ជាតិ
សង្គមជាតិ
វត្ថុបុរាណខ្មែរ១៤រូប នៅសារមន្ទីរ MET ទីក្រុងញូយ៉ក នឹងត្រូវបញ្ជូនមកទឹកដីកំណើត វិញ
× វត្ថុបុរាណខ្មែរចំនួន១៤រូប ក្នុងសតវត្ស៍ទី១០ ដែលកំពុងស្ថិតនៅសារមន្ទី Metropolitan Museum( MET) នៃទីក្រុងញូយ៉ក សហរដ្ឋអាម៉េរិក នឹងត្រូវប្រគល់ឱ្យកម្ពុជាវិញ។ ក្នុងចំណោមវត្ថុបុរាណខ្មែរទាំងនោះ គឺមានរូបចម្លាក់ទេពស្រី(ព្រះនាងឧមា) ព្រះកេសព្រះលោកេសូរ និងបដិមាព្រះលោកេសូរ។
សេចក្តីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈ នាថ្ងៃទី១៥ធ្នូ បានបញ្ជាក់ថា សារមន្ទី MET បានផ្តល់ការសន្យាជាផ្លូវការមួយ ក្នុងការបញ្ជូនត្រលប់មកកម្ពុជាវិញនូវវត្ថុបុរាណខ្មែរចំនួន១៤រូប រួមទាំងអនុញ្ញាតឱ្យមន្ត្រីជំនាញកម្ពុជា ធ្វើកោសល្យវិច្ឆ័យសម្បត្តិវប្បធម៌ខ្មែរដទៃទៀត និងពិនិត្យសិក្សាឯកសារនានាពាក់ព័ន្ធនឹងសមុច័្ចយរបស់កម្ពុជា។ ការសន្យារបស់សារមន្ទីនេះ ធ្វើឡើងតាមរយៈកិច្ចសហការ និងចែករំលែកព័ត៌មាន រវាងក្រុមការងារកម្ពុជា និងសមត្ថកិច្ចសហរដ្ឋអាម៉េរិក។
ក្នុងចំណោមវត្ថុបុរាណខ្មែរទាំង១៤រូប ដែលត្រូវបញ្ជូនមកទឹកដីកម្ពុជាវិញនេះ គឺមាននូវស្នាដៃឯកមួយចំនួនដូចជា៖ រូបចម្លាក់ទេពស្រី(ព្រះនាងឧមា) ដែលត្រូវបានធ្វើឡើងពីថ្មភក់ ក្នុងសតវត្ស៍ទី១០។ តាមភស្តុតាំងពីសក្សី រូបចម្លាក់នេះត្រូវបានគេលួចយកនៅក្នុងឆ្នាំ១៩៩៧ ដោយប្រអប់ជើងជាប់ជាមួយជើងទម្របបដិមានេះ បានរកឃើញតាមរយៈការធ្វើកំណាយនៅឆ្នាំ២០២១ នៅក្នុងរមណីយដ្ឋានអតីតរាជធានីកេះកេរ។ ព្រះកេសព្រះលោកេសូរ ដែលធ្វើពីសំរឹទ្ធ ក្នុងសតវត្ស៍ទី១០ ក៏ត្រូវបញ្ជូនមកកម្ពុជាវិញ ផងដែរ។ សព្វថ្ងៃ ដងខ្លួនរបស់ព្រះកេសនេះ ស្ថិតនៅក្នុងសារមន្ទីជាតិ នៅរាជធានីភ្នំពេញ។
ក្រៅពីនេះ បដិមាព្រះលោកេសូរ ធ្វើពីសំលោហៈ ដែលសារមន្ទី MET បានទិញពីលោក ឌូគ្លាស ឡាដហ្វដ (Douglas Latchford) នៅឆ្នាំ១៩៩២ ក៏ត្រូវបានបញ្ជូនមកឱ្យកម្ពុជាវិញ ដែរ។ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានរៀបរាប់នៅក្នុងសេចក្តីប្រកាសព័ត៌មានដដែលយ៉ាងដូច្នេះ៖ «ការបញ្ជូនត្រលប់មកវិញនូវសម្បត្តិវប្បធម៌ជាតិរបស់យើង ពីសារមន្ទី MET គឺមានសារៈសំខាន់បំផុត មិនត្រឹមតែសម្រាប់ប្រជាជនកម្ពុជាប៉ុណ្ណោះទេ ប៉ុន្តែសម្រាប់មនុស្សជាតិទាំងមូល »។ ការបញ្ជូនវត្ថុបុរាណខ្មែរទាំង១៤មកវិញនេះ គឺមានអត្ថន័យធំធេងបំផុតមិនអាចពណ៌នាបាន ដែលជាការព្យាបាលរបួសផ្លូវចិត្តសម្រាប់ប្រជាជាតិកម្ពុជា។
ជាមួយគ្នានេះ លោកស្រី ភឿង សកុណា បានអំពាវនាវ និងទាមទារឱ្យសារមន្ទី រួមទាំងអ្នកកាន់កាប់សមុច្ច័យឯកជនដទៃទៀត មកទាក់ទងមន្ត្រីរបស់ក្រសួងវប្បធម៌ ដើម្បីពិភាក្សាពីសម្បត្តិវប្បធម៌ខ្មែរដែលពួកគេមាន។
«ការបញ្ជូនត្រលប់មកវិញនូវសម្បត្តិវប្បធម៌ជាតិនេះ បង្ហាញជាថ្មីម្តងទៀតនូវការប្តេជ្ញាចិត្តរបស់កម្ពុជា ក្នុងការបន្តស្វែងរក និងនាំយកមកវិញនូវដួងព្រលឹងដូនតារបស់យើងដែលបានឃ្លាតចាកឆ្ងាយពីដែនដីកំណើតរបស់ខ្លួន»។ នេះជាការលើកឡើងរបស់លោកស្រីរដ្ឋមន្ត្រីក្រសួងវប្បធម៌ ដែលបានអរគុណចំពោះលោក Bradley J.Gordon នៃក្រុមហ៊ុន Edenbridge Asia និងលោក Steven Heimberg នៃក្រុមហ៊ុន Apex Advisors ដែលជាទីប្រឹក្សាផ្នែកច្បាប់របស់ក្រសួងវប្បធម៌ បានចំណាយពេលជាច្រើនឆ្នាំ សហការជាមួយក្រុមការងារក្រសួងក្នុងការចរចាទាមទារយកមកកម្ពុជាវិញ នូវសម្បត្តិវប្បធម៌ខ្មែរ ជាពិសេស វត្ថុបុរាណខ្មែរដែលសារមន្ទីMET ប្រគល់មកវិញ នាពេលនេះ៕
Tag:
វប្បធម៌
វត្ថុបុរាណ
សារមន្ទី
© រក្សាសិទ្ធិដោយ thmeythmey.com