តាមការបញ្ជាក់របស់អ្នកនាំពាក្យក្រសួងសន្តិសុខសាធារណៈ លោក To An Xo នៅថ្ងៃទី២ ខែមករា លោក Tran Van Hiep ដែលជាចៅហ្វាយខេត្ត Lam Dong ដែលស្ថិតនៅភាគកណ្តាលវៀតណាម ត្រូវបានចាប់ខ្លួនដោយកម្លាំងប្រឆាំងអំពើពុករលួយពីបទទទួលសំណូក។ 

 

ប៉ូលិស និងមន្រ្តីតំណាងពីមហាអយ្យការវៀតណាមនៅម៉ោង ៣រសៀល ក្នុងថ្ងៃទី២ ខែមករា បានចុះទៅឆែកឆេរផ្ទះរបស់លោក Tran Van Hiep នៅក្នុង Dalat និងចាប់ខ្លួនលោក។ ករណីចាប់ខ្លួនចៅហ្វាយខេត្តវ័យ ៥៨ឆ្នាំនេះ ជាផ្នែកមួយនៃការបោសសម្អាតមន្រ្តីជាន់ខ្ពស់វៀតណាម ពាក់ព័ន្ធនឹងអំពើពុករលួយ។ 

 

លោក Hiep បានកាន់តំណែងដ៏សំខាន់មួយនេះ ចាប់តាំងពីឆ្នាំ២០២០ មក។ ចំណែកការស៊ើបអង្កេតពាក់ព័ន្ធនឹងអំពើខុសច្បាប់ កំពុងតែដំណើរការនីតិវិធី។ 

 

នៅក្នុងឆ្នាំ២០២០ កន្លងមក ការិយាល័យត្រួតពិនិត្យរបស់រដ្ឋាភិបាលវៀតណាម បានបញ្ជាមន្រ្តីឱ្យបញ្ចប់ប្រតិបត្តិការ និងរឹបអូសដីពីគម្រោងចំនួន ៣ ដែលបានបំពានច្បាប់ភូមិបាល និងច្បាប់វិនិយោគ ដោយក្នុងនោះរួមមានក្រុមហ៊ុនវិនិយោគលើវិស័យទេសចរ Saigon-Dai Ninh ផងដែរ។ 

 

កន្លែងកម្សាន្ត និងតំបន់ពាណិជ្ជកម្ម Dai Ninh មានទំហំ ៣៥៩៥ហិចតា ដោយក្នុងនោះមានទាំងដីព្រៃសម្រាប់ជួល ១០៥០ ហិចតា។ កន្លែងកម្សាន្ត និងតំបន់ពាណិជ្ជកម្មមួយនេះ មានទំហំវិនិយោគសរុប ១,០៤ពាន់លានដុល្លារ និងបានចាប់ផ្តើមពីចន្លោះឆ្នាំ២០១០ ដល់២០១៨។ មកទល់ពេលនេះ មានតែសំណង់ប៉ុន្មានខ្នងប៉ុណ្ណោះ ត្រូវបានបំផ្លាញចោល ខណៈដីព្រៃត្រូវបានបំពាន។ 

 

កន្លងមក វៀតណាម ក៏បានចាប់ខ្លួនប្រធានមន្ទីរអធិការកិច្ច នៅក្នុងខេត្តមួយនេះ ពាក់ព័ន្ធនឹងបទចោទទទួលសំណូកដដែលផងដែរ៕