RFI
អន្តរជាតិ
រឿងអាស្រូវគៃបន្លំប្រាក់៖ អ្នកតំណាងរាស្ត្រជប៉ុនម្នាក់ ត្រូវចាប់ឃាត់ខ្លួន
លោក អុីគេដា យោស៊ីតាកា អ្នកតំណាងរាស្ត្រជប៉ុន ឈរនៅជួរទី២ ខាងស្តាំដៃ។ AP
×![]()
ដោយ៖ហេង ឧត្តម/ RFI
ថ្ងៃអាទិត្យ ទី៧មករា អ្នកតំណាងរាស្ត្រម្នាក់ មកពីបក្សកាន់អំណាចជប៉ុន ត្រូវនគរបាលចាប់ឃាត់ខ្លួន។ ជំនួយការម្នាក់របស់អ្នកតំណាងរាស្ត្ររូបនេះ ក៏ត្រូវប៉ូលិសចាប់ខ្លួនដែរ។ នេះបើតាមព្រះរាជអាជ្ញាជប៉ុនដែលបានប្រកាសផ្តើមអនុវត្តនីតិវិធីចាប់ឃុំខ្លួន ជាលើកទី១ ចំពោះសំណុំរឿងអាស្រូវគៃបន្លំប្រាក់មូលនិធិគណបក្ស។ សំណុំរឿងអាស្រូវនេះ បានបង្ខំជំរុញឲ្យ រដ្ឋាភិបាលជប៉ុន សម្រេចដកតំណែងនិងផ្លាស់ប្តូររដ្ឋមន្ត្រីដ៏ទៅបួននាក់ និងមន្ត្រីជាប់ពាក់ព័ន្ធមួយចំនួនផង កាលពីខែមុន។
អ្នកតំណាងរាស្ត្រជប៉ុន លោក អ៊ីគេដា យោស៊ីតាកា វ័យ ៥៧ ឆ្នាំ ហើយនិង អ្នកជំនួយការផ្នែកនយោបាយម្នាក់ អាយុ ៤៥ ឆ្នាំ ត្រូវឃាត់ខ្លួន ក្រោមបទចោទលួចគៃបន្លំអំណោយមូលនិធិសម្រាប់គណបក្ស និងបំពានលើច្បាប់ស្តីពីការគ្រប់គ្រងហិរញ្ញវត្ថុគណបក្សនយោបាយ។
បើតាមព្រះរាជអាជ្ញារាជធានីតូក្យូ គឺលោក អ៊ីគេដា យោស៊ីតាកា បានកិបកេងលុយមូលនិធិបក្ស ហើយនិងចែកផលប្រយោជន៍ខ្លះទៅសមាជិកផ្សេងទៀតដែរ ជាច្រើននាក់ ប៉ុន្តែ ប្រាកដណាស់ថា រូបលោកបានប្រយោជន៍ច្រើនជាងគេ។ ចំណែក ជំនួយការរបស់លោក ក៏បានជួយឃុបឃិត លាក់បាំងរឿងនេះ និងធ្វើរបាយការណ៍ក្លែងក្លាយ។ បើតាមកាសែតក្នុងស្រុកជប៉ុន គឺជនជាប់ចោទ បានសន្យាសហការជាមួយប៉ូលិសស៊ើបអង្កេត។ តែបើតាមព្រះរាជអាជ្ញាជប៉ុន ការចាប់ខ្លួននៅអាទិត្យនេះ ក៏ដើម្បីកុំឲ្យជនសង្ស័យឆ្លៀតឱកាសបំផ្លាញភស្តុតាង។
កាសែតក្នុងស្រុកជប៉ុន ចុះផ្សាយថា ពួកគេបានបិទបាំង មិនប្រកាស ទឹកប្រាក់ជាង ៣០ម៉ឺនអឺរ៉ូ ដែលពួកគេបានទទួលពីការរៃអង្គាសមូលនិធិសម្រាប់គណបក្ស ចន្លោះពីឆ្នាំ ២០១៧ ដល់ឆ្នាំ ២០២២។ ទន្ទឹមនឹងគ្នានេះដែរ ព្រះរាជអាជ្ញា ក៏បើកការស៊ើបអង្កេត និងបានចុះទៅឆែកឈេរ ការិយាល័យសមាជិកជាង១០នាក់ របស់បក្សកាន់អំណាច ដែលត្រូវជាប់សង្ស័យក្នុងសំណុំរឿងដដែលនេះ។
ជុំវិញរឿងនេះ ទាំងអគ្គលេខាធិការគណបក្សសេរីប្រជាធិបតេយ្យ និង នាយករដ្ឋមន្ត្រីជប៉ុន ហ្វូមីអូ គីស៊ីដា សុទ្ធតែបញ្ជាក់ព្រមគ្នាថា អ្នកតំណាងរាស្ត្រ លោក អ៊ីគេដា យោស៊ីតាកា ត្រូវសម្រេចដកបេក្ខភាពចេញពីសមាជិករបស់បក្សហើយ។
ជាការកត់សម្គាល់ ទាំងអ្នកតំណាងរាស្ត្រត្រូវចាប់ខ្លួនថ្ងៃអាទិត្យទី៧មករា និង រដ្ឋមន្ត្រីបួននាក់ ដែលលាលែងចេញពីមុខតំណែងដោយសារជាប់ពាក់ព័ន្ធនឹងរឿងអាស្រូវហិរញ្ញវត្ថុ កាលពីខែមុន គឺសុទ្ធសឹងជាសមាជិកក្រុមគាំទ្ររបស់អតីតនាយករដ្ឋមន្រ្តី ជប៉ុន លោកស៊្ហីនហ្សូ អាបេ ដែលត្រូវខ្មាន់កាំភ្លើងបាញ់សម្លាប់ កាលពីឆ្នាំ ២០២២។
សព្វថ្ងៃនេះ រដ្ឋាភិបាលរបស់លោក ហ្វូមីអូ គីស៊ីដា កំពុងអប្រជាប្រិយភាព។ អប្រជាប្រិយភាព ព្រោះតែបញ្ហាអតិផរណា លុយយ៉េនចុះថោក ហើយ លទ្ធភាពទិញ(អំណាចទិញ) របស់ប្រជាជន ចុះថយ។ រឿងអាស្រូវផ្ទួនៗគ្នានេះ ក៏កាន់តែធ្វើឲ្យមុខមាត់រដ្ឋាភិបាលជប៉ុន ដុនដាបខ្លាំងមួយកម្រិតទៀត៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
