បាណន់គីង្គក់ គឺជាប្រភេទត្រីកម្រជិតផុតពូជ។ ជាទូទៅគេប្រទះឃើញវាប្រមាណ១០ដងក្នុងមួយឆ្នាំៗ នៅប្រជុំកោះរ៉ុង កោះតាង និងកោះស្តេច។ បច្ចុប្បន្ន ពុំទាន់មានទិន្នន័យបញ្ជាក់ពីចំនួនត្រីបាណន់គីង្គក់ នៅកម្ពុជាទេ ដោយសារត្រីប្រភេទនេះចូលចិត្តផ្លាស់ទីពីប្រទេសមួយទៅប្រទេសមួយទៀត។
 

កញ្ញា អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានប្រាប់សារព័ត៌មានឌីជីថលថ្មីៗ​ នៅថ្ងៃទី១៣ ធ្នូថា ការប្រទះឃើញត្រីកម្រនៅពេលនេះ បានបង្ហាញឱ្យឃើញពីដែនសមុទ្រកម្ពុជា មានសុវត្ថិភាព មានប្រព័ន្ធអេកូឡូស៊ីចម្រុះ ទឹកមានគុណភាពល្អ និងគ្មានការបំពុល។ វត្តមានត្រីបាណន់គីង្គក់ បានផ្ដល់កិត្តនាមដល់កម្ពុជា និងរួមចំណែកទាក់ទាញទេសចរ ជាពិសេសអ្នកជ្រមុជទឹក។