ប្រធានាធិបតី Mohamed Muizzu នៅថ្ងៃទី៧ ខែមករាបានព្យួរតំណែង និងការងារអនុរដ្ឋមន្ត្រី៣រូប បន្ទាប់ពីពួកគេបានប្រើពាក្យប្រមាថទៅលើនាយករដ្ឋមន្ត្រីឥណ្ឌា នារិន្ទ្រា ម៉ូឌី។
បើតាមទីភ្នាក់ងារព័ត៌មានបារាំង AFP អនុរដ្ឋមន្ត្រី៣រូបដែលត្រូវព្យួរតំណែងមានឈ្មោះ Malsha Shareef, Mariyam Shiuna និង Abdulla Mahzoom Majid ដែលកំពុងធ្វើការនៅក្រសួងយុវជនរបស់ម៉ាល់ឌីវ ។
ក្នុងសេចក្តីថ្លែងការណ៍មួយចេញនៅថ្ងៃទី៧ ខែមករា រដ្ឋាភិបាលម៉ាល់ឌីវបានបញ្ជាក់ថា៖ « រដ្ឋាភិបាល ដឹងពីការប្រមាថមើលងាយលើវេទិកាប្រព័ន្ធផ្សព្វផ្សាយសង្គម ដែលសំដៅលើមេដឹកនាំបរទេស និងឥស្សរជនជាន់ខ្ពស់... មតិទាំងនេះមិនតំណាងឱ្យជំហររបស់រដ្ឋាភិបាលម៉ាល់ឌីវទេ»។
បើតាមសេចក្តីថ្លែងការណ៍ខាងលើ ប្រធានាធិបតី Mohamed Muizzu បានព្យួរមន្ត្រីទាំងបីនេះពីការងារដោយរង់ចាំការស៊ើបអង្កេត។
មុនការព្យួរតំណែង មន្ត្រីម៉ាល់ឌីវទាំង៣រូបខាងលើបានហៅនាយករដ្ឋមន្ត្រីឥណ្ឌា ថាជា « តួកំប្លែង ជាភេរវករ និងជាអាយ៉ងរបស់ អុីស្រាអែល» នៅលើបណ្តាញទំនាក់ទំនងសង្គម X ជុំវិញសកម្មភាពរបស់មេដឹកនាំរូបនេះទៅកាន់កោះ Lakshadweep របស់ឥណ្ឌា ដើម្បីផ្សព្វផ្សាយទេសចរណ៍ក្នុងស្រុក។
កាលពីថ្ងៃទី៤ ខែមករា លោក ម៉ូឌី បានសរសើរឆ្នេរលើប្រជុំកោះ Lakshadweep នៅលើបណ្តាញសង្គម។ នាយករដ្ឋមន្ត្រីឥណ្ឌាបានបង្ហោះរូបថតខ្លួនដែលកំពុងមុជទឹកនៅនោះ ហើយចង់ឱ្យកោះទាំងនេះគួរតែស្ថិតនៅក្នុងបញ្ជីដែលត្រូវទៅកម្សាន្តដោយអ្នកផ្សងព្រេង។
កោះ Lakshadweep មានចម្ងាយប្រហែល១៣០គីឡូម៉ែត្រពីម៉ាល់ឌីវ។
ភាពចម្រូងចម្រាសបានកើតឡើងមុនដំណើរទស្សនកិច្ចរបស់លោកប្រធានាធិបតី Muizzu ទៅកាន់ចិនដែលនឹងធ្វើនៅថ្ងៃទី ៨-១២ ខែមករា។ លោក Muizzu បានឈ្នះការបោះឆ្នោតកាលពីឆ្នាំមុនដោយសន្យាថានឹងបញ្ចប់គោលនយោបាយឥណ្ឌាដំបូង (India first) របស់ម៉ាល់ឌីវនៅក្នុងតំបន់ដែលទីក្រុងញូវដែលី និងទីក្រុងប៉េកាំងប្រកួតប្រជែងដណ្តើមឥទ្ធិពល។
លោក Muizzu ក៏បានសន្យាឱ្យឥណ្ឌាដកកងកម្លាំងរបស់ខ្លួន៧៥នាក់ដែលឈរជើងនៅនៅម៉ាល់ឌីវផងដែរ។ ម៉ាល់ឌីវជាប្រទេសដែលមានប្រជាជនត្រឹមតែជាងកន្លះលាននាក់ប៉ុណ្ណោះ។
មន្ត្រីជាន់ខ្ពស់ម៉ាល់ឌីវបានអះអាងថា ប្រទេសនេះមានការព្រួយបារម្ភអំពីផលវិបាកនៃសេចក្តីថ្លែងការណ៍របស់មន្ត្រីទាំងបីខាងលើ ដោយសារជនជាតិឥណ្ឌាជាក្រុមភ្ញៀវទេសចរបរទេសច្រើនជាងគេនៅម៉ាល់ឌីវ ខណៈវិស័យមួយនេះមានជិតមួយភាគបីនៃទំហំសេដ្ឋកិច្ចរបស់ខ្លួន៕