អនុរដ្ឋមន្ត្រីក្រសួងហិរញ្ញវត្ថុ លោក Julapun Amornvivat បានប្រាប់អ្នកយកព័ត៌មានថា ការិយាល័យក្រុមប្រឹក្សារដ្ឋដែលជាក្រុមឯករាជ្យ និងផ្តល់ការណែនាំផ្លូវច្បាប់ដល់រដ្ឋាភិបាល មិនបានរកឃើញហេតុផលណាមួយដែលអាចហាមឃាត់រដ្ឋាភិបាលពីការខ្ចីប្រាក់ដើម្បីផ្តល់ មូលនិធិដល់ផែនការចែកចាយថវិកាដល់ប្រជាជនឡើយ។ កម្មវិធីផ្តល់ប្រាក់ចំនួន ២៨៥ ដុល្លារក្នុងម្នាក់ ដល់ប្រជាជនថៃចំនួន ៥០លាននាក់ដើម្បីចំណាយក្នុងសហគមន៍មូលដ្ឋានរបស់ពួកគេ គឺជាគោលនយោបាយដែលបានឃោសនាការបោះឆ្នោតរបស់គណបក្សភឿថៃដែលកំពុងកាន់អំណាច។

 

ផែនការដែលហៅថា «កាបូបឌីជីថល» ត្រូវបានទទួលរងការរិះគន់ពីអ្នកសេដ្ឋកិច្ច និងអតីតទេសាភិបាលធនាគារកណ្តាលមួយចំនួន ដែលបានព្រមានថា ផែនការនេះធ្វើឡើង ដោយគ្មានការទទួលខុសត្រូវផ្នែកសារពើពន្ធ និងអតិផរណាឥន្ធនៈ។ កាលពីឆ្នាំមុន រដ្ឋាភិបាលបានស្វែងរកមតិយោបល់ពីការិយាល័យក្រុមប្រឹក្សារដ្ឋស្តីពីភាពស្របច្បាប់នៃវិក័យប័ត្រខ្ចីប្រាក់សម្រាប់កម្មវិធីមួយនេះ។

 

លោក​ Julapun បញ្ជាក់បន្ថែមផងដែរថា កម្ចីសម្រាប់គម្រោងមួយនេះអាចធ្វើទៅរួចក្រោមអំណាចនៃគណៈរដ្ឋមន្ត្រី និងគណៈកម្មាធិការកាបូបឌីជីថល។ យ៉ាងណាមិញ កម្មវិធី​នេះ​គួរ​តែ ​ចាប់​ផ្តើម​ក្នុង​ពេល​មាន​វិបត្តិ​សេដ្ឋកិច្ច​ប៉ុណ្ណោះ ហើយ​រដ្ឋាភិបាល​ត្រូវ​តែ​ស្វែង​រក​ការ​យល់​ឃើញ​កាន់​តែ​ទូលំទូលាយអំពីផលនៃគោលនយោបាយខាងលើ។

 

ទន្ទឹមនេះ លោក Julapun សម្គាល់ថា ការខ្ចីប្រាក់នឹងមានភាពរអាក់រអួល ប៉ុន្តែនឹងមិនប៉ះ ពាល់ដល់សន្ទនីយភាពទីផ្សារដែលនៅតែមានចំនួនច្រើននៅឡើយ។

 

សេចក្តីប្រកាសនេះបានធ្វើឡើងនៅពេលដែលនាយករដ្ឋមន្រ្តីថៃ លោក សេដ្ឋា ថាវីស៊ីន ដែលជារដ្ឋមន្ត្រីហិរញ្ញវត្ថុផងដែរនោះ បានជំរុញឱ្យធនាគារកណ្តាលពិចារណាកាត់បន្ថយអត្រាការប្រាក់ក្នុងអត្រាទាបបំផុត ដើម្បីជួយសេដ្ឋកិច្ចជាមួយនឹងកម្រិតអតិផរណា៕