ជាតិ
គយបំភ្លឺថា សាច់បង្កក៣៧០តោន ដែលទើបបង្រ្កាបបាន គឺមានច្បាប់ សាច់បង្កកចម្រុះ៣៧០តោន ដែលរកឃើញក្នុងឃ្លាំងមួយកន្លែង ស្ថិតក្នុងសង្កាត់ក្រាំងធ្នង់ ខណ្ឌសែនសុខ កាលពីថ្ងៃទី៤ ខែធ្នូ។ រូបភាព៖ គយ
× ភ្នំពេញ៖ សាច់បង្កក៣៧០តោន ដែលមន្រ្តីបង្រ្កាបបទល្មើសសាច់សត្វ រកឃើញក្នុងឃ្លាំងមួយកន្លែង ស្ថិតក្នុងសង្កាត់ក្រាំងធ្នង់ ខណ្ឌសែនសុខ កាលពីថ្ងៃច័ន្ទ ទី៤ ធ្នូ គឺជាការនាំចូលស្របច្បាប់។ នេះជាការបំភ្លឺរបស់ អគ្គនាយកដ្ឋានគយនិងរដ្ឋាករកម្ពុជា(អគរ) បន្ទាប់ពីសារព័ត៌មាន និងបណ្ដាញសង្គមមួយចំនួន ចុះផ្សាយថា សាច់បង្កកដ៏ច្រើនលើសលុបនេះ នាំចូលដោយគ្មានច្បាប់។ គយ ចាត់ទុកថា ការផ្សព្វផ្សាយទាំងនេះ មានចេតនាធ្វើឲ្យមានការយល់ច្រឡំ និងវឹកវរក្នុងសង្គម។
បើតាម គយ សាច់បង្កកចម្រុះទម្ងន់៣៧០តោននោះ មានប្រភពមកពីប្រទេសអ៊ីតាលី, ប្រេស៊ីល, អាឡឺម៉ង់, រុស្សី, ឥណ្ឌា ។ វាត្រូវបាននាំចូលដោយបំពេញកាតព្វកិច្ចពន្ធ និងអាករត្រឹមត្រូវតាមច្បាប់ និងបទប្បញ្ញត្តិជាធរមាន ដោយភ្ជាប់មកជាមួយនូវវិញ្ញាបនបត្របញ្ជាក់អនាម័យសាច់ពីប្រទេសនាំចេញ ហើយនៅមានសុពលភាពប្រើប្រាស់ ពោលគឺពុំទាន់ហួសកាលបរិច្ឆេទប្រើប្រាស់ ដូចការលើកឡើងពន្លើស ដោយបុគ្គលមួយចំនួនឡើយ។
អនុលោមតាមបញ្ញត្តិនៃអនុក្រឹត្យ ១៧ អនក្រ.បក ចុះថ្ងៃទី២៦ ខែកុម្ភៈ ឆ្នាំ២០២០ ស្ដីពីការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់, ការនាំចូលសាច់បង្កកពីបរទេសតម្រូវឱ្យមានភ្ជាប់នូវវិញ្ញាបនបត្របសុព្យាបាល ឬវិញ្ញាបនបត្រអនាម័យសាច់ឬផលិតផលសត្វពីប្រទេសនាំចេញ និងពុំតម្រូវឱ្យមានការស្នើសុំលិខិតអនុញ្ញាតនាំចូលឬលិខិតគតិយុត្តប្រហាក់ប្រហែលពីក្រសួង-ស្ថាប័នមានសមត្ថកិច្ចក្នុងប្រទេសកម្ពុជាឡើយ ។
គយ ចាត់ទុកថា ការចុះផ្សាយព័ត៌មានដោយគ្មានមូលដ្ឋានច្បាស់លាស់ បានបង្កឱ្យមានការយល់ច្រឡំជាសាធារណៈ និងផ្ដល់បច្ច័យអវិជ្ជមានដល់កិច្ចខិតខំប្រឹងប្រែងរបស់មន្ត្រីរាជការគយ ដែលកំពុងអនុវត្តវិធានការបង្រ្កាបអំពើរត់គេចពន្ធ។
ជុំវិញបញ្ហានេះ គយ អំពាវនាវ ឱ្យបណ្ដាញសារព័ត៌មាន និងអ្នកប្រើប្រាស់បណ្ដាញសង្គមមេត្តាជៀសវាងការចុះផ្សាយនិងចែករំលែកព័ត៌មានមិនពិត និងមានចរិតលក្ខណៈបង្កឱ្យមានការភាន់ច្រឡំ ដែលអាចបណ្ដាលឱ្យមានចលាចលសង្គម និងប៉ះពាល់ដល់កិច្ចខិតខំប្រឹងប្រែងរបស់អាជ្ញាធរមានសមត្ថកិច្ច ក៏ដូចជាការប៉ះពាល់ដល់ការធ្វើអាជីវកម្មរបស់ធុរជននាំចូល និងចែកចាយសាច់បង្កក ដែលគោរពតាមបទប្បញ្ញត្តិជាធរមានរបស់កម្ពុជា៕
Tag:
អគ្គនាយកដ្ឋានគយនិងរដ្ឋាករកម្ពុជា
សាច់បង្កក
© រក្សាសិទ្ធិដោយ thmeythmey.com