បើតាមសេចក្ដីជូនដំណឹងរបស់ រដ្ឋបាលខណ្ឌទួលគោក ចេញផ្សាយនៅថ្ងៃទី១១ ខែធ្នូ សព្វថ្ងៃ អាជីវករជាច្រើនបានយកចិញ្ចើមផ្លូវដែលអមសងខាងរបងមន្ទីរពេទ្យកុមារជាតិ ធ្វើជាកន្លែងលក់ដូរ យ៉ាងកកកុញ។ ការណ៍នេះ បាននាំឱ្យបាត់បង់សណ្ដាប់ធ្នាប់ ការកកស្ទះ និងគ្រោះថ្នាក់ចរាចរណ៍តាមដងផ្លូវ ជាដើម។ 
 

ជុំវិញបញ្ហានេះ រដ្ឋបាលខណ្ឌទួលគោក បានស្នើឱ្យម្ចាស់អាជីវកម្មទាំងអស់ បញ្ឈប់បន្ទាន់ រាល់របរលក់ដូរគ្រប់ប្រភេទ ដែលរំលោភលើចិញ្ចើមផ្លូវ និងទ្រូងផ្លូវសាធារណៈ ក្នុងរយៈពេល៧ថ្ងៃ ដែលគិតចាប់ពីថ្ងៃជូនដំណឹងនេះតទៅ។
 

ក្នុងករណី មិនអនុវត្តតាមសេចក្តីជូនដំណឹងនេះ រដ្ឋបាលខណ្ឌទួលគោក នឹងចាត់វិធានការចុះរុះរើ និងដកហូតដោយមិនទទួលខុសត្រូវរាល់ការបាត់បង់ ឬខូចខាតទ្រព្យសម្បត្តិ និងសម្ភារផ្សេងៗឡើយ។ ករណីមានការរារាំង និងប្រឆាំងតវ៉ាជាមួយអាជ្ញាធរមានសមត្ថកិច្ច ក្នុងការចុះរុះរើ រដ្ឋបាលខណ្ឌនឹងអនុវត្តវិធានការរដ្ឋបាល ហើយបើជាករណីធ្ងន់ធ្ងរនឹងឈានដល់អនុវត្តវិធានការច្បាប់៕