Fulham ជាក្រុមភ្ញៀវ ស៊ុតគ្រាប់បាល់នាំមុខ ១គ្រាប់មុន នៅនាទី១៩ ដោយខ្សែប្រយុទ្ធស្លាបសញ្ជាតិប្រេស៊ីល William នៅក្នុងវគ្គទីមួយ។ ទោះជាយ៉ាងណាសមាជិកក្រុមហង្សក្រហម Curtis Jones ស៊ុត ១គ្រាប់នៅនាទី៦៨ មុនពេល Cody Gakpo ស៊ុតបញ្ចូលទីគ្រាប់ជ័យជម្នះនៅនាទី៧១ និងជាការរកគ្រាប់បាល់ ២គ្រាប់ បានលឿនបំផុតត្រឹម ៣នាទី នៅវគ្គទីពីរ។
 

ទោះជាឈ្នះការប្រកួតក៏ដោយ ប៉ុន្តែលោក Jurgen Klopp ជាអ្នកចាត់ការទូទៅប្រចាំក្រុម​ហាក់មិនសប្បាយចិត្តចំពោះលទ្ធផលឡើយ ហើយបុរសសញ្ជាតិអាល្លឺម៉ង់ទាមទារកូនក្រុមឱ្យធ្វើបានកាន់តែខ្លាំងជាងការប្រកួតជើងទីមួយ។ លោក Klopp ​និយាយប្រាប់អ្នកកាសែតដូច្នេះ ៖«វាមិនមែនជាការប្រកួតដ៏ល្អរបស់យើង​ ដូចដែលយើងធ្លាប់បានលេងឡើយ។ ខ្ញុំបានប្រាប់កូនក្រុមរបស់ខ្ញុំថាយើងជាមនុស្សដែលខ្លាំងពូកែ។»។
 

Liverpool បន្តយកឈ្នះការប្រកួតក្នុងទឹកដីចំនួន ១៤លើក ជាប់គ្នា និងស្មើ ២លើក នៅក្នុងរដូវកាល ២០២៣-២៤ នេះ។ ដោយឡែកសម្រាប់ Gakpo ដែលប្តូរចូលក្នុងវគ្គទីពីរជួយនៅតំបន់ប្រយុទ្ធជាមួយនឹងមិត្តរួមក្រុម Darwin Nunez ភ្លាមៗរូបគេរកបាន ១គ្រាប់​នាទី៧១ ដែលជាគ្រាប់រក្សាជ័យជម្នះក្នុងទឹកដី Anfield ក៏បានបង្ហាញក្តីរីករាយសម្រាប់ការជួយក្រុមយកឈ្នះការប្រកួត។
 

«វាជាចិត្តគំនិតក្នុងក្រុម ក្នុងក្លិប និងបន្តទៅមុខ ហើយវាគ្មានបញ្ហាអ្វីកើតឡើងនោះទេ យើងបានបង្ហាញវាម្តងទៀតនៅថ្ងៃនេះ។ ប្រសិនបើអ្នកមានចិត្តគំនិតនោះ អ្វីៗជាច្រើនអាចនឹងកើតឡើង។ សម្រាប់ Jones ក៏ដូចគ្នារកបានគ្រាប់បាល់ដ៏សំខាន់សម្រាប់យើងទាំងអស់គ្នា បន្ទាប់ពីយើងមានអារម្មណ៍ថាបាក់ស្បាត មិនត្រឹមតែមានការគ្រប់គ្រងប៉ុណ្ណោះទេ តែការបង្កើតឱកាស ហើយបន្ទាប់មកចាលើកទីពីរ ដូច្នេះខ្ញុំសប្បាយចិត្តខ្លាំងដែលបានលេងជាមួយពួកគេ។»។ Gakpo បាននិយាយប្រាប់ទូរទស្សន៍​ Sky Sports បែបនេះ។
 

Liverpool នឹងធ្វើដំណើរទៅកាន់ទឹកដី Craven Cottage សម្រាប់ការប្រកួតប្រជែងជើងទីពីរ នៅថ្ងៃទី២៤ ខែមករា ដើម្បីស្វែងរកឱកាសឡើងទៅកាន់វគ្គផ្តាច់ព្រ័ត្រ EFL Cup៕