ដោយ៖ម៉ម ពិសី
ជាច្រើនខែមកហើយ ដែលភាគីរដ្ឋាភិបាលឥណ្ឌា បានប្រកែកច្រានចោលយ៉ាងដាច់អហង្ការ ចំពោះការចោទប្រកាន់ ពីសំណាក់កាណាដា ដែលចោទថាអាជ្ញាធរឥណ្ឌា ជាអ្នកនៅពីក្រោយការធ្វើឃាត មេដឹកនាំចលនាសាសនាស៊ីក្ហម្នាក់ ដ៏មានឥទ្ធិពលម្នាក់ នៅលើកាណាដា។ ការចោទប្រកាន់នេះ បានបង្កឲ្យមានវិបត្តិការទូត រវាងឥណ្ឌា និងកាណាដា។ តែទីបំផុត បន្ទាប់ពីសហរដ្ឋអាមេរិក បានចោទឥណ្ឌាដែរ ថាបានប៉ុនប៉ងសម្លាប់មេដឹកនាំចលនាស៊ីក្ហម្នាក់នៅញូយ៉ក លោកនាយករដ្ឋមន្ត្រីឥណ្ឌាបានអះអាងថា នឹងបើកការស៊ើបអង្កេត។
លោកនាយករដ្ឋមន្ត្រីឥណ្ឌា ណារិន្ទ្រ ម៉ូឌី បានសន្យាថា នឹងបើកការស៊ើបអង្កេត ឲ្យស៊ីជំរៅ ដើម្បីរកការពិត និងបង្ហាញពីភាពស្អាតស្អំ របស់រដ្ឋាភិបាលឥណ្ឌា ទាក់ទិននឹងករណីធ្វើឃាត និងប៉ុនប៉ងធ្វើឃាតសកម្មជនចលនាសីក្ហ នៅកាណាដានិងនៅអាមេរិក។ នេះបើផ្អែកតាមសម្តីរបស់លោក ណារិន្ទ្រ ម៉ូឌី ដែលបានផ្តល់បទសម្ភាសន៍ឲ្យកាសែត Financial Times ចុះផ្សាយកាលពីថ្ងៃពុធ ទី២០ធ្នូ។
សូមរំលឹកថា វិបត្តិការទូតបានផ្ទុះឡើង រវាងឥណ្ឌានិងកាណាដា បន្ទាប់ពីមេដឹកនាំចលនាសាសនាស៊ីក្ហ ដ៏មានឥទ្ធិពលម្នាក់នៅកាណាដា ឈ្មោះ Hardeep Singh Nijjar ត្រូវបានគេលបធ្វើឃាត នៅថ្ងៃទី១៨មិថុនា។ ក្រោយការស៊ើបអង្កេត អាជ្ញាធរកាណាដាបានអះអាងថា ករណីធ្វើឃាតនេះ មានពាក់ព័ន្ធនឹងរដ្ឋាភិបាលឥណ្ឌា ព្រោះចលនាសាសនាស៊ីក្ហ គឺជាសត្រូវនយោបាយមួយដ៏ធំ ក្នុងក្រសែភ្នែកថ្នាក់ដឹកនាំហិណ្ឌូជាតិនិយមឥណ្ឌា។ កើតទុក្ខមិនសុខចិត្ត ចំពោះការចោទនេះ ឥណ្ឌាបានគំរាមថា ចង់ដកអភ័យឯកសិទ្ធិមន្ត្រីទូតកាណាដា ដែលធ្វើការនៅឥណ្ឌា។ ភ្លាមៗក្រោយការគំរាមនេះ កាណាដាបានសម្រេចហៅមន្ត្រីទូតខ្លួនឲ្យចូលស្រុកវិញ។
ស្រាប់តែនៅខែវិច្ឆិកា ឥណ្ឌាត្រូវគេចោទម្តង តែលើកនេះគឺមកខាងសហរដ្ឋអាមេរិក។ អាជ្ញាធរអាមេរិក បានអះអាងថា មេដឹកនាំចលនាសាសនាស៊ីក្ខម្នាក់ នៅញូយ៉ក ត្រូវបានគេប៉ុនប៉ងធ្វើឃាត។ ជនជាតិឥណ្ឌាម្នាក់ ដែលជាអ្នកស្វែងរកឃាតករស៊ីឈ្នួល ត្រូវគេចាប់ខ្លួនបាន ហើយត្រូវគេសង្ស័យថា មានពាក់ព័ន្ធដោយផ្ទាល់ ជាមួយមន្ត្រីជាន់ខ្ពស់ក្នុងរដ្ឋាភិបាលឥណ្ឌា។
យោងតាមការវិភាគ លោកនាយករដ្ឋមន្ត្រីឥណ្ឌា មិនអាចបន្តឆ្លើយប្រកែក បដិសេធការចោទប្រកាន់ ដោយមិនបើកការស៊ើបអង្កេត បានតទៅទៀតឡើយ ព្រោះបញ្ហានេះ នឹងធ្វើកិត្តិយសឥណ្ឌាធ្លាក់ចុះ។ ឥណ្ឌាកំពុងតែប្រឹងប្រែងកសាងមុខមាត់ ក្នុងនាមជាមហាអំណាចមួយមានឥទ្ធិពល នៅក្នុងក្រសែភ្នែកក្រុមប្រទេសលោកខាងលិច។ ដូច្នេះទំនាក់ទំនងល្អជាមួយកាណាដា និងអាមេរិក គឺជារឿងចាំបាច់ ក្នុងបរិបទកសាងសម្ព័ន្ធភាពឥណ្ឌូប៉ាស៊ីហ្វិក។
ឆ្លើយនៅក្នុងបទសម្ភាសមួយ តាមបណ្តាញទូរទស្សន៍ CBS កាលពីថ្ងៃពុធ លោកនាយករដ្ឋមន្ត្រីកាណាដា យូស្តាំង ទ្រុយដូ បានទទួលស្គាល់ថាលោកបានសង្កេតឃើញថា ភាគីឥណ្ឌាពិតជាបានផ្លាប់ប្តូរឥរិយាបថ ល្អជាងមុន។
លោក ទ្រុយដូ បានថ្លែងថា ឥណ្ឌាទំនងជាបានយល់ហើយ ថាការប្រកែកដោះសារ ហើយប្រើសំដីវាយប្រហារមកលើកាណាដា វាមិនមែនជាដំណោះស្រាយទេ។ លោកបន្តថា អ្វីដែលកាណាដាចង់បាន គឺការសហការគ្នាធ្វើការ យោគយល់គ្នា ដើម្បីឈានទៅសម្រេចបានកិច្ចព្រមព្រៀងពាណិជ្ជកម្មមួយទៅថ្ងៃអនាគត។ តែទន្ទឹមគ្នានេះ កាណាដាប្តេជ្ញាការពារជាដាច់ខាត នូវសុខសុវត្ថិភាពរបស់ប្រជាជននៅលើទឹកដីកាណាដា។
យ៉ាងណាក៏ដោយ នៅក្នុងបទសម្ភាសឲ្យកាសែត Financial Times លោក ណារិន្រ្ទ ម៉ូឌី បានឆ្លៀតរំលឹកថា សម្រាប់ឥណ្ឌា ពួកសកម្មជនចលនាសាសនាស៊ីក្ខទាំងអស់ ដោយរាប់ទាំងអ្នកដែលគេប៉ុនប៉ងសម្លាប់នៅអាមេរិកនោះផង គឺសុទ្ធតែជាក្រុមភេរវកម្ម។ លោកម៉ូឌី បានបន្ថែមទៀតថា មិនគួរយករឿងរ៉ាងតិចតួចបែបនេះ មកធ្វើឲ្យខូចទំនាក់ទំនាក់ការទូត រវាងឥណ្ឌានិងសហរដ្ឋអាមេរិកនោះទេ៕