សេដ្ឋកិច្ចអន្តរជាតិ
អន្តរជាតិ
ចំនួនប្រជាជនពិភពលោកកើន៧៥លាននាក់នៅឆ្នាំនេះ, កើនដល់៨ពាន់លាននាក់ឆ្នាំ២០២៤ មនុស្សម្នាដើរកម្សាន្តក្នុងថ្ងៃ បុណ្យ ណូអែលនៅ ទីក្រុង Lisbon ព័រទុយហ្កាល់ ។ រូបភាព ៖ AP
× ចំនួនប្រជាជនពិភពលោកបានកើនឡើងចំនួន៧៥លាននាក់នៅក្នុងឆ្នាំ២០២៣។ តួលេខនេះនឹងធ្វើឲ្យចំនួនប្រជាជនសរុបកើនដល់ ៨ពាន់លាននាក់ចាប់ពីថ្ងៃចូលឆ្នាំសកលនេះតទៅ។ នេះបើតាមការចេញផ្សាយដោយការិយាល័យជំរឿនអាម៉េរិកនៅថ្ងៃទី២៨ ខែធ្នូ។
អត្រាកំណើនប្រជាជនទូទាំងពិភពលោកបានកើនឡើងត្រឹម ១ភាគរយប៉ុណ្ណោះនៅឆ្នាំ២០២៣ ។ នៅដើមឆ្នាំ២០២៤ អត្រាកំណើត៤,៣នាក់ និងអត្រាមរណៈ២នាក់ ត្រូវបានរំពឹងថានឹងកើតមាននៅទូទាំងពិភពលោករៀងរាល់វិនាទី។
ឯអត្រាកំណើនប្រជាជនសម្រាប់អាម៉េរិកនៅឆ្នាំ២០២៣ មានចំនួន ០,៥៣ភាគរយប្រហែលពាក់កណ្តាលនៃតួលេខទូទាំងពិភពលោក។ ប្រទេសនេះបានបន្ថែមប្រជាជន១,៧លាននាក់នៅឆ្នាំ២០២៣ ហើយធើ្វឲ្យមានចំនួនប្រជាជនសរុបនៅថ្ងៃចូលឆ្នាំសកលចំនួន៣៣៥,៨លាននាក់។
«ប្រសិនបើអត្រាបច្ចុប្បន្ននៅតែបន្ត វាអាចជាទសវត្សរ៍ដែលកើនឡើងយឺតបំផុតក្នុងប្រវត្តិសាស្ត្រអាម៉េរិក ជាមួយអត្រាកំណើនតិចជាង៤ភាគរយក្នុងរយៈពេល១០ឆ្នាំចាប់ពីឆ្នាំ២០២០ ដល់ឆ្នាំ២០៣០»។ លោក William Frey អ្នកប្រជាសាស្រ្តនៅវិទ្យាស្ថាន Brookings បានប្រាប់ទីភ្នាក់សារព័ត៌មាន AP បែបនេះ។
ទសវត្សរ៍ដែលមានកំណើនយឺតបំផុតគឺបន្ទាប់ពីវិបត្តិសេដ្ឋកិច្ចធំនៅទសវត្សរ៍ឆ្នាំ១៩៣០ ដែលអត្រាកំណើនមានដល់ទៅ ៧,៣ភាគរយ។ លោក William Frey បានបញ្ជាក់ថា ជាការពិតដែលអត្រាកំណើនប្រជាជនអាចកើនឡើងបន្តិចនៅពេលយើងចាកផុតពីឆ្នាំនៃជំងឺកូវីដ-១៩។ ប៉ុន្តែវានឹងនៅតែមានការលំបាកក្នុងការឡើងដល់ ៧,៣ភាគរយ។
នៅដើមឆ្នាំ២០២៤ អាម៉េរិកត្រូវបានរំពឹងថា នឹងមានអត្រាកំណើតម្នាក់រៀងរាល់៩វិនាទី និងស្លាប់ម្នាក់រៀងរាល់៩,៥វិនាទី។ យ៉ាងណា ចំនួនអន្តោប្រវេសន៍នឹងរក្សាចំនួនប្រជាជនមិនឲ្យធ្លាក់ចុះ។ ការធ្វើចំណាកស្រុកអន្តរជាតិសុទ្ធត្រូវបានរំពឹងថានឹងបន្ថែមមនុស្សម្នាក់ទៅចំនួនប្រជាជនអាម៉េរិករៀងរាល់ ២៨,៣វិនាទី៕
Tag:
ពិភពលោក
ចំនួនប្រជាជន
© រក្សាសិទ្ធិដោយ thmeythmey.com