យកតាមប្រភពខាងលើ បដិមាទាំង៦អង្គនោះ ត្រូវបានក្រុមការងារប្រទះឃើញ នាអំឡុងការជួសជុលខ្លោងទ្វារនេះឡើងវិញ ដោយបានរើថ្មនៃរចនាសម្ពន្ធខ្លោងទ្វារខាងត្បូង ប្រាសាទតាព្រហ្ម ដែលនៅរាយប៉ាយ ដើម្បីរៀបចំទៅតាមទីតាំងដើមឡើងវិញតាមបច្ចេកទេសអាណាស្ទីឡូ។
 

បើតាមបុរាណវិទូ នៃអាជ្ញាធរជាតិអប្សរា អ្នកស្រី នេត ស៊ីមន ចម្លាក់បុរាណទាំងនោះរួមមាន រូបព្រះពុទ្ធទ្រង់ភ្នែនប្រក់នាគចំនួន២, រូបលោកកេស្វរៈចំនួន១, រូបព្រះពុទ្ធទ្រង់ភ្នែនប្រក់នាគ បាក់ព្រះកេសទម្រង់សមាធិ និងបាក់ព្រះហស្តទាំងសងចំនួន២ និងថ្មកំពូលហោជាង ដែលមានចម្លាក់រូបព្រះពុទ្ធគង់ភ្នែន មានទេពទ្រពីក្រោម១ផ្ទាំងផងដែរ។ 
  

សូមរំឭកបន្តិចថា គម្រោងជួសជុលខ្លោងទ្វារខាងត្បូងប្រាសាទតាព្រហ្មនេះ ត្រូវបានចាប់ផ្ដើមនាខែមករា ដើមឆ្នាំ២០២៣ ដោយអាជ្ញាធរជាតិអប្សរា សហការណ៍ជាមួយស្ថាប័នASI របស់ឥណ្ឌា។ គម្រោងនេះ ធ្វើការជួសជុលលើខ្លោងទ្វារ កំពែងប្រវែង២០ម៉ែត្រ និងកំពូលមុខព្រហ្មទាំងបួន។ តាមរយៈគម្រោង ត្រូវបានរំពឹងថានឹងបញ្ចប់ការជួសជុលក្នុងរយៈពេល២ឆ្នាំ។ 
 

គួរជម្រាបផងដែរថា ប្រាសាទតាព្រហ្មត្រូវបានកសាងឡើងនាសតវត្សរ៍ទៅ១២ នៃគ្រិស្តសករាជ ក្នុងរាជព្រះបាទជ័យវរ្ម័នទី៧។ ប្រាសាទត្រូវបានគរស្គាល់ច្រើនតាមរយៈ ដើមឈើធំៗដុះលើប្រាសាទ បង្កើតជាភាពទាក់ទាញលើប្រាង្គប្រាសាទបុរាណ៕