ជាតិ
ក្រសួងអប់រំ៖ លទ្ធផលប្រឡងបាក់ឌុប មិនប្រែប្រួលនោះទេ បេក្ខជនឈរមេីលទ្ធផលនៅមណ្ឌលប្រឡងវិទ្យាល័យបាក់ទូក។ រូបភាព សយ រតណ្ណៈវិសាល
× ភ្នំពេញ៖ ក្រសួងអប់រំ យុវជន និងកីឡា ប្រកាសបញ្ចប់ការទទួលពាក្យតវ៉ា និងបញ្ចប់ដំណើរការពិនិត្យ និងដោះស្រាយការតវ៉ារបស់បេក្ខជនប្រឡងសញ្ញាបត្រមធ្យមសិក្សាទុតិយភូមិ កាលពីថ្ងៃទី៦ វិច្ឆិកា។ បើតាមសេចក្ដីប្រកាសព័ត៌មានរបស់ក្រសួងអប់រំ ចេញផ្សាយនៅថ្ងៃទី៨ ធ្នូ បញ្ជាក់ថា លទ្ធផលនៃការប្រឡង មិនប្រែប្រួលនោះទេ។
ក្រោយលទ្ធផលប្រឡងសញ្ញាបត្រមធ្យមសិក្សាទុតិយភូមិ ត្រូវបានប្រកាសកាលពីថ្ងៃទី២៣-២៥ វិច្ឆិកាកន្លងទៅ មានបេក្ខជនមួយចំនួ បានដាក់ពាក្យតវ៉ាចំពោះលទ្ធផលរបស់ពួកគេ។ តាមរយៈសំណូមពរ និងការតវ៉ារបស់បេក្ខជនទាំងនោះ ក្រសួងអប់រំ យុវជន និងកីឡា ក៏បានត្រួតពិនិត្យលើកិច្ចការរបស់បេក្ខជន ដោយធ្វើយ៉ាងណាឱ្យអាណាព្យាបាល និងសាធារណជនមានការជឿទុកចិត្ត។
បន្ទាប់ពីបញ្ចប់ការពិនិត្យ ក្រសួងអប់រំ មើលឃើញថាលទ្ធផលនៃការប្រឡងនាសម័យប្រឡង៦ វិច្ឆិកា ២០២៣ មិនមានការប្រែប្រួលទេ។ ចំពោះសិស្សប្រឡងធ្លាក់ ក្រសួងអប់រំ លើកទឹកចិត្ត ឱ្យចូលរួមប្រឡងនៅឆ្នាំក្រោយទៀត។
ទន្ទឹមនឹងនេះ ក្រសួងអប់រំ ក៏បានអះអាងថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៦ វិច្ឆិកា ២០២៣ បានប្រព្រឹត្តទៅដោយរលូន ស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ នេះបើតាមសេចក្ដីប្រកាសព័ត៌មានស្ដីពីសុក្រឹតភាព និងភាពទទួលយកបាន។
សូមបញ្ជាក់ថា លទ្ធផលនៃការប្រឡងសញ្ញាបត្រមធ្យមសិក្សទុតិយភូមិ (បាក់ឌុប) សម័យប្រឡង ០៦ វិច្ឆិកា ២០២៣ បង្ហាញថា បេក្ខជនប្រឡងជាប់មាន៩៨៤៦០នាក់ ដែលស្មើនឹង៧២,៨៩ភាគរយ ក្នុងចំណោមបេក្ខជនសរុប១៣៥ ០៨៤នាក់៕
br>
© រក្សាសិទ្ធិដោយ thmeythmey.com