អន្តរជាតិ
នយោបាយអន្តរជាតិ
នាយករដ្ឋមន្ត្រីបារាំងថ្មី មានវ័យក្មេងជាងគេក្នុងប្រវត្តិសាស្ត្រខ្លួន និងជាអ្នកស្រលាញ់ភេទដូចគ្នាដោយបើកចំហ លោក Gabriel Attal នាយករដ្ឋមន្រ្តីបារាំងថ្មី។ រូបភាព AFP
× លោក Gabriel Attal នៅថ្ងៃទី៩ ខែមករា ត្រូវបានតែងតាំងជានាយករដ្ឋមន្ត្រីបារាំងថ្មី ដោយលោកប្រធានាធិបតី អេម៉ានុយអែល ម៉ាក្រុង។ លោក Attal បានក្លាយជានាយករដ្ឋមន្ត្រីវ័យក្មេងជាងគេបំផុតនៅក្នុងប្រវត្តិសាស្ត្រខ្លួន ដែលអាយុត្រឹម ៣៤ឆ្នាំ និងជាអ្នកស្រលាញ់ភេទដូចគ្នាដោយបើកចំហ។
បន្ទាប់ពីការលាលែងរបស់លោកស្រី Elisabeth Borne ជាប្រមុខរដ្ឋាភិបាល លោក Gabriel Attal នៅថ្ងៃទី៩ ខែមករា ត្រូវបានតែងតាំងជានាយករដ្ឋមន្ត្រីបារាំងថ្មី ដោយលោកប្រធានាធិបតី អេម៉ានុយអែល ម៉ាក្រុង។ ក្នុងវ័យត្រឹម ៣៤ឆ្នាំ លោក Attal បានក្លាយជានាយករដ្ឋមន្ត្រីវ័យក្មេងបំផុតនៅក្នុងប្រវត្តិសាស្ត្របារាំង។
តាមការចុះផ្សាយរបស់សារព័ត៌មានធំៗ ប្រមុខរដ្ឋាភិបាលបារាំងរូបនេះ ក៏ជាអ្នកស្រលាញ់ភេទដូចគ្នាដោយបើកចំហផងដែរ។
មុនកាន់តំណែងដ៏សំខាន់ លោក Attal ធ្លាប់ជាអ្នកនាំពាក្យរដ្ឋាភិបាល និងជារដ្ឋមន្ត្រីអប់រំបារាំង ក្នុងពេលបច្ចុប្បន្នផងដែរ។ នេះបើតាមសេចក្តីថ្លែងការណ៍របស់ការិយាល័យប្រធានាធិបតីបារាំង។
ជាការពិត នៅក្នុងឆ្នាំ២០១៧ លោកម៉ាក្រុង បានក្លាយជាប្រធានាធិបតីបារាំង ក្នុងវ័យក្មេងជាងគេបំផុតនៅក្នុងប្រវត្តិសាស្ត្រប្រទេសខ្លួន។ ក្នុងពេលកាន់តំណែង ប្រធានាធិបតីបារាំងរូបនេះ បានធ្លាក់ចុះប្រជាប្រិយភាពរបស់ខ្លួនយ៉ាងខ្លាំង ពាក់ព័ន្ធនឹងច្បាប់អន្តោប្រវេសន៍ និងបញ្ហាសន្តិសុខជាដើម។
បន្ថែមពីនេះ លោក Attal ត្រូវបានមើលឃើញថាជាមនុស្សជំនិតរបស់លោកម៉ាក្រុង និងមានប្រជាប្រិយភាពខ្លាំងនៅក្នុងរដ្ឋាភិបាល។
តាមរយៈបណ្តាញសង្គម X លោកម៉ាក្រុង បានសរសេរយ៉ាងច្បាស់ៗថា លោកអាចពឹងផ្អែកលើនាយករដ្ឋមន្ត្រីថ្មីដែលមានវ័យត្រឹម ៣៤ឆ្នាំបាន។
សូមបញ្ជាក់ថា ការដោះដូរប្រមុខរដ្ឋាភិបាលនេះ ធ្វើឡើងមុនពេលមានការបោះឆ្នោតសភាអឺរ៉ុប នៅក្នុងខែមិថុនាខាងមុខ៕
© រក្សាសិទ្ធិដោយ thmeythmey.com