លោក Nicholas Spiro អ្នកវិភាគសេដ្ឋកិច្ចនៅក្រុមហ៊ុនអចលនទ្រព្យនៅទីក្រុងឡុងដ៍ បានចែករំលែកជាមួយកាសែត South China Morning Post អំពីសញ្ញានៃវិបត្តិទីផ្សារលំនៅដ្ឋាននៅអាស៊ីប៉ាស៊ីហ្វិក ដែលនៅតែបន្តអូសបន្លាយរយៈពេលវែង។

 

សម្រាប់ចិន ទីផ្សារលំនៅឋានបានធ្លាក់ចុះចាប់តាំងពីការដាក់គោលនយោបាយ«បន្ទាត់ក្រហមបី»របស់ទីក្រុងប៉េកាំងនៅពាក់កណ្តាលឆ្នាំ ២០២១។ គោលនយោបាយនេះបានកំណត់សមត្ថភាពរបស់ក្រុមហ៊ុនអចលនទ្រព្យក្នុងការខ្ចីប្រាក់កម្ចីថ្មី ដែលបណ្តាលឱ្យក្រុមហ៊ុនអចលនទ្រព្យខ្នាតយក្សជាច្រើននៅក្នុងប្រទេសនេះក្ស័យធន។

 

ស្របពេលប្រទេសផ្សេងជួបការលំបាកដោយសារកង្វះការផ្គត់ផ្គង់ ​ចិន​បាន​ប្រឈម​មុខ​នឹង​ស្ថានភាព​ផ្គត់ផ្គង់​ផ្ទះ​លើស​ចំណុះ​អស់​រយៈពេល​ជា​ច្រើន​ឆ្នាំ​។ ចំនួននៃការលក់ផ្ទះបានធ្លាក់ចុះ ដោយសារតែតម្រូវការទាបបណ្តាលមកពីចំនួនប្រជាជនវ័យចំណាស់ច្រើន ការថយចុះអត្រាកំណើត និងការផ្តល់អាទិភាពរបស់រដ្ឋាភិបាលជុំវិញការវិនិយោគរហូតដល់ការប្រើប្រាស់។

 

ទន្ទឹម​​នេះ ចិន​មាន​ផ្ទះ​រាប់​លាន​ខ្នង​ដែល​ត្រូវ​បាន​លក់​ចេញ ប៉ុន្តែ​មិន​ត្រូវ​បាន​ប្រគល់​ឱ្យ​អតិថិជន។ វិទ្យាស្ថានស្រាវជ្រាវ Nomura ដែលជាក្រុមហ៊ុនប្រឹក្សាយោបល់ដ៏ធំបំផុតរបស់ជប៉ុនបានប៉ាន់ប្រមាណថាមានផ្ទះប្រហែល ២០លានខ្នងមិនទាន់បានសាងសង់រួចរាល់។ ចំនួននេះគឺស្មើរ ២០ដងនៃទំហំផលិតផលរបស់ក្រុមហ៊ុន Country Garden Holdings ដែលជាក្រុមហ៊ុនអភិវឌ្ឍន៍អចលនទ្រព្យឯកជនដ៏ធំបំផុតមួយរបស់ចិន។ Nomura បានលើកឡើងថា ទីក្រុងប៉េកាំងទំនងនឹងត្រូវផ្តល់ការគាំទ្រផ្នែកហិរញ្ញវត្ថុដល់ក្រុមហ៊ុនអចលនទ្រព្យបន្ថែមទៀត។

 

មិនមែនតែចិនទេ សូម្បីតែប្រទេសដែលមានស្ថិរភាពនៅក្នុងតំបន់អាស៊ីប៉ាស៊ីហ្វិកក៏មានទីផ្សារលំនៅដ្ឋានកំពុងជាប់គាំងដែរ។ នៅ​អូស្ត្រាលី តម្លៃ​លំនៅឋាន​បាន​ធ្លាក់​ចុះ​ក្នុង​ទីក្រុង​ចំនួន​៣ ​ក្នុង​ចំណោម​ទីក្រុង​ចំនួន​៨ ​កាលពី​ខែវិច្ឆិកាក្នុងនោះមានទាំងក្រុងមែលប៊ន និងស៊ីដនី ។ អត្រាការប្រាក់បានកើនឡើងខ្លាំងជាងការរំពឹងទុក ការទិញបានធ្លាក់ចុះ ទំនុកចិត្តអ្នកប្រើប្រាស់ចុះខ្សោយ ព្រមទាំងការព្រួយបារម្ភអំពីការធ្លាក់ចុះសេដ្ឋកិច្ចបាននាំឱ្យមានវិបត្តិថ្មីមួយនៅក្នុងទីផ្សារលំនៅដ្ឋាន។  CoreLogic ដែលជាក្រុមហ៊ុនស្រាវជ្រាវហិរញ្ញវត្ថុនៅអូស្ត្រាលីយល់ថា គោលនយោបាយលើកកម្ពស់កំណើនទីផ្សារលំនៅដ្ឋានកំពុងបាត់បង់ប្រសិទ្ធភាព។

 

ចំណែកសិង្ហបុរី តម្លៃផ្ទះ និងប្រតិបត្តិការផ្នែកលក់អចលទ្រព្យមានការធ្លាក់ចុះយ៉ាងខ្លាំង។ ក្រុមហ៊ុនឈ្មួញកណ្តាលអចលនទ្រព្យ OrangeTee & Tie ព្យាករថា ការលក់ផ្ទះនៅសិង្ហបុរីនឹងធ្លាក់ចុះមកនៅត្រឹមចន្លោះ ១៦ពាន់យូនីតទៅ ១៩ពាន់យូនីតនៅឆ្នាំក្រោយ។ ចំនួននេះគឺស្មើរពាក់កណ្តាលនៃការលក់ក្នុងឆ្នាំ ២០២១។

 

លោក Nicholas Spiro បាននិយាយថា វិបត្តិទីផ្សារលំនៅដ្ឋានអាចរីករាលដាលដល់ជប៉ុន។ សេដ្ឋកិច្ចធំទីពីររបស់អាស៊ីកំពុងរងឥទ្ធិពលពីនិន្នាការរឹតបន្តឹងរូបិយវត្ថុរបស់ពិភពលោកនៅក្នុងបរិបទដែលធនាគារកណ្តាលជប៉ុន (BOJ) រក្សាគោលនយោបាយរូបិយវត្ថុដែលធូររលុងខ្លាំង។ ខណៈដែលធនាគារកណ្តាលអាម៉េរិក (Fed) ធនាគារកណ្តាលអឺរ៉ុប (ECB) និងធនាគារអង់គ្លេស (BOE) បន្តដំឡើងអត្រាការប្រាក់ដើម្បីទប់ទល់នឹងអតិផរណា BOJ បានរក្សាអត្រាការប្រាក់រយៈពេលខ្លីនៅកម្រិត - ០,១ភាគរយដែលបណ្តាលឱ្យប្រាក់យ៉េនបាត់បង់តម្លៃយ៉ាងខ្លាំងនាពេលថ្មីៗនេះ។

 

អ្នកជំនាញសេដ្ឋកិច្ចរូបនេះយល់ថា ជប៉ុនអាចនឹងបញ្ចប់អត្រាការប្រាក់អវិជ្ជមាននាពេលខាងមុខ លឿនជាងការរំពឹងទុករបស់ទីផ្សារ។ យ៉ាងណាក៏ដោយ ការណ៍នេះអាចជំរុញអត្រាការប្រាក់កម្ចីរយៈពេលខ្លីកើនខ្ពស់​ ដែលដាក់សម្ពាធលើកម្ចីទិញផ្ទះមានអត្រាការប្រាក់ធូរលុងមានប្រហែល៧០ភាគរយនៃប្រាក់កម្ចីទិញផ្ទះសរុបនៅជប៉ុន។

 

តម្លៃអាផាតមិននៅទីក្រុងតូក្យូបានកើនឡើងយ៉ាងខ្លាំងក្នុងរយៈពេលថ្មីៗនេះ ដែលស្មើរនឹងចំណុចកំពូលដូចទៅនិងវិបត្តិអចលទ្រព្យឆ្នាំ ១៩៨០។ ទីក្រុងផ្សេងទៀតនៅជប៉ុនក៏បានឃើញតម្លៃផ្ទះកើនឡើងយ៉ាងខ្លាំងចាប់តាំងពីឆ្នាំ ២០១៩ ដែលមួយផ្នែកត្រូវបានជំរុញដោយការបញ្ចាំដែលមានតម្លៃថោក។

 

ជារួម លោក Nicholas Spiro មើល​ឃើញ​ថា ទីផ្សារ​អចលន​ទ្រព្យ​ក្នុង​តំបន់​អាស៊ី​ប៉ាស៊ីហ្វិក​មាន​លក្ខណៈ​ចម្រុះ និង​ស្មុគស្មាញ។ បណ្តាប្រទេសជាច្រើនបានបង្ហាញពីភាពធន់លើសពីការរំពឹងទុក ប៉ុន្តែនៅតែមានសញ្ញានៃការធ្លាក់ចុះសេដ្ឋកិច្ច។ សេដ្ឋវិទូ​អង់គ្លេស​រូប​នេះ​បាន​អះអាងថា  សម្រាប់​ទីផ្សារ​អចលនទ្រព្យ​ជប៉ុន នឹងជួបវិបត្តិ​នៅ​ពេល​ខាង​មុខឆាប់ៗ ​៕