តើកម្ពុជាត្រូវការពេលប៉ុន្មានឆ្នាំ ទើបមានរោងចក្រកែច្នៃចន្ទីបានពេញលេញ?

ផ្ទៃដីដែលអាចដាំដុះស្វាយចន្ទីនៅកម្ពុជា មានជិត ៧០ម៉ឺនហិកតា និងបានផ្ដល់ផលចន្លោះពី១លានតោននៅក្នុង១ឆ្នាំ។ ក្នុងចំណោមទិន្នផលទាំងនេះ ត្រូវបាននាំចេញទៅវៀតណាមស្ទើរតែ៩០ភាគរយ។ សំណួរសួរថា តើកម្ពុជាខ្វះកន្លែងកែច្នៃឬយ៉ាងណា? ពិតណាស់ កម្ពុជា មិនទាន់មានរោងចក្រកែច្នៃស្វាយចន្ទីបានពេញលេញឡើយ ដែលបង្ខំចិត្តឱ្យកសិករជាច្រើននាំចេញស្វាយចន្ទីស្រស់ និងឆៅទៅវៀតណាម។

ទាក់ទិននឹងបញ្ហានេះ កញ្ញា អ៊ឹម រចនា អ្នកនាំពាក្យក្រសួងកសិកម្ម បញ្ជាក់បែបនេះ៖«យើងដឹងថា ទាំងអស់នេះ ជាបញ្ហា ហើយក្រសួងបានធ្វើការយ៉ាងប្រុងប្រយ័ត្ន តាមរយៈការវិភាគសិក្សាគ្រប់ជ្រុងជ្រោយ។ យើងបានដាក់ចេញនូវគោលនយោបាយដ៏សំខាន់ក្នុងអាណត្តិនេះ គឺចងក្រងសហគមន៍កសិកម្មទំនើប ដើម្បីឱ្យការដាំដុះស្វាយចន្ទីទាំងកសិករ ទាំងអ្នកប្រមូលទិញផ្សារភ្ជាប់គ្នា»។

បើតាមអនុរដ្ឋលេខាធិការរូបនេះ ក្រសួងកសិកម្ម ក្រសួងពាណិជ្ជកម្ម និងភាគីពាក់ព័ន្ធ កំពុងបន្តទាក់ទាញវិនិយោគិនឱ្យមកដាក់ទុនវិនិយោគនៅកម្ពុជា។ តាមរយៈសក្ដានុពលស្វាយចន្ទីរបស់កម្ពុជា កញ្ញា សង្ឃឹមថា អ្នកវិនិយោគពីក្រៅប្រទេស នឹងមិនរារែកក្នុងការដាក់ទុននោះទេ។

«អ្វីដែលយើងចង់បាន គឺធ្វើយ៉ាងណាជំរុញការកែច្នៃ និងធ្វើម៉េចឱ្យទីផ្សារស្វាយចន្ទី ស្ថិតនៅក្នុងស្រុកយើងទាំងស្រុង។ យើងផលិតនៅក្នុងស្រុក១លានតោន យើងកែច្នៃក្នុងស្រុក១លានតោន ឬបើល្អជាងនេះ យើងទិញពីគេមកកែច្នៃដើម្បីនាំចេញទៅក្រៅប្រទេស»។ នេះជាលើកឡើងបន្ថែមរបស់កញ្ញា អ៊ឹម រចនា ក្នុងដំណើរទស្សនកិច្ចឈ្វេងយល់ខ្សែច្រវាក់តម្លៃផលិតកម្មគ្រាប់ស្វាយចន្ទី នៅខេត្តកំពង់ធំ កាលពីថ្ងៃទី៣០ វិច្ឆិកា។

កត្តាសំខាន់បំផុតដែលអាចធ្វើឱ្យកម្ពុជា ក្លាយជាអធិរាជស្វាយចន្ទី គឺបង្កើនសហគ្រាស ឬរោងចក្រកែច្នៃនៅក្នុងស្រុក ដើម្បីអាចផ្គត់ផ្គង់ និងនាំចេញទៅទីផ្សារក្រៅប្រទេសបានទូលំទូលាយ។ កម្ពុជា មានគោលដៅក្លាយជា «អធិរាជគ្រាប់ស្វាយចន្ទី»។ កាលពីខែមីនា ឆ្នាំ២០២៣ សម្ដេច ហ៊ុន សែន អតីតនាយករដ្ឋមន្ត្រី កម្ពុជា បានថ្លែងចេញខេត្តពោធិ៍សាត់ ដូច្នេះ៖ «ខ្ញុំចង់ធ្វើឱ្យប្រទេសកម្ពុជា ក្លាយទៅជាប្រទេសអធិរាជស្វាយចន្ទី។ ឥឡូវ ស្វាយចន្ទី បានផលិតច្រើនជាងគេទាំងអស់។ គ្រាន់តែយើងមិនទាន់មានការកែច្នៃ។»

សូមបញ្ជាក់ថា ក្នុងខែមិថុនាកន្លងទៅ រដ្ឋាភិបាល បានដាក់ចេញគោលនយោបាយជាតិស្តីពី«ស្វាយចន្ទី» ដែលមានចក្ខុវិស័យអភិវឌ្ឍន៍ផលិតកម្ម កែច្នៃ និងទីផ្សារស្វាយចន្ទីឱ្យមានលក្ខណៈប្រកួតប្រជែងប្រកបដោយបរិយាបន្ន ធានានូវនិរន្តរភាព និងការធ្វើពិពិធកម្មសេដ្ឋកិច្ចផងដែរ៕