ជាតិ
វីដេអូ
កុមារកម្ពុជា នៅតែប្រឈមបញ្ហាក្រិសក្រិន និងស្គមស្គំាង
× ភ្នំពេញ៖ បញ្ហាក្រិសក្រិន និងស្គមស្គាំងលើកុមារនៅតែជាបញ្ហាចម្បងនៅកម្ពុជា។ បើតាមតួលេខរបស់ CDHS ឆ្នាំ២០២២បញ្ហាក្រិសក្រិនលើកុមារនៅកម្ពុជា មានចំនួន ២២ភាគរយ និងស្គមស្គមស្គាំងចំនួន១០ភាគរយ ដែលអត្រានេះ នៅទ្រឹងអត់ចុះ។
ក្នុងសិក្ខាសាលាពង្រឹងសមត្ថភាពអ្នកសារព័ត៌មានការចូលរួមជំរុញការអនុវត្តគោលការណ៍ប្រតិបត្តិថ្នាក់ជាតិ ស្ដីពីកិច្ចអន្តរាគមន៍សេវាផ្គត់ផ្គង់ទឹកស្អាត និងអនាម័យដែលគិតគូរដល់អាហារូបត្ថម្ភ នៅថ្ងៃទី២៨ ខែធ្នូ លោក ជា សំណាង អនុប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ បានលើកឡើងថា នៅកម្ពុជា កង្វះអាហារូបត្ថម្ភលើកុមារ មានបញ្ហាពីរធំៗ គឺក្រិសក្រិន និងស្គមស្គំាង។
«បញ្ហាក្រិសក្រិន គឺអាយុច្រើន កម្ពស់ទាប ដែលមានផលប៉ះពាល់ច្រើនសម្រាប់កុមារ។ ពេលធំដឹងក្ដីកាលណា ក្មេងដែលមានបញ្ហាក្រិសក្រិនការរៀនសូត្រមិនដូចក្មេង មានសុខភាពល្អនោះទេ និងមានការចងចាំក៏យឺតយ៉ាវ»។ នេះជាបញ្ជាក់បន្ថែមរបស់លោក ជា សំណាង។
សូមអញ្ជើញទស្សនាវីដេអូខាងក្រោមដូចតទៅ៖
បច្ចុប្បន្ន កម្ពុជា មានកុមារក្រិសក្រិនចំនួន ២២ភាគរយ និងស្គមស្គមស្គាំងចំនួន ១០ភាគរយ ដែលអត្រានេះ នៅទ្រឹងអត់ចុះ។
ចំណែកខេត្តដែលមានអត្រាប្រេវ៉ាឡង់ក្រិសក្រិនខ្ពស់ ដូចជាខេត្តរតនគិរី, មណ្ឌលគិរី, ស្ទឹងត្រែង, ពោធិ៍សាត់, កំពត និងខេត្តកែប។ នេះបើតាមរបាយការណ៍ CDHS ២០២២។
តាមការសិក្សាវិភាគពីផលប៉ះពាល់នៃភាពក្រិសក្រិន បង្ហាញថាកុមារក្រិសក្រិន មានផលប៉ះពាល់ដល់ការអភិវឌ្ឍផ្នែកប្រាជ្ញាស្មារតី និងសុខភាពដោយមិនអាចស្ដារមកភាពប្រក្រតីវិញបាន។ លើសពីនេះ កុមារក្រិសក្រិនមានបញ្ហាខ្សោយ អភិវឌ្ឍន៍ផ្នែកភាសាយឺតរៀនខ្សោយ អាចខ្វះជំនាញដែលមិនអាចធ្វើការងារឱ្យមានគុណភាព៕
Tag:
សុខភាព
អាហារូបត្ថម្ភ
កុមារ
ក្រិសក្រិន
ស្គមស្គាំង
© រក្សាសិទ្ធិដោយ thmeythmey.com