អន្តរជាតិ
ក្រុមអ្នកតវ៉ាគាំទ្រប៉ាឡេស្ទីននៅអូស្ត្រាលីសម្រុកចូលសណ្ឋាគារដែលគណៈប្រតិភូអុីស្រាអែលស្នាក់នៅ
ក្រុមបាតុករប្រមូលផ្តុំគ្នាក្នុងអំឡុងការដើរហែក្បួនគាំទ្រជនជាតិប៉ាឡេស្ទីន នៅទីក្រុងស៊ីដនី ប្រទេសអូស្ត្រាលី កាលពីថ្ងៃទី៤ ខែវិច្ឆិកា
×![]()
ដោយ: VOA
ជនជាតិអ៊ីស្រាអែលមួយក្រុម ដែលសាច់ញាតិត្រូវបានក្រុមហាម៉ាស់ (Hamas) ចាប់ពង្រត់នៅក្នុងអំឡុងការវាយប្រហាររបស់ក្រុមសកម្មប្រយុទ្ធនេះលើអ៊ីស្រាអែលកាលពីថ្ងៃទី ៧ ខែតុលា ត្រូវបានក្រុមបាតុករដែលមានទំនោរទៅរកប៉ាឡេស្ទីនប្រហែល ២០ នាក់តាមរហូតដល់សណ្ឋាគាររបស់ពួកគេបន្ទាប់ពីពួកគេបានជួបជាមួយនឹងសាធារណជននិងអ្នកនយោបាយមូលដ្ឋាននៅឯមហាវិទ្យាល័យមួយកន្លែងកាលពីថ្ងៃទី ២៩ ខែវិច្ឆិកា។
រូបភាពនិងវីដេអូនៅលើបណ្ដាញសង្គមអនឡាញបានបង្ហាញឱ្យឃើញក្រុមអ្នកតវ៉ាស្រែកពាក្យស្លោកគាំទ្របាឡេស្ទីននិងកាន់បដាជាច្រើនដែលបដាមួយសរសេរអក្សរថា៖ «បញ្ឈប់ការផ្ដល់អាវុធដល់អ៊ីស្រាអែល។ ដោះលែងប៉ាឡេស្ទីន»។
នៅទីបំផុត ប៉ូលិសបានបណ្ដេញបាតុករទាំងនេះចេញពីសណ្ឋាគារនោះ។
ជនជាតិអ៊ីស្រាអែលទាំងនេះស្ថិតនៅក្នុងប្រទេសអូស្ត្រាលីដើម្បីជួបជាមួយអ្នកនយោបាយនិងអ្នកដទៃទៀតនៅក្នុងផ្នែកមួយនៃយុទ្ធនាការជាសាកលដើម្បីផ្សព្វផ្សាយអំពីស្ថានភាពលំបាកវេទនារបស់ចំណាប់ខ្មាំងដែលក្រុមហាម៉ាស់បានឃុំនៅក្នុងតំបន់ហ្កាហ្សា (Gaza)។
គេឃើញមានសេចក្ដីរាយការណ៍ថាជនជាតិអ៊ីស្រាអែលទាំងនេះត្រូវបានឆ្មាំសន្តិសុខឯកជននាំទៅកាន់ស្ថានីយប៉ូលិស។ ក្រោយមក ស្ថានទូតអ៊ីស្រាអែលប្រចាំទីក្រុងកង់បេរ៉ាបានបញ្ជាក់នៅក្នុងសេចក្ដីថ្លែងការណ៍មួយថា ការតវ៉ានេះបានធ្វើឱ្យក្រុមគណៈប្រតិភូនេះ «មានអារម្មណ៍ថាគ្មានសុវត្ថិភាព»។
អ្នកស្រី Jacinta Allan អភិបាលរដ្ឋ Victoria បានប្រាប់ប្រព័ន្ធផ្សព្វផ្សាយក្នុងស្រុកថា ឥរិយាបថរបស់ក្រុមអ្នកតវ៉ាគឺគួរឱ្យខ្លាច។
អ្នកស្រី Allan ថ្លែងដូច្នេះថា៖ «អ្នកដែលរងទុក្ខសោកនិងការបាត់បង់ដោយសារសង្គ្រាមដ៏អាក្រក់ដែលកំពុងបន្តនៅក្នុងតំបន់មជ្ឈិមបូព៌ានេះសក្ដិសមនឹងទទួលបានការគោរព ការយកចិត្តទុកដាក់ និងការគាំទ្រពីពួកយើង»។
នៅក្នុងទីក្រុងកង់បេរ៉ា លោក Peter Dutton មេដឹកនាំគណបក្សប្រឆាំងបែបអភិរក្សនិយម បានប្រាប់សភាអូស្ត្រាលីថា ការតវ៉ាដែលមានទំនោរទៅរកប៉ាឡេស្ទីននេះគឺជា «ទង្វើអាក្រក់គ្មានសីលធម៌»។
នាយករដ្ឋមន្ត្រីអូស្ត្រាលីលោក Anthony Albanese បានប្រាប់សមាជិកសភាអូស្ត្រាលីកាលពីថ្ងៃទី ៣០ ខែវិច្ឆិកាថា ទង្វើរបស់បាតុករទាំងនេះគឺ «អាក្រក់ហួសហេតុ»។
លោក Albanese ថ្លែងដូច្នេះថា៖ «ការធ្វើដូច្នេះគឺមិនបានជួយអ្វីដល់បុព្វហេតុរបស់ប្រជាជនប៉ាឡេស្ទីននោះទេ។ វាមិនបានជួយអ្វីដល់ការលើកកម្ពស់យុត្តិធម៌សម្រាប់ប្រជាជនប៉ាឡេស្ទីនឬក៏សន្តិភាពនៅក្នុងតំបន់នោះឡើយ»។
កាលពីពេលថ្មីៗនេះ សាច់ញាតិនិងមិត្តភក្តិរបស់ចំណាប់ខ្មាំងមួយចំនួនដែលក្រុមហាម៉ាស់បានចាប់យកទៅបានធ្វើសន្និសីទកាសែតនៅឯសភាក្នុងទីក្រុងកង់បេរ៉ាដើម្បីអំពាវនាវឱ្យមានការដោះលែងចំណាប់ខ្មាំងទាំងនោះជាបន្ទាន់។
អូស្ត្រាលីបានបញ្ជាក់អះអាងម្ដងហើយម្ដងទៀតអំពីការជឿជាក់របស់ខ្លួនលើសិទ្ធិរបស់អ៊ីស្រាអែលនៅក្នុងការការពារខ្លួននិងការតបតចំពោះការវាយប្រហាររបស់ក្រុមហាម៉ាស់ នៅពេលដែលមនុស្សប្រហែល ១.២០០ នាក់ត្រូវបានសម្លាប់ហើយមនុស្ស ២៤០ នាក់ត្រូវបានចាប់ធ្វើជាចំណាប់ខ្មាំង។
រដ្ឋាភិបាលអូស្ត្រាលីក៏បានជំរុញផងដែរឱ្យអ៊ីស្រាអែលធ្វើតាមច្បាប់សង្គ្រាមនិងបង្ការកុំឱ្យមានជនស៊ីវិលស្លាប់។
នៅក្នុងរយៈពេលប៉ុន្មានសប្ដាហ៍ចុងក្រោយនេះ គេឃើញមានការតវ៉ារាប់សិបដងរបស់ក្រុមអ្នកគាំទ្រប៉ាឡេស្ទីននៅទូទាំងប្រទេសអូស្ត្រាលី ក៏ដូចជាការជួបជុំគាំទ្រអ៊ីស្រាអែលផងដែរ។
មន្ត្រីអូស្ត្រាលីបានបង្ហាញក្ដីបារម្ភទាក់ទិននឹងការកើនឡើងនៃការរើសអើងប្រឆាំងនឹងជាតិសាសន៍ជ្វីហ្វនិងការរើសអើងប្រឆាំងនឹងសាសនាអ៊ិស្លាមនៅក្នុងប្រទេសអូស្ត្រាលីតាំងពីពេលដែលសង្គ្រាមរវាងអ៊ីស្រាអែលនិងក្រុមហាម៉ាស់បានផ្ទុះឡើងមក។
កាលពីខែតុលា លោក Ed Husic ដែលជារដ្ឋមន្ត្រីក្រសួងឧស្សាហកម្មអូស្ត្រាលី និងអ្នកស្រី Anne Aly ដែលជារដ្ឋមន្ត្រីក្រសួងអប់រំកុមារតូចអូស្ត្រាលី បាននិយាយថា ជនស៊ីវិលនៅតំបន់ហ្កាហ្សាបានរងនូវទណ្ឌកម្មរួមរបស់អ៊ីស្រាអែលដោយសារ «អំពើព្រៃផ្សៃរបស់ក្រុមហាម៉ាស់»។
លោក Husic និងអ្នកស្រី Aly គឺជារដ្ឋមន្ត្រីដែលកាន់សាសនាអ៊ិស្លាមតែពីររូបគត់នៅក្នុងគណៈរដ្ឋមន្ត្រីរបស់រដ្ឋាភិបាលអូស្ត្រាលី៕
ប្រែសម្រួលដោយលោក ឈឹម សុមេធ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
