FIFA បានព្រមានទៅកាន់ប្រេស៊ីល ចំពោះវត្តមាននៅក្នុងការប្រកួតពានរង្វាន់ World Cup 2026 ដែលនឹងធ្វើឡើងនៅក្នុងប្រទេសអាមេរិក, កាណាដា និងម៉ិកស៊ិក និងការចូលរួមប្រកួតអន្តរជាតិនានា ក្រោយពេលរកឃើញថា ស្ថាប័នបាល់ទាត់ប្រេស៊ីលមានចេតនាជាក់ស្តែង ក្នុងការអន្តរាគមន៍ និងបញ្ជាឱ្យមានការបោះឆ្នោតជ្រើសរើសប្រធានាធិបតីថ្មី ដើម្បីជំនួសលោក Ednaldo Rodrigue​s ដែលជាប្រធានាធិបតី នាពេលបច្ចុប្បន្ន។
 

កាលពីដើមខែធ្នូ លោក E. Rodrigues ដែលមានវ័យ ៦៩ឆ្នាំ ព្រមទាំងសហការីរបស់លោក ដែលបានកាន់កាប់តំណែង ត្រូវបានដកចេញពីតំណែង បន្ទាប់ពីមានសេចក្តីសម្រេចរបស់តុលាការ នៅក្នុងទីក្រុងរីអូ ដោយចៅក្រមបានលើកឡើងពីភាពមិនប្រក្រតីនៅក្នុងការបោះឆ្នោត កាលពីឆ្នាំ ២០២២។ CBF បានជ្រៀតជ្រែកចូលក្នុងបញ្ហានេះ ដែលជាហេតុធ្វើឱ្យ FIFA ដាក់ការគំរាមកំហែងយ៉ាងធ្ងន់ធ្ងរលើខ្លួន។
 

លោក Jose Perdiz ដែលជាប្រធានតុលាការកីឡាកំពូលរបស់ប្រេស៊ីល ត្រូវបានតុលាការទីក្រុងរីអូ ចាត់ទុកលោកជាមនុស្សម្នាក់ ដែលអាចធ្វើអន្តរាគមន៍ក្នុងការរៀបចំការបោះឆ្នោតថ្មី សម្រាប់តំណែងប្រធានាធិបតី ក្នុងរយៈពេល ៣០ថ្ងៃ ។ ប៉ុន្តែ FIFA បានហាមឃាត់ការជ្រៀតជ្រែករបស់រដ្ឋាភិបាល និងភាគីទីបីនៅក្នុងសមាគមសមាជិករបស់ខ្លួន។
 

FIFA បានផ្ញើលិខិតទៅកាន់នាយកប្រតិបត្តិបាល់ទាត់ប្រេស៊ីល ​ដើម្បីព្រមាន CBF ដោយសហព័ន្ធ​និងក្រុមបាល់ទាត់ទាំងអស់របស់ប្រេស៊ីល ប្រឈមនឹងការព្យួរ បើសិនមិនអនុវត្តតាមការណែនាំរបស់ FIFA ដែលបានព្រមានទៅលើសហព័ន្ធ។ បើតាមការផ្សាយរបស់ទូរទស្សន៍ ESPN និងកាសែត The Associated Press អាជ្ញាធរបាល់ទាត់អាមេរិកខាងត្បូង CONMEBOL បានគាំទ្រដល់ចំណាត់ការរបស់ FIFA។
 

«FIFA និង CONMEBOL សូមបញ្ជាក់យ៉ាងមុតមាំថា រហូតទាល់តែមានបេសកកម្មបែបនេះកើតឡើង គ្មាការសម្រេចចិត្តណាមួយដែលប៉ះពាល់ដល់ CBF រួមទាំងការបោះឆ្នោត ឬការអំពាវនាវឱ្យមានការបោះឆ្នោតណាមួយឡើយ។ ប្រសិនបើរឿងនេះមិនត្រូវបានគោរពទេ FIFA និងមិនមានជម្រើសផ្សេងទៀតក្រៅពីបញ្ជូនបញ្ហាទៅស្ថាប័នដើម្បីសម្រេចចិត្តដែលពាក់ព័ន្ធរបស់ខ្លួនសម្រាប់ការពិចារណា និងសម្រេចការព្យួរផងដែរ។»។ នេះបើតាមការលើកឡើងរបស់ FIFA នៅក្នុងលិខិត ដែលបានផ្ញើទៅកាន់នាយករបស់ CBF។
 

ក្នុងលិខិតដដែលនោះ ប្រេស៊ីលអាចនឹងបាត់បង់សមាជិកភាពជាមួយនឹង FIFA ភ្លាមៗ រហូតដល់ការព្យួរត្រូវបានលើកលែង ដោយស្ថាប័នបាល់ទាត់ពិភពលោកឡើងវិញ ប្រសិនមិនគោរពតាមការណែនាំរបស់​ FIFA។
 

បច្ចុប្បន្នក្រុមជម្រើសជាតិប្រេស៊ីលកំពុងស្ថិតនៅចំណាត់ថ្នាក់លេខ ៦ នៅក្នុងតារាងប្រកួតជម្រុះ ​World Cup ឆ្នាំ ២០២៦ ក្នុងតំបន់ទ្វីបអាមេរិកខាងត្បូង (CONMEBOL) ក្រោយមានត្រឹម ៧ពិន្ទុ ក្នុងដៃប៉ុណ្ណោះ ពីការប្រកួតចំនួន ៦លើក។ លទ្ធផលការប្រកួត ៦លើកនេះ បានបង្ហាញពីការធ្លាក់ចុះយ៉ាងខ្លាំងរបស់ក្រុមជម្រើសជាតិប្រេស៊ីល លើការប្រកួតប្រជែងនៅឆាកអន្តរជាតិ ខុសពីឆ្នាំ ២០២២ ដែលពួកគេជាក្រុមមួយដែលប្រជែងគ្នាយ៉ាងខ្លាំងជាមួយនឹងក្រុមអាហ្សង់ទីន ដែលជាម្ចាស់ពាន World Cup ឆ្នាំ ២០២២៕