ជាលើកទី២ ក្នុងពេលមួយខែ ក្រសួងការបរទេសអាម៉េរិក អនុម័តការលក់អាវុធឱ្យអ៊ីស្រាអែលដោយឆ្លងកាត់ការត្រួតពិនិត្យពីសភាឡើយ។ តាមច្បាប់អាម៉េរិក ក្រសួងការបរទេស ជាស្ថាប័នមានសិទ្ធិយល់ព្រមលើសំណើទិញអាវុធពីបរទេស ឯសភាជាអ្នកត្រួតពិនិត្យ។

 

នៅដើមខែធ្នូ ក្រសួងការបរទេសអាម៉េរិក បានអនុម័តការលក់ការលក់គ្រាប់ជិត១៤,០០០គ្រាប់សម្រាប់រថក្រោះកាណុង១២០មីលីម៉ែត្រទៅឱ្យអ៊ីស្រាអែល ដែលកំពុងប្រយុទ្ធជាមួយក្រុមហាម៉ាសនៅតំបន់កាហ្សា ដែលចាប់ផ្តើមក្នុងខែតុលា ក្រោយក្រុមនេះវាយប្រហារអ៊ីស្រាអែល។

 

ទីភ្នាក់ងារសហប្រតិបត្តិការសន្តិសុខការពារជាតិអាមេរិក បានបញ្ជាក់នៅក្នុងសេចក្តីថ្លែងការណ៍ថ្ងៃទី២៩ ខែធ្នូ ថា អ៊ីស្រាអែលបានស្នើសុំឱ្យបញ្ចូលកញ្ចប់ចុងក្រោយដែលមានគ្រាប់កាំភ្លើងទំហំ១៥៥មីលីម៉ែត្រ និងគ្រឿងបរិក្ខារមួយចំនួនទៀតទៅក្នុងសំណើលើកមុន ដែលធ្វើឱ្យសំណើចុងក្រោយកើនពី៩៦,៥១លានដុល្លារដល់១៤៧,៥លានដុល្លារ។ គម្រោងទិញនេះ ត្រូវការជូនដំណឹងថ្មីទៅសភា។

 

យ៉ាងណាមិញ ទីភ្នាក់ងារដដែលអះអាងថា រដ្ឋមន្រ្តីការបរទេសបានកំណត់ពីគ្រាអាសន្នដែលតម្រូវឱ្យលក់សព្វាវុធជាបន្ទាន់ទៅឱ្យរដ្ឋាភិបាលអ៊ីស្រាអែល ដោយមិនបាច់អនុវត្តតាមនីតិវិធីតម្រូវជាធម្មតាសម្រាប់ការត្រួតពិនិត្យដោយសភាឡើយ។ 

 

«អ៊ីស្រាអែលនឹងប្រើប្រាស់សមត្ថភាពដែលត្រូវបានពង្រឹង ជាការរារាំងការគំរាមកំហែងក្នុងតំបន់ និងដើម្បីពង្រឹងការការពាររបស់ខ្លួន»។ ទីភ្នាក់ងារដដែលបន្តបែបនេះ មុនលើកឡើងថា វាជាតួនាទីសម្រាប់ប្រទេសទាំងអស់ក្នុងការប្រើអាវុធយុទ្ធភ័ណ្ឌស្របតាមច្បាប់មនុស្សធម៌អន្តរជាតិ។

 

បន្ទាប់ពីការវាយប្រហារលើអ៊ីស្រាអែលពីសំណាក់ក្រុមហាម៉ាស អាម៉េរិកបានប្រញាប់ប្រញាល់ផ្តល់ជំនួយយោធាដល់អ៊ីស្រាអែលដែលវាយប្រហារកាហ្សាមិនឈប់ឈរ។ បើតាមក្រសួងសុខាភិបាលកាហ្សា មនុស្សយ៉ាងហោចណាស់២១,៥០៧នាក់បានបង់ជីវិតដែលភាគច្រើនជាស្ត្រី និងកុមារ៕