ដំណាំ​គម្រប​ដី គឺ​ការដាំ​ពពួក​ស្មៅ ដូចជា ប្រភេទ​ស្មៅ Sorghum,  Stylo, Jute, Sesbania, Pearl Millet, Juncea និង​ការដាំ​ដំណាំ   សណ្តែក ល្ង ជាដើម ដែលមាន​អាយុកាល​លូត​លាស់​​ពី​៦០​ ទៅ​៧៥​ថ្ងៃ ឬ​លើសពីនេះ​ទៅតាម​ប្រភេទ​ស្មៅ​នីមួយៗ​។ ចំពោះការជ្រើសរើស ដំណាំគម្របដី គឺអាស្រ័យលើដំណាំចម្បង ដែលនឹងដាំបន្ទាប់ពីដំណាំគម្របដី (ពិពិធកម្ម​ដំណាំ)។
 

«ដំណាំគម្របដី» ជាផ្នែកមួយនៃការអនុវត្តកសិកម្មអភិរក្សឬកសិអេកូឡូស៊ី។ ការអនុវត្ត​កសិកម្មនេះ លោក លោក ស វែង ជាទីប្រឹក្សាបច្ចេកទេសនៃមជ្ឈមណ្ឌលស្រាវជ្រាវ​អភិវឌ្ឍន៍កសិកម្មអភិរក្សនៅកម្ពុជា នៃក្រសួងកសិកម្មលើកឡើងថាគឺជាជួយដល់ការ​កែប្រែដីឱ្យមានជីវជាតិឡើងវិញបន្ទាប់ពីកសិករធ្វើការភ្ជួររាស់ដី ប្រើប្រាស់ថ្នាគីមី ដែល​ធ្វើឱ្យដីបាត់បង់គុណភាព។ 
 

លោកបន្ថែមទៀតថា ការអនុវត្តកសិកម្មនេះ មិនត្រឹមជួយកែខៃដីឱ្យមានគុណភាព​ប៉ុណ្ណោះ​ទេវាការចូលរួមទប់ស្កាត់ការប្រែប្រួលអាកាសធាតុផងដែរ តាមរយៈការចាប់យកឧស្ម័នផ្ទះ​កញ្ចក់​ពីបរិយាកាសដោយដំណាំគម្របដីនេះ និងជួយជាជម្រកដល់ប្រភេទសត្វរស់នៅ​ក្នុងដីដែលសត្វទាំងនោះបានធ្វើឱ្យដីធូរ។ 
 

ការដាំដំណាំគម្របដីនេះ ក៏ជាប្រភពចំណូលបន្ថែមបន្ទាប់ពីដំណាំចម្បងដែលកសិករ​ដាំ​ដុះផងដែរ។ លោក ស វែង បញ្ចាក់ថាការដាំប្រភេទដំណាំ «សង្ក្រងស្វាស្លឹកតូច» នៅលើ​ដី​មួយហិកតា កសិករអាចរកចំណូលបានប្រមាណ៥០០ ទៅ៦០០ដុល្លារក្នុងផ្ទៃដី១ហិកតា​៕