នៅឆ្នាំ២០២៣ ទីក្រុងព្យុងយ៉ាងបានជោគជ័យក្នុងការដាក់ផ្កាយរណបចារកម្មចូលទៅក្នុងគន្លងតារាវិថីកាលពីខែវិច្ឆិកា។ ចាប់តាំងពីពេលនោះមក កូរ៉េខាងជើងក៏អះអាងថា ខ្លួនកំពុងតាមដានទីតាំងយោធាសំខាន់ៗរបស់អាម៉េរិក និងកូរ៉េខាងត្បូង។ នៅឆ្នាំ២០២៣ កូរ៉េខាងជើង ក៏សាកល្បងអាវុធច្រើនជាងមុន។ នៅឆ្នាំក្រោយ កូរ៉េខាងជើងក៏ដាក់ផែនការបាញ់ផ្កាយរណបថែមទៀត។

 

ទីភ្នាក់ងារព័ត៌មានរដ្ឋកូរ៉េខាងជើង (KCNA) រាយការណ៍ថា ភារកិច្ចនៃការបាញ់បង្ហោះផ្កាយរណបឈ្លបយកការណ៍បន្ថែមចំនួន៣ នៅឆ្នាំ២០២៤  ត្រូវបានប្រកាសក្នុងកិច្ចប្រជុំគណៈមជ្ឈិមបក្សពលករអំឡុងកិច្ចប្រជុំចុងឆ្នាំ។ កិច្ចប្រជុំដែលបញ្ចប់នៅថ្ងៃទី៣១ ខែធ្នូ ក៏មានវត្តមានមេដឹកនាំ គីម ជុងអ៊ុន ដែរ។

 

ពីកិច្ចប្រជុំនេះ លោក គីម ក៏បន្ទោសអាម៉េរិកថា បានបង្កអស្ថិរភាពនយោបាយជាយូរមកហើយនៅឧបទ្វីបកូរ៉េ និងនៅតែបន្តបង្កការគំរាមកំហែងផ្នែកយោធាជាច្រើនទៀតដាក់កូរ៉េខាងជើង។ ប្រមុខដឹកនាំកូរ៉េខាងជើង ក៏ប្រកាសមិនស្វែងរកការផ្សះផ្សា និងការបង្រួបបង្រួមជាមួយកូរ៉េខាងត្បូងទៀតទេ ដោយយោងលើស្ថានភាពវិបត្តិដែលមិនអាចគ្រប់គ្រងបាន។ លោក គីម រុញរឿងនេះឱ្យក្រុងសេអ៊ូល និងវ៉ាស៊ីនតោនទទួលខុសត្រូវ។

 

ទីក្រុងសេអ៊ូល និងវ៉ាស៊ីនតោន រួមទាំងតូក្យូផង បានបង្កើនកិច្ចសហប្រតិបត្តិការលើវិស័យការពារជាតិ ដើម្បីប្រឈមមុខនឹងការគំរាមកំហែងដោយការបាញ់មីស៊ីលកាន់តែញឹកញាប់ និងកម្មវិធីនុយក្លេអ៊ែររបស់ទីក្រុងព្យុងយ៉ាង។ សម្ព័ន្ធមិត្តទាំង៣  ចែករំលែកទិន្នន័យពេលវេលាជាក់ស្តែងលើការបាញ់មីស៊ីលរបស់កូរ៉េខាងជើងថែមទៀត។ កូរ៉េខាងជើង ពិតជាក្ដៅស្លឹកត្រចៀកខ្លាំងនឹងរឿងនេះ។

 

បើតាម KCNA លោក គីម បានបញ្ជាឱ្យរៀបចំឡើងវិញស្ថាប័នដែលគ្រប់គ្រងព្រំដែន ដើម្បីការផ្លាស់ប្តូរជាមូលដ្ឋានថែមទៀត៕