លីគបាល់ទះប្រវត្តិសាស្ត្ររសប់កម្ពុជា«តេជោលីគ» ត្រៀមបង្ហាញរូបរាងនៅថ្ងៃបើកកម្មវិធីថ្ងៃទី១២ ខែមករា ដោយមានក្រុមអាជីពចំនួន ៨ ចូលរួម។ លោក អាំង សេរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា អះអាងថាលីគបាល់ទះលើកដំបូងនេះ ទទួលស្គាល់ពីសហព័ន្ធកីឡាបាល់ទះអាស៊ី (AVC) និងអន្តរជាតិ (FIVB) និងរៀបចំប្រកួតតាមស្តង់ដារលីគអាជីពកម្រិតពិភពលោក។
«តេជោលីគ ក៏ត្រូវបានទទួលស្គាល់ពីសំណាក់ FIVB និង AVC រួមជាមួយសមាគមបាល់ទះក្នុងតំបន់អាស៊ីអាគ្នេយ៍ (SAVA)។»។ នេះបើតាមសម្តីរបស់លោក អាំង សេរីពិសិដ្ឋ ប្រាប់កសារព័ត៌មានឌីជីថលថ្មីៗ តាមរយៈបណ្តាញសង្គមតេឡេក្រាម។
ក្លិប និងសមាគមបាល់ទះក្នុងប្រទេសកម្ពុជាចំនួន ៨ កំពុងត្រៀមខ្លួនប្រកួតប្រជែងក្នុងលីគដែលមានរយៈពេលជាង ១ខែ ដែលការប្រកួតនឹងចាប់ផ្តើមពីថ្ងៃទី១២ ខែមករា រហូតដល់ថ្ងៃទី១៨ ខែកុម្ភៈ ក្នុងសាលកីឡាបាល់ទះវិមានអូឡាំពិក។ ក្រុមមួយចំនួន ដែលចូលរួមប្រកួតប្រជែងក៏មានសមាសភាពកីឡាករបរទេសចូលរួមផងដែរ។
ចាប់កំណើតលើកដំបូងក្នុងនាមជាលីគបាល់ទះអាជីពប្រចាំកម្ពុជា ដែលមាន៨ក្រុម លោក សេរីពិសិដ្ឋ បានអះអាងដូច្នេះថា៖ «ពាក់ព័ន្ធចំនួនក្លិបលីគបាល់ទះ ក្រៅពីលីគជាតិ (National League) ភាគច្រើនដូចជាប្រទេសជិតខាងយើង ឡាវ មាន ៦ក្រុម, ថៃ មាន ៨ក្រុមដូចយើងដែរ ហើយតៃវ៉ាន់ មាន ៦ក្រុម អ៊ីចឹងភាគច្រើនក្លិបគេត្រូវជ្រើសយកក្លិបខ្លាំងចំនួនចាប់ពី ៦ ទៅ ៨ ដើម្បីប្រកួតប្រជែងស្របតាមស្តង់ដាការប្រកួត លើកលែងតែលីគជាតិដែលមានក្រុមកើនឡើងដល់ ១៨ ឬ ២០ក្រុម។»។
បន្ថែមពីនេះ ការប្រកួតរយៈពេលជាង ១ខែ នឹងមានរូបមន្តប្រកួតចំនួន ៣ ដំណាក់កាល ដោយ ជុំទី១ ជម្រុះ ២ក្រុម ជុំទី២ ជម្រុះ ២ក្រុម និងជុំទី៣ សល់៤ក្រុម ប្រជែងវគ្គពាក់កណ្តាលផ្តាច់ព្រ័ត្រ រហូតដល់វគ្គផ្តាច់ព្រ័ត្រដើម្បីរកក្រុងជើងឯក។ ទម្រង់ប្រកួតបែបនេះ លោក អាំង សេរីពិសិដ្ឋ បញ្ជាក់ថាដើម្បីជួយសម្រួលដល់ការចំណាយលើកីឡាករ របស់ក្លិប និងសមាគមដែលនឹងប្រកួតប្រជែង។
សមាសភាពក្រុមដែលនឹងត្រូវប្រកួតប្រជែងរួមមាន សមាគមបាល់ទះ វិសាខា, សមាគមកីឡាបាល់ទះក្រសួងមហាផ្ទៃ, ក្លិបបញ្ជាការដ្ឋានអង្គរក្ស, ក្លិបកងពលធំអន្តរាគមន៍លេខ ៣, ក្លិបកីឡាបាល់ទះខេត្តព្រះសីហនុ, ក្លិបកីឡាបាល់ទះស្នងការដ្ឋាននគរបាលរាជធានីភ្នំពេញ, ក្លិបស្នងការរដ្ឋាននគរបាលខេត្តពោធិ៍សាត់ និងក្លិបស្នងការដ្ឋាននគរបាលខេត្តកណ្តាល។
ទៅលើការប្រកួតមិត្តភាពអន្តរជាតិ រវាងក្រុមសមាគមបាល់ទះវិសាខា ម្ចាស់ពានរង្វាន់ «តេជោខាប់» កាលឆ្នាំ ២០២៣ ទល់នឹងក្លិប Sanest Khanh Hoa លេខ ១ មកពីវៀតណាម គឺជាការប្រកួតបើកឆាកដើម្បីស្វាគមន៍ការប្រកួត«តេជោលីគ» និងដើម្បីកៀរគរការគាំទ្រផង។
នៅក្នុងប្រទេសកម្ពុជា ការប្រកួតមិត្តភាពអន្តរជាតិលើវិស័យបាល់ទះភាគច្រើនមានកំណើននៃការគាំទ្រ និងស្សនាដោយផ្ទាល់ក្នុងកីឡដ្ឋានច្រើន។ ជុំវិញករណីនេះ អគ្គលេខាធិការសហព័ន្ធបាល់ទះកម្ពុជាបានពន្យល់បន្ថែមដូច្នេះថា ៖«ការប្រកួតមិត្តភាពរវាងក្លិប Sanest និងវិសាខា ជាការបើកព្រឹត្តិការណ៍តេជោលីគ អ៊ីចឹងព្រឹត្តិការណ៍នេះយើងចង់ពញ្ញាក់អារម្មណ៍ និងគៀងគរអ្នកគាំទ្រឱ្យមកទស្សនាការប្រកួតរវាងក្លិបលេខ ១ នៅវៀតណាម ទល់នឹងក្លិបលេខ ១ នៅកម្ពុជា។ សន្ទុះនៃការគាំទ្រលើការប្រកួតអន្តរជាតិ លើកលែងតែការប្រកួតលីគថ្នាក់ជាតិ ខ្ញុំគិតថាមានតែកម្ពុជាប៉ុណ្ណោះ ដែលមានអ្នកចូលទស្សនាច្រើនជាងគេនៅលើពិភពលោក។»៕