ការបោសសម្អាតអំពើពុករលួយក្នុងជួរកងកម្លាំងរ៉ុក្កែតដែលបញ្ជាអាវុធនុយក្លេអ៊ែរ និងនាយកដ្ឋានគ្រឿងបរិក្ខារយោធាចំណុះគណៈយោធាមជ្ឈិម ហាក់មិនថមថយឡើយ។ បន្ទាប់ពីរុះរើក្បាលម៉ាស៊ីនកម្លាំងរ៉ុក្កែត និងដកតំណែងរដ្ឋមន្ត្រីការពារជាតិ លី សាងហ្វូ កាលពីខែតុលា អតីតមេបញ្ជាការរបស់អង្គភាពនេះ ក៏ជាមុខសញ្ញាដែរ។

 

បើតាមទីភ្នាក់ងារព័ត៌មានរដ្ឋ Xinhua សមាជិកសភាដែលជាយោធា៩នាក់ ត្រូវបានបណ្ដេញចេញ។ ក្នុងចំណោមនេះ ៥នាក់គឺមកពីកងកម្លាំងរ៉ុក្កែតដែលរួមទាំងអតីតមេបញ្ជាការឧត្តមសេនីយ៍ Li Yuchao ដែលត្រូវបានរាយការណ៍នាពេលកន្លងមកថា ជាកម្មវត្ថុនៃការស៊ើបអង្កេតអំពើពុករលួយ។

 

មន្រ្តី២នាក់ទៀត ធ្លាប់បម្រើការនៅនាយកដ្ឋានអភិវឌ្ឍបរិក្ខារ។ នាយកដ្ឋានេះ កំពុងស្ថិតក្រោមការស៊ើបអង្កេតដែលចាប់ផ្ដើមកាលពីដើមឆ្នាំនេះ ជុំវិញអំពើពុករលួយលើការទិញគ្រឿងបរិក្ខារតាំងពីឆ្នាំ២០១៧ មក។ កាលនោះ លោក លី សាងហ្វូ ជាប្រធាននាយកដ្ឋាននេះតែម្ដង។ ចំណែកលោក Ding Laihang ដែលជាអតីតមេបញ្ជាការកងទ័ពអាកាស ក៏ត្រូវបានបណ្តេញចេញផងដែរនៅថ្ងៃទី២៩ ខែធ្នូ ខណៈដែលមនុស្សទី៩ មកពីកងទ័ពជើងទឹក។ 

 

ជាមួយការដកតំណែងនេះ ការចាប់ខ្លួនអាចកើតមានមិនខាន ព្រោះអស់អភ័យឯកសិទ្ធិជាសមាជិកសភាទៀតហើយ។

 

យុទ្ធនាការពេលនេះ ក៏បង្ហាញពីការបន្តបោសសម្អាតអំពើពុករលួយក្នុងជួរកងទ័ពរបស់ប្រធានាធិបតី ចិន ស៊ី ជិនភីង ដែលដាក់ចេញនៅឆ្នាំ២០១៤ មក។ យ៉ាងណាមិញ ក្រៅពីការដកតំណែង និងការបាត់ខ្លួនដោយគ្មានដំណឹងរាប់ខែ អាជ្ញាធរមិនបានបង្ហាញលទ្ធផលណាមួយលើការស៊ើបអង្កេតឡើយ ដែលនេះទំនងជាសញ្ញាថា ការស៊ើបអង្កេតកំពុងធ្វើឡើងនៅឡើយ៕