ចាប់តាំងពីទៅដល់ Inter Miam កាលពីពាក់កណ្តាករដូវកាល ២០២២  ប្រធានក្រុម Messi បានជះឥទ្ធិពល យ៉ាងខ្លាំងទៅលើក្របខណ្ឌបាល់ទាត់ប្រទេសអាម៉េរិក។ តម្លៃលក់សំបុត្រការប្រកួតដែលមានវត្តមាន Messi មានការកើនឡើងទាំងបរិមាណ និងតម្លៃ ព្រោះមានមនុស្សជាច្រើនចង់ឃើញការលេងរបស់កីឡាករវ័យ ៣៦ឆ្នាំ ខណៈការលក់សម្ភារកីឡាដូចជាអាវ ក៏បានកើនឡើង។ 
 

ប្រធានក្រុមជម្រើសជាតិអាហ្សង់ទីនរូបនេះ លេងបានត្រឹមតែ ១៤ប្រកួតប៉ុណ្ណោះសម្រាប់ក្រុម Miami ដោយគេរកបាន ១១គ្រាប់ និងជួយដល់ក្រុមដែលមានលោក David Beckham ជាម្ចាស់មួយរូប ឈ្នះពាន  ​League Cup លើកដំបូងក្នុងប្រវត្តិសាស្ត្រក្លិប។ 
  

សម្រាប់រដូវកាលថ្មី វត្តមាន Messi នៅតែជាដើមចមក្នុងការទាក់ទាញចំណាប់អារម្មណ៍ ដោយការប្រកួតថ្ងៃបើកឆាកនៃលីគ MLS រដូវកាល ២០២៣-២៤ ទល់ក្រុម Sporting Kansas City ត្រូវបានផ្លាស់ប្តូរកីឡដ្ឋានប្រកួត។
 

ដំបូងការប្រកួតទល់នឹងក្រុម Miami ត្រូវធ្វើឡើងនៅក្នុងកីឡដ្ឋាន Children’s Mercy Park ដែលកីឡដ្ឋានផ្ទុកអ្នកទស្សនាបានត្រឹមតែ ១៨,០០០នាក់ប៉ុណ្ណោះ តែយ៉ាងណាក្លិប Sporting Kansas City សម្រេចចិត្តប្តូរទីតាំងទៅកាន់កីឡដ្ឋាន Arrowhead ជាទឹកដីរបស់ក្រុមបាល់ឱប Kansas City របស់លីគ NFL ស្ថិតក្រោមម្ចាស់តែមួយ ដែលផ្ទុកអ្នកទស្សនាបាន ៧៦,០០០នាក់។
 

ការប្តូរកីឡដ្ឋានផ្តល់ភាពងាយស្រួលសម្រាប់អ្នកគាំទ្រដែលមានបំណងចង់ទស្សនាការប្រកួត ដែលមានវត្តមានរបស់តារាបាល់ទាត់សញ្ជាតិអាហ្សង់ទីន ខណៈជាផលប្រយោជន៍មួយសម្រាប់ក្រុម Kansas City ថែមទៀត។
 

«ការប្រកួតនេះបានបង្កើតនូវចំនួនការចាប់អារម្មណ៍ មិនធ្លាប់មានពីមុនមក ចាប់តាំងពីកាលវិភាគរបស់ Major League Soccer ត្រូវបានផ្សព្វផ្សាយកាលសប្តាហ៍មុន។ យើងជឿថាព្រឹត្តិការណ៍ដ៏ធំក្នុងទីក្រុង Kansas នឹងធ្វើឱ្យយើងនិងដៃគូសហការ រួមតាំងការប្រកួតក្នុងកីឡដ្ឋាន Arrowhead នឹងមានមោទកភាព ព្រមទាំងទទួលបានបទពិសោធន៍ដ៏អស្ចារ្យទៅកាន់អ្នកគាំទ្ររបស់យើង និងក្រុមយើង។ ទទួលបានឱកាសរៀបចំការប្រកួត ដែលមានវត្តមាន​ Messi ក្នុងក្របខណ្ឌ MLS លើកដំបូង ជារឿងពិសេស ខណៈដែលប្រទេសអាម៉េរិកបានត្រៀមខ្លួនសម្រាប់ធ្វើម្ចាស់ផ្ទះ Copa America និង FIFA World Cup ឆ្នាំ ២០២៦។»។ នេះបើតាមសម្តីរបស់លោក Jake Reid ប្រធាន និងនាយកប្រតិបត្តិក្លិប Sporting Kansas City៕