ក្នុងដំណើរទស្សនកិច្ចមកកម្ពុជារយៈពេល ៤ថ្ងៃ ដោយចាប់ផ្តើមពីថ្ងៃទី៣០ ខែវិច្ឆិកា ដល់ថ្ងៃទី៣ ខែធ្នូ លោកស្រី Li Thi Thu Hang អនុរដ្ឋមន្រ្តីការបរទេសវៀតណាម បានជួបជាមួយរដ្ឋលេខាធិការប្រចាំការនៃក្រសួងការបរទេស លោក ស៊ា កុសល និងលោក ម៉ៅ ច័ន្ទតារា រដ្ឋលេខាធិការប្រចាំការរបស់ក្រសួងមហាផ្ទៃ និងមន្រ្តីកម្ពុជាផ្សេងទៀត។ 

 

ក្នុងដំណើរទស្សនកិច្ចមកកម្ពុជា លោកស្រី Hang បានបង្ហាញក្តីសង្ឃឹមថា ភាគីកម្ពុជា ជាពិសេសអាជ្ញាធរតំបន់គ្រប់ជាន់ថ្នាក់ នឹងជួយប្រជាជនដើមកំណើតវៀតណាមឱ្យរៀនសូត្របានកាន់តែប្រសើរ និងគោរពច្បាប់ សេចក្តីណែនាំ និងគោលនយោបាយកម្ពុជា។ 

 

ទន្ទឹមនេះ អនុរដ្ឋមន្រ្តីការបរទេសវៀតណាម បានអរគុណដល់រដ្ឋាភិបាល និងប្រជាជន ដែលបានបង្កើតលក្ខខណ្ឌដ៏សមស្របមួយសម្រាប់សហគមន៍វៀតណាម ក្នុងការរស់នៅ និងធ្វើធុរកិច្ចនៅកម្ពុជាផងដែរ។ មិនតែប៉ុណ្ណោះ មន្រ្តីក្រសួងការបរទេសវៀតណាមរូបនេះ បានស្នើឱ្យកម្ពុជាយកចិត្តទុកដាក់ និងដោះស្រាយបញ្ហា ដែលប្រជាជនដើមកំណើតវៀតណាមកំពុងជួបប្រទះ។ 

 

ជាការឆ្លើយតប មន្រ្តីកម្ពុជាបានអះអាងថា កម្ពុជានៅតែបន្តគោលនយោបាយក្នុងការបង្កើតលក្ខខណ្ឌដ៏សមស្របសម្រាប់ជនបរទេស និងប្រជាជនដើមកំណើតវៀតណាមដែលរស់នៅកម្ពុជា និងគោរពច្បាប់ប្រទេសរបស់ខ្លួន។ 

 

បន្ថែមពីនេះ​ មន្រ្តីកម្ពុជាបានជំរុញឱ្យភាគីទាំងពីរបង្កើនការតភ្ជាប់ផ្លូវផ្លូវពីភ្នំពេញ-ប៉ាវិត និងផ្លូវ ក្រុងHCM-Moc Ba ក្នុងគោលបំណងបង្កើនទំហំពាណិជ្ជកម្ម និងទេសចរណ៍។ 

 

សូមបញ្ជាក់ថា ដំណើរទស្សនកិច្ចរបស់អនុរដ្ឋមន្រ្តីការបរទេសវៀតណាមមកកម្ពុជា ធ្វើឡើងមុនពេលខួប ៤៥ឆ្នាំនៃជ័យជម្នះរបស់កម្ពុជាលើរបបប៉ុល ពត ក្នុងឆ្នាំ១៩៧៩។ ភាគីវៀតណាម គ្រោងធ្វើពិធីអបអរជ័យជម្នះនេះ នៅក្រុងហាណូយផងដែរ៕