ភ្នំពេញ៖ ជំងឺទឹកនោមផ្អែម ជាជំងឺរ៉ាំរ៉ៃ ដែលតម្រូវឱ្យអ្នកជំងឺត្រូវតាមដានជាមួយគ្រូពេទ្យជំនាញជាប្រចាំ។ លោកវេជ្ជបណ្ឌិត ស៊ុំ សត្ថា ឯកទេសជំងឺទឹកនោមផ្អែម ក្រពេញ និងអ័រម៉ូន បានលើកឡើងថា ការប្រយុទ្ធប្រឆាំង នឹងជំងឺទឹកនោមផ្អែម គឺជាដំណើរដ៏វែងឆ្ងាយ ជាមួយ អ្នកជំងឺ ក្រុមគ្រួសារ ជាពិសេសក្រុមគ្រូពេទ្យ ដោយត្រូវមានមានទំនាក់ទំនងល្អ ជំនឿ ការទុកចិត្ត គុណធម៌ ក្រមសីលធម៌ និងវិជ្ជាជីវៈ។ បើតាម វេជ្ជបណ្ឌិត ស៊ុំ សត្ថា គ្រូពេទ្យទឹកនោមផ្អែម មិនត្រឹមតែព្យាបាលតែជំងឺទេ តែត្រូវនៅជាមួយអ្នកជំងឺពេញមួយជីវិត។ 
 

« ក្នុងនាមជាគ្រូពេទ្យទឹកនោមផ្អែម ខ្ញុំមានការចាប់អារម្មណ៍ថា មិនមែនជាគ្រូពេទ្យព្យាបាលជំងឺទៀតទេ គឺជាពេទ្យដែលព្យាបាលអ្នកជំងឺ ពីព្រោះអ្នកជំងឺទឹកនោមផ្អែម គាត់ទុកឱកាសឱ្យយើងជាគ្រូពេទ្យ ព្យាបាលគាត់ពេញមួយជីវិត»។ នេះជាការអះអាងរបស់ លោកវេជ្ជបណ្ឌិត ស៊ុំ សត្ថា នាក្នុងពិធីសម្ពោធមន្ទីរពហុព្យាបាល ខេ អេស តាខ្មៅ។