នៅក្នុងលិខិតផ្ញើទៅកាន់មេដឹកនាំ BRICS លោកប្រធានាធិបតី Javier Milei បាននិយាយថា ការចូលរួមក្នុងប្លុកនេះគឺមិនទាន់សមស្របនៅខណៈនេះសម្រាប់អាហ្សង់ទីនឡើយ ។  នេះបើតាមលោក Manuel Adorni អ្នកនាំពាក្យខុទ្ទកាល័យប្រធានាធិបតីនៅថ្ងៃទី២៩ ខែធ្នូ។

 

មេដឹកនាំអាហ្សង់ទីនបានអះអាងថា គោលនយោបាយការបរទេសរបស់លោកគឺខុសពីរដ្ឋាភិបាលអណត្តិមុនៗ។ ដូច្នេះការសម្រេចចិត្តមួយចំនួននៅក្រោមរដ្ឋាភិបាលមុននឹងត្រូវបានពិនិត្យឡើងវិញ ។ លោក Milei ក៏បានសង្កត់ធ្ងន់លើការប្តេជ្ញាចិត្តរបស់អាហ្សង់ទីនក្នុងការពង្រឹងទំនាក់ទំនងទ្វេភាគីជាមួយសមាជិក BRICS ហើយទន្ទឹងរង់ចាំជួបជាមួយថ្នាក់ដឹកនាំនៃប្លុកនេះ។

 

BRICSជាក្រុមប្រទេសសេដ្ឋកិច្ចកំពុងរីកចម្រើនមានសមាជិកចំនួន ៥ រួមមាន ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ដែលមានចំនួនជាង ៤០ភាគរយនៃចំនួនប្រជាជនពិភពលោក និងប្រហែល ១ភាគ៤នៃផលិតផលក្នុងស្រុកសរុបរបស់ពិភពលោក។ 

 

នៅក្នុងកិច្ចប្រជុំកំពូលខែសីហា BRICS បានអនុម័តសេចក្តីថ្លែងការណ៍រួមមួយដែលបានទទួលស្គាល់សមាជិកថ្មីចំនួន ៦ រួមមាន អាហ្សង់ទីន អេហ្ស៊ីប អ៊ីរ៉ង់ អេត្យូពី អារ៉ាប៊ីសាអូឌីត និងអេមីរ៉ាតអារ៉ាប់រួមចាប់ពីឆ្នាំ ២០២៤។ នាពេលនោះ ប្រធានាធិបតីអាហ្សង់ទីន លោក Alberto Fernandez បាននិយាយថា ការចូលរួម BRICS នឹងបើកបរិបទថ្មី សម្រាប់ប្រទេស។

 

លោក Javier Milei ជាអ្នកនយោបាយស្តាំនិយមដែលជាប់ឆ្នោតជាប្រធានាធិបតីអាហ្សង់ទីន និងស្បថចូលកាន់តំណែងនៅថ្ងៃទី១០ ខែធ្នូ។ លោកប្រឆាំងអាហ្សង់ទីនដែលចូលរួមជាមួយ BRICS និងមិនគាំទ្រទំនាក់ទំនងសេដ្ឋកិច្ចជាមួយចិន និងប្រេស៊ីលឡើយ។ ផ្ទុយ​ទៅ​វិញ លោក​ចង់​ពង្រឹង​ទំនាក់​ទំនង​សេដ្ឋកិច្ច​ជាមួយ​អាម៉េរិក និង ​អ៊ីស្រាអែល។ 

 

ជុំវិញការបដិសេធរបស់អាហ្សង់ទីននេះ ប្រធានាធិបតីវេណេហ្ស៊ុយអេឡា លោក Nicolas Maduro បាននិយាយថា សមភាគីអាហ្សង់ទីនដែលដឹកនាំដោយលោក Milei គឺល្ងង់នៅពេលដែលសម្រេចចិត្តបដិសេធការអញ្ជើញឱ្យចូលរួមក្នុងប្លុក BRICS ។

 

«ប្រធានាធិបតី Javier Milei មិនបានធ្វើសកម្មភាពសម្រាប់ប្រជាជនអាហ្សង់ទីនទេ នៅពេលដែលលោករារាំងប្រទេសមិនឱ្យចូលរួមជាមួយ BRICS ។ នេះជាសកម្មភាពដ៏ល្ងង់ខ្លៅ និងឆោតបំផុតដែលលោក Milei បានធ្វើចំពោះអាហ្សង់ទីន»។ លោក Nicolas Maduro បានលើកឡើងនៅក្នុងបទសម្ភាសមួយជាមួយកាសែត Monde នៅថ្ងៃទី១ ខែមករា៕​