បាំងតែជាង ១ខែទៀតប៉ុណ្ណោះ ការបោះឆ្នោតប្រធានាធិបតី និងសភាតៃវ៉ាន់ នឹងមកដល់ ខណៈអ្នកនយោបាយដែនកោះមួយនេះ បានទាញប្រធានបទចិន ដើម្បីបង្កើនប្រជាប្រិយភាព និងការគាំទ្រ។ ក្នុងការស្វែងរកការគាំទ្រ បក្សគូមិញតាងកន្លងមក បានប្រាប់ប្រជាជនថា ការបោះឆ្នោតឱ្យបក្សប្រជាធិបតេយ្យជឿនលឿន គឺស្មើនឹងការបញ្ជូនមនុស្សទៅធ្វើសង្រ្គាម ដោយសារបក្សនយោបាយមួយនេះ គាំទ្រឯករាជ្យភាព។ ចិនបដិសេធដាច់ខាតចំពោះឯករាជ្យភាពរបស់តៃវ៉ាន់ ហើយថែមទាំងព្រមានប្រើកម្លាំងទ័ពវាយប្រហារថែមទៀត។ 

 

តបនឹងបក្សគូមិញតាង លោកស្រី Tsai Ing-wen ប្រធានាធិបតីជិតផុតអាណត្តិ បានទទូចឱ្យអ្នកគាំទ្ររបស់បក្សខ្លួន គិតគូរពីអនាគតតៃវ៉ាន់ ដោយមើលស្ថានភាពហុងកុងជាគំរូ។ 

 

«សូមមើលហុងកុង ហើយគិតពីអនាគតរបស់តៃវ៉ាន់។ យើងមិនចង់បានសន្តិភាពបែបហុងកុងឡើយ។ យើងចង់បានសន្តិភាពពេញលេញ»។ លោកស្រីប្រធានាធិបតី បានសង្កត់ធ្ងន់បែបនេះ ក្នុងយុទ្ធនាការស្វែងរកការគាំទ្រចំពោះលោក William Lai បេក្ខជនប្រធានាធិបតីរបស់បក្សប្រជាធិបតេយ្យជឿនលឿន ក្នុងក្រុងតៃប៉ិ នៅថ្ងៃទី៣ ខែធ្នូ។

 

ការលើកឡើងរបស់លោកស្រី Tsai ទំនងសំដៅដល់គោលការណ៍ «ប្រទេសមួយ ប្រព័ន្ធពីរ» នៅហុងកុង ដែលរដ្ឋាភិបាលក្រុងប៉េកាំង ធ្លាប់ស្នើចំពោះក្រុងតៃប៉ិផងដែរ។ នៅក្នុងឆ្នាំ២០២០ ប្រជាជនហុងកុង ជាច្រើននាក់ បានធ្វើបាតុកម្មប្រឆាំងនឹងការអនុម័តច្បាប់សន្តិសុខជាតិ ដែលត្រូវបានប្រទេសលោកខាងលិច ចាត់ទុកជាការបង្កើនដែនគ្រប់គ្រងរបស់ចិនលើហុងកុងបន្ថែម។ យ៉ាងណាមិញ ក្រុងប៉េកាំង បានចេញមុខការពារថា ច្បាប់សន្តិសុខជាតិ ជាការរក្សាស្ថិរភាព និងសណ្តាប់ធ្នាប់លើហុងកុង។ 

 

មិនតែប៉ុណ្ណោះ លោកស្រីមេដឹកនាំ បានបន្ថែមថា ដើម្បីធានាលើសន្តិភាព តៃវ៉ាន់ចាំបាច់ណាស់ ក្នុងការពង្រឹងសមត្ថភាពការពារ ប៉ុន្តែរដ្ឋាភិបាលក្រុងតៃប៉ិក៏មិនបង្ករឿងដាក់ប្រទេសជិតខាងដែរ។ 

 

ការលើកឡើងរបស់លោកស្រី Tsai ធ្វើឡើងក្រោយពេល ២ថ្ងៃប៉ុណ្ណោះ នៅពេលតៃវ៉ាន់ និងអាម៉េរិក បានចុះហត្ថលេខាលើកិច្ចព្រមព្រៀងទិញមីស៊ីលសម្រាប់បំពាក់លើយន្តហោះចម្បាំង ក្នុងទំហំទឹកប្រាក់ប្រមាណ ៥៤៧លានដុល្លារ។ មីស៊ីលទាំងនោះ នឹងជួយបង្កើនសមត្ថភាពការពារ និងវាយប្រហាររបស់យន្តហោះចម្បាំង F-16V តៃវ៉ាន់បន្ថែមទៀត។ 

 

កន្លងមក ក្រសួងការបរទេសអាម៉េរិក បានផ្តល់ភ្លើងបៃតងក្នុងការលក់អាវុធឱ្យតៃវ៉ាន់ ជាញឹកញាប់ ដើម្បីជួយតៃវ៉ាន់អាចមានសមត្ថភាពស្វ័យការពារបាន ក្នុងករណីមានសត្រូវ ជាពិសេសចិន វាយប្រហារ។ 

 

សូមបញ្ជាក់ថា ក្នុងការបោះឆ្នោតនៅខែមករា ឆ្នាំ២០២៤ បក្សប្រជាធិបតេយ្យជឿនលឿន បានជ្រើសលោក William Lai ជាបេក្ខជនប្រធានាធិបតី និងលោកស្រី Hsiao Bi-khim ជាបេក្ខជនអនុប្រធានាធិបតី។ ចំណែកបក្សគូមិញតាង ដែលជាបក្សប្រឆាំងដ៏សំខាន់ និងទំនោរទៅរកចិន បានជ្រើសលោក Hou Yu-ih ជាបេក្ខជនប្រធានាធិបតី និងលោក Jaw Shaw-kong ជាអនុប្រធានាធិបតី។ ដោយឡែកបក្សប្រជាជនតៃវ៉ាន់ បានជ្រើសលោក Ko Wen-je ជាបេក្ខជនប្រធានាធិបតី​ និងលោកស្រី Cynthia Wu ជាបេក្ខជនអនុប្រធានាធិបតី៕