បញ្ជាក់ប្រាប់សារព័ត៌មានឌីជីថលថ្មីៗ (ThmeyThmey) គ្រូបង្វឹកកីឡាប្រដាល់គុនខ្មែររូបនេះ នៅតែមានការសោកស្តាយចំពោះការផ្ទេរកីឡាករ ដែលជាសមិទ្ធផលរបស់ខ្លួនបានបង្កើតមករយៈពេលជាង១០ឆ្នាំ។
 

«ខ្ញុំចង់ដកខ្លួនចេញពីវិស័យមួយនេះសិន ដោយសារមានអារម្មណ៍ នឿយណាយ និងតានតឹងក្នុងវិស័យនេះ ដ្បិតមានបញ្ហាច្រើនមួយរយៈចុងក្រោយ។ នេះជាការអះអាងរបស់លោក ស៊ន អេលីត មុនបន្ថែមថាការដកខ្លួននេះមិនដឹងថាក្នុងរយៈពេលខ្លី វែង ឬលែងត្រឡប់វិញនោះឡើយ។
 

ជាមួយនឹងការបង្ហាញការសោកស្តាយ រហូតផ្ទេរការគ្រប់គ្រង អតីតកីឡាករជម្រើសជាតិកីឡាប្រដាល់សកល និងតេក្វាន់ដូ WT ក៏បង្ហាញការខកចិត្តដោយសារក្តីស្រមៃចង់នាំកីឡាប្រដាល់គុនខ្មែរឈានដល់ឆាកអន្តរជាតិប្រកដោយគុណភាព និងដើម្បីផ្សព្វផ្សាយទៅពិភពលោក បែជាផ្ទុយស្រលះពីការចង់បាន។ លោក ស៊ន អេលីត ប្រាប់ពីមូលហេតុមួយចំនួនជុំវិញការចាកចេញនេះទៀតថា៖«មួយរយៈនេះមានបញ្ហាច្រើនពេកចំពោះខ្ញុំ ដែលកើតឡើងដោយសារបញ្ហាផលប្រយជន៍ ដែលធ្វើឱ្យខ្ញុំធុញទ្រាន់ និងធ្ងន់ខ្លួន រហូតសម្រេចចិត្តទម្លាក់ចោល ដោយការចាកចេញនេះ»។
 

យ៉ាងណាក៏ដោយ ប្រសិនបើខ្លួនមានឱកាសល្អសមរម្យណាមួយត្រឡប់ចូលវិស័យប្រដាល់គុនខ្មែរនេះវិញ អតីតកីឡាករវ៉ូវីណាមរូបនេះ ទំនងជាមិនជ្រើសរើសយកការបើកក្លិបប្រដាល់ ឬធ្វើជាគ្រូបង្វឹកនោះទេ ប៉ុន្តែអាចធ្វើជា Promoter ក្នុងការដឹកនាំកីឡាករឱ្យឡើងប្រកួតវិញ៕