រដ្ឋមន្ត្រីការពារជាតិបារាំង Sebastien Lecornu និងសមភាគីហ្វីលីពីន Gilberto Teodoro នៅថ្ងៃទី២ ខែធ្នូ បានចុះហត្ថលេខាលើលិខិតបញ្ជាក់បំណងមួយដើម្បីជំរុញកិច្ចសហប្រតិបត្តិការការពារជាតិទ្វេភាគី។ លោក Lecornu កំពុងធ្វើទស្សនកិច្ចនៅម៉ានីល។

 

ថ្លែងក្នុងសន្និសីទសារព័ត៌មានមួយ លោក Teodoro និយាយថា ហ្វីលីពីន និងបារាំងមានបំណងចាត់វិធានការជាក់ស្តែងក្នុងការបង្កើនកម្រិតទំនាក់ទំនង និងកិច្ចសហប្រតិបត្តិការការពារជាតិទ្វេភាគីកាន់តែទូលំទូលាយ។ លោក​បាន​បន្ត​ថា សកម្មភាពមួយដែលនឹងត្រូវអនុវត្តក៏​មាន​ការ​ស្វែង​រក​ការយល់ព្រម​ពី​ថ្នាក់​ដឹក​នាំ​ដើម្បី​ចរចា​ពីកិច្ច​ព្រម​ព្រៀង​ទស្សនកិច្ចកងកម្លាំង​។

 

ហ្វីលីពីនមានកិច្ចព្រមព្រៀងទទួលយកទ័ពបរទេសជាមួយអាម៉េរិកដែលជាសម្ព័ន្ធចងភ្ជាប់ដោយកាត្វកិច្ចជួយគ្នាទៅវិញទៅមកក្នុងពេលមានការប្រហារណាមួយ និងអូស្ត្រាលីផង។ ថ្មីៗនេះ ទីក្រុងម៉ានីលបានផ្តួចផ្តើមការពិភាក្សាជាមួយក្រុងតូក្យូសម្រាប់កិច្ចព្រមព្រៀងនេះដែរ។

 

ហ្វីលីពីន ជាគោលដៅទី១ ​របស់​លោក Lecornu ​នៃ​ដំណើរ​ទស្សនកិច្ច​​ឥណ្ឌូ​ប៉ាស៊ីហ្វិក។ លោកបាន​ឈប់​សម្រាក​នៅ​ក្នុង​ទឹកដី​នាយសមុទ្រ New Caledonia មុនបន្តដំណើរទៅ​ម៉ាឡេស៊ី។ ក្នុងសន្និសីទដដែល លោក Lecornu បាននិយាយថា បារាំងកំពុងធ្វើការដើម្បីពង្រឹងវត្តមាននៅក្នុងឥណ្ឌូប៉ាស៊ីហ្វិក។

 

ទោះអឺរ៉ុបក្ដី បារាំងបានចាត់ទុកខ្លួនឯងថាជាមហាអំណាចឥណ្ឌូប៉ាស៊ីហ្វិក ដោយមានកងទ័ពជាង៧ពាន់នាក់ឈរជើងនៅក្នុងទឹកដីនាយសមុទ្ររបស់ខ្លួនក្នុងមហាសមុទ្រប៉ាស៊ីហ្វិក និងមហាសមុទ្រឥណ្ឌាទៀតផង។

 

ដោយសារជម្លោះជាមួយចិន ហ្វីលីពីនកំពុងបង្កើនទំនាក់ទំនងយោធាជាមួយប្រទេសមហាអំណាចនានាដើម្បីទប់ទល់ការកើនឡើងឥទ្ធិពលរបស់ចិននៅក្នុងសមុទ្រចិនខាងត្បូង។ ការទាមទាររបស់ទីក្រុងម៉ានីល ទទួលបានការគាំទ្រច្រើន ពិសេសសេចក្តីសម្រេចរបស់តុលាការអន្តរជាតិឆ្នាំ២០១៦ ដែលបានច្រានចោលការទាមទាររបស់ចិន តែចិនមិនទទួលស្គាល់៕