អន្តរជាតិ
កូរ៉េខាងត្បូងតវ៉ានឹងជប៉ុន ដែលបញ្ចូលកោះដុកដូទៅក្នុងផែនទីប្រកាសអាសន្នរលកស៊ូណាមិ អ្នកនាំពាក្យក្រសួងការបរទេសកូរ៉េខាងត្បូង លោកLim Soo Suk (រូបក្នុងរង្វង់)។ រូបភាព Yonhap
× ក្រសួងការបរទេសកូរ៉េខាងត្បូង នៅថ្ងៃទី២ ខែមករា បានតវ៉ាយ៉ាងខ្លាំងប្រឆាំងនឹងទីភ្នាក់ងារ អាកាសធាតុជប៉ុនដែលបានបញ្ចូលកោះដុកដូ (Dokdo) ទៅក្នុងការប្រកាសអាសន្ននៃរលកយក្សស៊ូណាមិ ស្របពេលមានកម្រិតរញ្ជួយដី ៧,៦ រ៉ិចទ័រដែលបានវាយប្រហារជប៉ុន នៅថ្ងៃទី១ ខែមករា។
លើគេហទំព័ររបស់ទីភ្នាក់ងារឧតុនិយមជប៉ុន ផែនទីមួយបានបង្ហាញពីការជូនដំណឹង ដែលក្នុង នោះកូនកោះដុកដូត្រូវបានបន្លិចជាពណ៌លឿងរួមជាមួយតំបន់ផ្សេងៗទៀតរបស់ជប៉ុន នៅក្នុងសមុទ្រខាងកើត។ សញ្ញាពណ៌លឿងចង្អុលបង្ហាញថា តំបន់ទាំងនោះអាចរងការវាយប្រហារដោយរលកយក្សស៊ូណាមិ។
«រដ្ឋាភិបាលរបស់ពួកយើងជំទាស់ដាច់ខាតនឹងជប៉ុន តាមរយៈការទូត និងទាមទារ ឱ្យចាត់វិធានការកែតម្រូវ»។ អ្នកនាំពាក្យក្រសួងការបរទេសកូរ៉េខាងត្បូង លោកLim Soo Suk មានប្រសាសន៍បែបនេះក្នុងសន្និសីទសារព័ត៌មានមួយ រួចបន្ថែមថា គ្មានជម្លោះទឹកដីឡើយទាក់ទងនឹងកោះដុកដូ។
អ្នកនាំពាក្យរូបនេះក៏បានរម្លឹកពីកោះមួយនេះដែលជាផ្នែកសំខាន់មួយនៃទឹកដីកូរ៉េខាងត្បូង ដោយផ្អែកតាមប្រវត្តិសាស្ត្រ ភូមិសាស្ត្រ និងក្រោមច្បាប់អន្តរជាតិផងដែរ។ ទោះជាយ៉ាងណា ក៏ដោយ បើតាមមន្ត្រីនៃក្រសួងខាងការបរទេសកូរ៉េខាងត្បូងមិនបញ្ចេញឈ្មោះម្នាក់ បានសម្គាល់ថា ក្រុងសេអ៊ូលមិនបានស្នើទៅមន្ត្រីជប៉ុនណាមួយឡើយក្នុងការដាក់ការតវ៉ាខាងលើ ។
គ្រោះរញ្ជួយដី បានវាយប្រហារឧបទ្វីប Noto និងតំបន់ជុំវិញក្នុងខេត្ត Ishikawa របស់ជប៉ុននៅថ្ងៃចូលឆ្នាំថ្មី ហើយតាមសេចក្តីរាយការណ៍ ការវាយប្រហារនេះសម្លាប់ មនុស្សជាច្រើននាក់ និងបង្កឱ្យមានរលកធំៗ នៅឆ្នេរសមុទ្រភាគខាងកើតរបស់កូរ៉េខាងត្បូងផងដែរ។ យ៉ាងណាមិញ រហូតមកដល់ពេលនេះ កូរ៉េខាងត្បូងមិនទាន់រាយការណ៍អំពីអ្នកស្លាប់ ឬរងរបួសនៅកូរ៉េខាងត្បូងនៅឡើយ។
គួរបញ្ជាក់ថា កោះដុកដូដែលស្ថិតនៅចន្លោះទ្វីបកូរ៉េ និងជប៉ុនបានក្លាយជាឧបសគ្គក្នុងទំនាក់ ទំនងរវាងប្រទេសទាំងពីរជាយូរមកហើយតាំងពីឆ្នាំ ១៩៤៥ ដែលជាទីបញ្ចប់នៃសង្គ្រាម លោកលើកទីពីរ ក៏ដូចជាការឈ្លានពានរបស់ជប៉ុនផងដែរ។ ជប៉ុនបានបញ្ចូលកោះនេះពីកូរ៉េនៅឆ្នាំ ១៩០៥ ហើយបានបន្តធ្វើអាណានិគមកូរ៉េទាំងស្រុងនៅឆ្នាំ ១៩១០។
នៅឆ្នាំ ១៩៥៤ កូរ៉េខាងត្បូងបានកាន់កាប់កោះដុកដូ ឬ Takeshima ជាភាសាជប៉ុន ហើយចាប់តាំងពីពេលនោះមកបានអនុវត្តការគ្រប់គ្រងជាក់ស្តែងលើកោះនេះ បីទោះជប៉ុន ជំទាស់ថាជាការកាន់កាប់ខុសច្បាប់ក៏ដោយ។ តាមទស្សនៈរបស់កូរ៉េខាងត្បូង កោះនេះគឺជានិមិត្តរូបនៃមោទនភាព និងជាសញ្ញាសម្គាល់នៃឯករាជ្យភាពរបស់កូរ៉េពីអាណានិគមរបស់ជប៉ុន។ កូរ៉េខាងត្បូងរក្សាប៉ូលិសមួយចំនួនតូចនៅលើកូនកោះនោះ ប៉ុន្តែគ្រប់គ្រងប្រកបដោយប្រសិទ្ធភាព៕
© រក្សាសិទ្ធិដោយ thmeythmey.com