាំ ឲ្យធ្វើជាអ្នកឈរកាន់ចុងព្រ័ត្រ។ បុរសនិងស្ត្រីនោះ ត្រូវកាន់ ចុងម្ខាងម្នាក់ ហើយឲ្យប្រុសម្នាក់និងស្រីម្នាក់ទៀត ដែលមានមាឌធំ ឈរកណ្ដាលព្រ័ត្រ ត្រង់កន្លែងដែលពួកទាំងពីរឈរ សម្រាប់នាំពួកខ្លួនឲ្យខំទាញរៀងៗខ្លួន។ ចំណែកឯអ្នកដែលមានមាឌតូចៗ ស្គមៗ កម្លាំអខ្សោយៗ គេឲ្យឈរកណ្ដាល។
លុះរៀបចំរួចហើយ គេឲ្យមនុស្សប្រុសម្នាក់កាន់សំភោរ ឬគង ឬក៏រគាំងឈរត្រង់កណ្ដាលទីជិតអ្នកទាំងពីរដែលកាន់ខ្សែឈរប្រទល់មុខគ្នានោះ ផ្ដើមស្រែកឡើងព្រមគ្នាថា យក្សអរ(១) !.! ឮយ៉ាងខ្លាំងៗ ធ្វើសំឡេងវែងៗ រលាក់រលែកយ៉ាងគ្រលួច។ រីឯ អ្នកប្រុងទាញព្រ័ត្រទាំងប៉ុន្មាន ជួយស្រែកទទួលឡើងព្រមគ្នាថា ហ៊ោវ៉ឺយៗ ៣ដង ទើបនាំគ្នាទាញយកជ័យជម្នះរៀងខ្លួន។
ដើម្បីទទួលបានជ័យជម្នះ ភាគីនីមួយៗ ត្រូវរួមកម្លាំងគ្នា ដោយឥតរាថយ។ ពួកគេត្រូវសាមគ្គឺគ្នា និងប្រើកម្លាំងរួមគ្នា ព្រមទាំងបញ្ចេញសមត្ថភាពឲ្យអស់ពីក្នុងខ្លួន ដើម្បីយកឈ្នះលើដៃគូប្រកួតរបស់ខ្លួន៕
Tag:
ល្បែងទាញព្រ័ត្រ
កីឡា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
